JEREMIAH 39
39
Jerusalem Kaodutayu
1Zedekiah nou Judah hi vekou louyu po akü vei khouh kirou navasü Babilon hi Veo Nebukhadnezzar nou puhvei reihmai hrülaiye saloua Jerusalem hi reih huloure. 2Zedekiah nou veo soulouyu po kiali, khouh adai vei teithe akü zhou nuhdu vei kivo sü souphe soupho laiwure.
3(Jerusalem polouyu thai,#39.3 Jerusalem polouyu thai; chipao haitao hai chime 38 vei akhai hinou poa khekhai toue. Babilon veo vei peikhomai hrülai nou talou Rokhubomü Toutsü hinou buloure. Mai sütao sü: Nergal Sarezer, Samgar Nebo, Sarsekim, Nergal Sarezer, ae Babilon hi veo vei peikhomai kukhe noupu buloure.)#39.3 Mai haitao vei zhih sü sheesha toumoe.
4Veo Zedekiah ae puhvei reihmaitao nou vepa-a buyu khesü zhingaolou khaie, puletao nou tupa loure donou puletao nou veo vei kipei, kivo ahai kohinou robomü buyu nahinou tupaloua Jeriko Deikho hilova tutare. 5Ana Babilon vei reihmai nou puletaoye thaihukou Jeriko deikho hinou Zedekiah ye nüloure. Süthaisü puletao nou puhye Veo Nebukhadnezzar hi savere, süphaki puh hai Hamath maivei teidei, Riblah nuhdu hinou bue, ae puh pei hi Nebukhadnezzar nou haibülai touyu chidei soupeie. 6Babilon hi veo nou Zedekiah nahpoutu maitaoye Riblah hinou puhvei nghoujü nou southa peie, ae Judah vei peikho maitao-a southawure. 7Süthaisü puhnou Zedekiah nghithou sü reila paloua puhye hurai nou phuloua Babilon hi nüpoa tare. 8Babilon mainou veo vei ki ae maikhe maitao vei ki khesü meidei laiwure alia Jerusalem vei kivo sü daphe daphore. 9Süthaisü reihmai peikhowo Nebuzaradan nou nuhdu hinou shokhaitoua buyu maitao ae puh hi tuveyu maitaoye hukhamai soua Babilon hi nüpoa tare. 10Puhnou Judah teidei hi touha kayu maitao, ki-lu haliro hayu maitao bah hi Judah teidei sü thaodai khaipeie.
Jeremiah ye Phapeiyu
11Ana Veo Nebukhadnezzar nou reihmai peikhowo Nebuzaradan hi haibüa kharochi peie: 12“Taho Jeremiah ye phoulo ae puhye zhutou toupeio. Puhye souveaso, ana puhnou jüpayu teitei sü puh hi soupeio.” 13Südonou Nebuzaradan, Rabsari hi Nebushazban, Rabmag hinou Nergal-sharezer, ae Babilon veo vei peikho maitao nou 14Eye reihkhao maivei hukhaki hinou sapa peie. Puletao nou Shaphan tyao, Ahikam nahpoutu Gedaliah ye panou Eye kikoa zhupeire donou soupeie. Südonou Enou maikhe maitaoye koa bue.
Ebedmelek donou Areih buyu
15Enou veo vei reihkhao maivei hukhaki hinou buyu teile hinou Mapao nou ahi 16taho Ethiopia puona Ebedmelek hisü Israel maivei Ramai, Khoukhoulai Mapao nou haibüa paowe tea paopeio, “Enou soulai tea paokhai touyu bütoua Enou soupeilai, Enou nuhdu haina hisü vasayu moanou veahoyu ae kanghiyu sünou pove peilai, ae haitao vepayu sü nenou ngaolai. 17Ana Mapao Enou neye vupa peilai, ae neye nenou ngaopiyu maitao bah hi thoupeilai moe. 18Enou neye panou kaozhou ashi daolai moe, ae neye panou southalai moe. Nenou Eye loucheyu vanou ne sü tureipa loulai. Haisü Mapao Enou paowe.”
Currently Selected:
JEREMIAH 39: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
