JEREMIAH 41
41
1Po süna vei khouh akü zhou veo vei kihimai soua buyu veo vei peikhowo Elishama tyao, Nethaniah nahpoutu Ishmael nou mai kukhe kirou saloua Gedaliah ye daore donou Mizpah hisü ve-e. Puletao nou koa hatou zho-a buyu hinou, 2Nethaniel nahpoutu Ishmael ae puhnou sapoa laiyu mai kirou taonou khoche paipaloua Gedaliah ye daothawure. 3Ishmael nou Mizpah hinou Gedaliah ye koa sabuyu Jihudimai kukhetao ae Babilon maivei reihmaitao-a southawure.
4Thainesho shona, Gedaliah ye southare touyu mailia sümoa bukinou 5Shekem, Shiloh ae Samaria hinou mai raicha sü puletao vei mümai saiwua, sabanü paipha sasaloua ae puletao vei vasou sü zhime soupaloua Rathoki hi posheela peilai tea thoudzü vei posheelana ae poukai nüvei khesü poa veloue. 6Ishmael nou puletaoye daolai tea Mizpah hinou kra-a tapa-e. Puhnou puletao hi takou haibüa paoe, “Zhuvea nou talou Gedaliah ye zhukhaio.” 7Puletao nou nuhdu khevai talou louyu thai, Ishmael ae puhvei maitao nou puletaoye sü southawure, ae puletao vei thaiphao sü dzükhao hi laithouwure.
8Ana puletao hrohinou mai kirou linou Ishmael hi paoe, “Etaoye zhuvea nou southa peiso! Etao nou dou hinou southou, süthou, oliv theadzü ae laivoudzü poku khaitoue.” Südonou puhnou puletaoye southa more. 9Ishmael nou southa khaitouyu maitao vei thaiphao laithouyu dzükhao nasü dusho-e. Sünasü Israel hi Veo Baasha nou reih hulouyu phaki Veo Asa nou hekhai toue. Ishmael nou dzükhao nasü thaiphao nou thouphou peie. 10Süthaisü Ishmael nou Mizpah hinou buyu mai hrülai, veo vei nahnaotu maitao, ae reihmai peikhowo Nebuzaradan nou Gedaliah bah hi kiko peio tea khaidai peiyu maitaoye sü hukhamai soua nüpoa Ammon maivei teidei hilo sapoa nou tare.
11Ana Ishmael nou haibüa vah ashi souyu sü Kareah nahpoutu Johanan ae puhye koa buyu reihmai peikho maitao nou choulouyu phaki, 12puletao nou puletao vei mai hrülaiye saloua Ishmael pei hi soureih soure donou tare. Puletao nou puhye Gibeon hi buyu dzükhao dushoyu na hinou thaingou loue. 13Ishmael nou nüpoa tayu hukha maitao nou Johanan ae puh nou salaiyu maitaoye zhingao louyu phaki, puletao hai lesa shore, 14ae puletao nou puh hisü tupoa nou koure. 15Ana Nethaniel nahpoutu Ishmael ae puhvei mai acha taosü Johanan hinou tureipa loua nou Ammon maivei teidei hilo tuta loure.
16Süthaisü Johanan ae puhye koa laiyu reihmai peikho maitao nou Mizpah hinou Ishmael nou Gedaliah ye southawua nüpoa tayu mai hrülai — reihmaitao, naotu maitao, nahmaitao, ae jüthou lakhai touyu maitao sü saloure. 17-18Puletao nou Babilon maiye ngaopi loure, daiolouzü Babilon hi veo nou Judah teidei panou khore donou dopakhai touyu Gedaliah ye southare. Südonou puletao nou Babilon mai hinou tuvaita loure donou Ejipt hi hotare. Puletao nou Bethlehem nghia buyu Kimham touyu buh hinou ve chao-e.
Currently Selected:
JEREMIAH 41: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
