JEREMIAH 40
40
Jeremiah nou Gedaliah ye Koa Buyu
1Reihmai peikhowo Nebuzaradan nou Eye hukhaki hinou phapeiyu thai, Mapao nou Eye Ramah hinou ve cha-e. Eye Jerusalem ae Judah hinou nüpoa Babilon hi tayu maitaoye koa hurai nou phuloua sata-e.
2Reihmai peikhowo nou Eye kuloua haibüa paoe, “Neletao vei Ramai Mapao nou teidei hai nasü souhawure donou paopi peie, 3ae chuo puhnou paokhai touyu büa soupeire. Neletao hi haibüa vepayu sü daivanoue toulouzü neletao nou Mapao chi zümoa mah souyu donoue. 4Chuo Enou ne bah phukhai touyu hurai nasü phapeilai ae neye panou lahdo souloulai. Nenou Eye koa Babilon hi tanü louzü ta-a bailai, Enou neye zhupeilai. Ana nenou tanümo louzü tamoa bailai. Nenou bunüyu teidei tarali hia ne jüpasou taho bua bailai.”
5Enou puh hi chila lia peimo khaie, Nebuzaradan nou haibüa paoe, “Babilon hi veo nou Judah teidei panou khore donou dopeikhai touyu Shaphan tyao, Ahikam nahpoutu Gedaliah hi dakhai tawo. Nenou puhye koa buwo, ae nevei maitaoye koa hrüo, moyuma nenou tanüyu buh tarali hia ta-a bailai.” Süthaisü puhnou Eye sapeina ali peie ae touso daotuli peia panou Eye tare. 6Süthaisü Enou Mizpah hinou Ahikam nahpoutu Gedaliah hi taho teidei hinou shokhai toua buyu maitaoye koa bure donou tare.
Judah Teidei Khowo Gedaliah
(2 Vem 25.22-24)
7Vakou nou tutsüa Babilon mai hi peithou moyu reihmai peikhoyu ae reihmai kamai-a buhie. Babilon hi veo nou Ahikam nahpoutu Gedaliah ye panou teidei khore donou dopeiwure, ae Babilon hi hukhamai soua nüpoa tamoyu touha kayu maitaoye puh bah thoupeiwure touyu chouloure. 8Südonou Nethaniah nahpoutu Ishmael, Kareah nahpoutu Johanan, Tanhumeth nahpoutu Seraiah, Netophath hinou Ephai nahpoutu maitao, alia Maakah hinou Jezaniah nou puletao vei maitaoye saloua Gedaliah nou buyu Mizpah nuhdu hisü ve-e. 9Gedaliah nou puletao hi paoe, “Enou neletao hisü cheche-a paowe, süolouzü Babilon maiye ngaopiso. Teidei hai hinou hrüa Babilon veo vei kuvah sü soua bulouzü, neletao hi kaozhou ashi ali-a vedaolai moe. 10Enou Mizpah hinou bua neletao thaosou Babilon mainou veyu phaki laloua bailai. Ana neletao nou buyu teidei hinou darkhadzü, rashi, ae oliv theadzü khesü pojüa nou hrülo.” 11Sübüa Moab hinou buyu Jihudimai, Ammon mai, Edom ae teidei kukhe hinou hrüyu Jihudimai hrülai nou chouloure, sülouzü Babilon hi veo nou Judah hi mai daotuli hai shopei khaitoue ae puletaoye panou khore donou Shaphan nahpoutu Gedaliah ye dothou peiwure touyu sü chouloure. 12Südonou puletao nou puletao vei buh sü thaowua Judah hi veloure. Puletao nou Gedaliah nou buyu Mizpah hisü vere, ae puletao nou darkhazhaoh ae rashi sü alao sou pojü loure.
Gedaliah ye Southayu
(2 Vem 25.25-26)
13-14Süthaisü Kareah nahpoutu Johanan ae vakou nou laiyu reihmai peikho maitao nou Mizpah hi velou Gedaliah hi haibüa paoe, “Ammon maivei veo Baalis nou Nethaniah nahpoutu Ishmael ye seive neyesouthalai touyu ne sümovu?” Ana Gedaliah nou puletao vei chi sü louche more. 15Süthaisü Johanan nou Gedaliah hi kheikhei sou haibüa paoe, “Nethaniah nahpoutu Ishmael ye Enou taho southa peilai, sükulouzü thaonou puhye southare touyu hai mailia süloulai moe. Daisounou puhye panou neye sü southawulai? Haibüyu thaio ne hinou vejüa buyu Jihudimai sü porarou ta-a bailai, ae Judah hi shokhaitoua buyu maitao sü veaho-a bailai.”
16Ana Gedaliah nou Johanan hi haibüa chila peie, “Sükuso! Nenou Ishmael vanou paoyu sü cheche moe!”
Currently Selected:
JEREMIAH 40: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
