JEREMIAH 50
50
Babilon ye Polouyu
1 Mapao nou ahi Babilon ae Babilon maitao vanou haibüa paoe:
2“Tyahrütao hi ko hai nasü shapao peio!
Shee nasü peio ae ko nasü paosü peio!
Hai nasü kheikhei soua poku khaiso!
Babilon sü kaodu tare!
Honapai vei Marduk rah sü pepo tare!
Honapai vei bashara khesü hraongu ngaore,
honapai vei ngaorayu zhurai khesü deiphe sasawure!
3“Reilova buyu tyahrü ali nou Babilon pei hi soureih souvelai, ae honapai vei teidei sü soushiwua panou pata bailai. Mai ae kikhaorü khesü tuta-a bailai, sübüa mailia sühisü hrülai moe.”
Israel Mai Dakhai Veyu
4 Mapao nou paoe, “Teile süna veyu phaki, Israel alia Judah maitao nou krapoa nou puletao vei Ramai Eye phouvelai. 5Puletao nou Zion vei ludu sü noutalai alia sülova sü talai. Puletao nou akhai hayu vei vo hai Eye koa souloulai ae sünasü pfüphe khailai moe.
6“Avei maitao hai zhaokhowo nou deichi vanou hakhai touyu zhaotu ali büre. Puletao hai deichi ali hinou ali hi mota-a laiyu zhaotu ali büre, ae lah vei ki sü kalova buyu ngaiwure. 7Puletaoye ngaoyu mai hrülai nou puletaoye sü dure. Puletao vei ngaoba maitao nou paoe, ‘Etao nou mah moe, daiolouzü puletao nou puletao vei puopaoh maitao nou areih buyu, ae puletao nou louche-a buyu Mapao nghoujü hinou mah souwure.’
8“Israel maitaore, Babilon hinou tutalo! Tyadei sünasü thaokhaiwuo! Sühinou tapalou raimai soulo! 9Enou reilova buyu tyahrütao panou Babilon pei hi soureih soure donou soupeilai. Puletao nou lulu nou zhapoa honapai pei hisü soureih souloulai ae reih veiloulai. Puletao hai soureih souvei sho-e, puletao vei vouloushu hai veikhai timoa kalai touyu hisü kaloua baiwe. 10Babilon sü mainou shaoloulai, ae honapai vei na shaolouyu maitao nou jüpayu na veishi poloulai. Haisü Mapao Enou paowe.”
Babilon Kaodutayu
11 Mapao nou paoe, “Babilon hi maitaore, neletao nou avei tyahrü nasü soushi peiwure. Neletao nou sasho-a vashore, cho nou moa rhei nou thou taiyu büa neletao sü asah soure, 12ana neletao vei nuhdu adu nasü hraodu ngaolai. Babilon hai taikayu tyahrü ali soutalai ae dzü hazei touyu deiki ali souta-a bailai. 13Avei lekha rarou vanou Babilon hisü mailia hrülai moe; haisü soushi khaiwulai, ae haina tacho tayu mai hrülai nou ngaoloua khupa soulai.
14“Voulou poyu maitaore, Babilon hisü reih huloure donou sühaolo. Neletao vei vouloushu veishi Babilon hi davu khaio, daiolouzü honapai nou Mapao ahi mah souwure. 15Nuhdu pehao teitei hinou reihvo sü soukhaio! Chuo Babilon nou mai phi hi vere. Puhvei kivo khesü daphe daphowure. Enou Babilon hisü khüngu phouwe. Südonou puh hisü neletao vei khüngu phoulo, ae puhnou neletao hi soupeiyu büa puh hia soupeio. 16Teidei sühisü panou thoutai vuthouso, moyuma panou chachi pove jüso. Sühinou hrüa buyu shetumai hrülai hai reihmaitao nou soureih souveyu donou ngaopia lahkuku vei teidei hisü dakhai tawulai.”
Israel Mainou Dakhai Veyu
17 Mapao nou paoe, “Israel maitao hai souveo nou hupho rarou khaitouyu zhaotu büre. Arai railai soua nou puletaoye sü Assaria hi veo nou reih soue, ae süthaisü Babilon hi Veo Nebukhadnezzar nou puletao vei rao sü tukho touloue. 18Süvanou Khoukhoulai Mapao, Israel maivei Ramai Enou Assaria veo ye tudee peiyu büa Babilon hi Veo Nebukhadnezzar ye sü souvea peilai. 19Enou Israel maitaoye sü lah puletao vei teidei hi sa-a dakhaive peilai. Puletao nou Karmel Deichi hinou ae Bashan teidei hinou payu touso khesü toulai, ae puletao nou Ephraim ae Gilead teidei hinou payu touso, puletao nou tounüa buyu veishi sü toulai. 20Teile süna veyu phaki, Israel maitao hisü mah aliro ngaolai moe ae Judah hisü tsüshi ali-a bulai moe, daiolouzü Enou vupa peikhai touyu maitao vei mahmo khesü khaipeiwulai. Haisü Mapao Enou paowe.”
Babilon Maiye Ramai nou Chikure
21 Mapao nou paoe, “Merathaim maitao ae Pekod maitaoye taho reih soukhaio. Puletaoye southakhai touwo. Enou neletao hi kharochi peiyu bütoua soulo. Haisü Mapao Enou paowe. 22Teidei hisü soureih souyu paikho choure, ae soushi showure. 23Babilon maivei hubao sünou deiphao veishi daphesasa peie, ana chuo hubao sünasü sousasa khaiwure! Tyadei süna hi vepayu khesü ngaoloua tyahrü hrülai nou khupa soure. 24Oh Babilon, nenou Eye sü dure, ae Enou neye donou shorü southou khaitouyu hisü ne nou sümoa loumu loure. 25Avei reihna pokhai touyu kide nasü Enou houpeiwure, ae avei lekha hinou sütaosü Enou popa peiwure, daiolouzü Khoukhoulai Mapao Enou Babilon hi soure vah buloure. 26Puhye sü kainghou veishi hinou reih hulou khaio ae puhvei thoudzü pokhai touyu ki khesü dakholaio! Shaolouyu na khesü pove thou büa khokhai loukhaio! Teidei sü soushilaio, haliro shokhai peiso! 27Puhvei reihmaitao sü southawo, puletao mai hrülai sü southakhaio! Babilon hai daizhou koute veayu sousa! Puletaoye tudeere teile sü vere.”
28(Babilon teidei hinou tupa louyu maitao nou Jerusalem hi vere, ae puletao nou kabüa Etao vei Ramai Mapao nou puhvei Rathoki hi soupeiyu vei khüngu sü Babilon mai hi phoupeie touyu khesü paongao-e.)
29“Voulou poyu maitao hisü Babilon hi soureih hulou khaio tea paopeio. Voulou polou süyu mai hrülaiye sü seitawo. Nuhdu nasü sühaolo, panou mailia tupa louso. Puhnou soukhai touyu thaifüa puh hia soupeio, daiolouzü puhnou khaophu soua Israel maivei Sheepu, Eye ngaophou more. 30Südonou puhvei nahle maitao hai nuhdu vei ludu kinou southawulai, ae süzhou teithe puhvei reihmaitao hai souhawulai. Haisü Mapao Enou paowe.
31“Khaophu soua buyu Babilon, Khoukhoulai Ramai Mapao Enou ne pei sü hraita laire. Enou neye tudeere teile sü vere. 32Khaophu soua buyu nevei tyahrü nasü phi süloua kaodu talai, ae mailinoua neye sü soukha peilai moe. Enou nevei nuhdu khesü meideiwulai, ae süpehao teitei sü soushiwulai.”
33Khoukhoulai Mapao nou paoe, “Israel alia Judah maiye sü souchoro peie. Puletaoye nülouyu maitao nou puletaoye soutaosou kholoua panou tabaire. 34Ana puletaoye vupa peire nasü khouko busho-e — puh zhih sü Khoukhoulai Mapao toue. Puhnou soutaosou puletaoye vupa peilai, sübüa puhnou deiphao sü soyu hai peilai, ana Babilon maiye sü panou soyu ngaolai moe.”
35 Mapao nou paoe,
“Babilon sü thaiwulai!
Sühi maitao sü southalai,
veo nahmaitao ae tsüveiyu maitao thaiwulai.
36Da-a nou rachipaolayu maitao sü thailai—
puletao hai daizhou koute voyu sousa!
Puhvei reihmaitao sü southawulai—
puletao hai daizhou koute ngaopi soulaisa!
37Rheitao ae rheiluki khesü souhawulai!
Ngapoa veyu reihmaitao sü southawulai—
puletao hai daizhou koute lülou hosa!
Puhvei kini khesü souha laiwo;
shaolo ae polouo.
38Puhvei teidei hisü teikoyu pove peio ae rei khesü southe laio.
Daiolouzü Babilon hai bashara khaikho buyu teidei ali-e,
ae sütao nou maikhe maiye souvo peie.
39“Südonou Babilon hisü rekhaona ae lakhao#50.39 rekhaona ae lakhao; moa rah ashitao. nou hrüyu buh souwulai, ae sühisü ostrik raohou nou hrülai. Haithai vere teile teitei hia mai nou sühisü hrüpulai moe. 40Enou puhvei nuhdutao ae süpehao hi buyu nuhtao souhayu phaki, Sodom ae Gomorah hi vepayu bütoua Babilon hia vepalai. Mailinoua sühisü hrüpulai moe. Haisü Mapao Enou paowe.
41“Maikhe maisü reilova nou buyu teidei ali hinou laire,
khouko bushoyu tyahrü ali;
vemai taoli nou soureih soure donou souda loure.
42Puletao nou puletao vei voulou ae khoche sü poloure;
puletao hai zhaipou shisho-e ae maiye leshiyu sü ha-e.
Puletao nou rhei pfüa tayu kho sü zaidzü houyu kho büwe.
Puletao nou Babilon pei hi soureih soure donou souda loure.
43Babilon hi veo nou ko sü chouloure,
ae puhvei bah sü lülouho tare.
Ngaopiyu sünou puh hi veloure,
naotumai ali nou nah nare teile hi souyu büa puhsü bure.
44“Souveo ali nou Jordan vaohro hinou tapa zhaotutao ye hutayu büa Mapao Enou Babilon maiye sü puletao vei nuhdutao hinou hutawulai. Süthaisü Enou dolouyu mai nanou tyahrü sünasü khasa-a hrülai. Thaonou Eye paona dalai? Thaonou Eye dulaige? Thaonou anghoujü hinou lalou süe? 45Südonou Enou Babilon pei hi soulai tea tsüchoda khaitouyu ae puhvei maitao hi soupeilai tea buyu khesü keikhaio. Puletao vei nahmaitou koute süthaipoa tawulai, ae mai hrülaiye panou ngaopi shoyu sü soupeilai. 46Babilon nou kaodu tayu kho sü panou deiphao veishi ngulelai, ae puhnou krayu pai sü panou tyahrü hrülai nou choulai.”
Currently Selected:
JEREMIAH 50: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
