JEREMIAH 36
36
Baruk nou Rakothoki hinou Lekhai touyu Larü Phouyu
1Josiah nahpoutu Jehoiakim nou Judah hi veo soulouyu po adai kousü Mapao nou ahi haibüa paoe, 2“Zükhaiyu larü ali poloua Enou ne hi Judah ae Israel maitao alia tyahrü veishi donou paopei khaitouyu chipao teitei, süsü Josiah nou vekou louyu teithe hinou poa zhou koute paoyu chipao khesü rüthou khailo. 3Enou Judah maitao hi veahoyu sü pove peilai tea paopei khaitouyu khesü puletao nou choulouyu phaki, puletao nou vah ashi souyu sü thaolou vei-e, sükulouzü Enou puletao vei mahmo khesü khaipeia bailai.”
4Südonou Enou Neriah nahpoutu Baruk ye kuloua Mapao nou ahi paoyu chipao teitei sü panou puhye larü rüthouloue. 5Süthaisü Enou Baruk hi haibüa paodou peie, “Eye Mapao vei Rathoki hisü panou vebare, 6ana maikhe mainou lüh-a ae veachi pao-a buyu phaki Enou neye panou sühi veyu jüpawe. Mapao nou ahi paopeiyu chitao ae Enou neye panou rükhai touyu teitei sü maisou panou choulou süyu hinou phoungao peio. Sükhesü nenou nuhdu kukhe hinou veyu Judah maitao hi-a chongao peio. 7Puletao nou Mapao hi veachi paoloua puletao nou vah ashi souyu khesü thaolou vei-e, daiolouzü Mapao nou puletao hi puhvei lekha rarou hai ngaopi sho-a paopei khaitoue.” 8Südonou Baruk nou Mapao vei chipao, Enou paopeiyu bütoua Rathoki hinou phoungao peie.
9Judah hi veo Josiah nahpoutu Jehoiakim nou vekou louyu po angou vei khouh akü kousü Jerusalem hi mai hrülai alia Judah vei nuhdutao hinou veyu maikhe mainou Mapao vei jüpa ngaoloure donou veachi pao-a lüh-a nou bue. 10Süthaisü maisou nou kei-a buyu hinou Enou paopeiyu teitei sü Baruk nou larü nasü Rathoki hi rü-apeio Shaphan nahpoutu Gemariah vei kide hinou phoungao peie. Puhvei kide hai Rathoki vei Robomü Ashu navei reilova nou bue.
Lekhai touyu Larü sü Peikho maitao hi Phoungao Peiyu
11Shaphan tyao, Gemariah nahpoutu Mikaiah nou larü hinou phoungao peiyu sü choulou khaie, 12puhnou veo vei larü rü-apeio vei kide hisü veloure; ae süphaki peikho maitao hai sühinou vejüa nou bue; rü-apeio Elishama, Shemaih nahpoutu Delaiah, Akbor nahpoutu Elnathan, Shaphan nahpoutu Gemariah, Hananiah nahpoutu Zedekiah ae peikhomai kukhetao-a sü hinou bue. 13Baruk nou maisou hi phoungaoyu chipao teitei sü Mikaiah nou puletao hi paongao peie. 14Süthaisü peikho maitao nou Baruk ye kupove panou larü nasü phoungao peire donou Kushi nahpoutu, Shelemiah nahpoutu, Nethaniah nahpoutu Jehudi ye seitare. Baruk nou lekhai touyu larü nasü puletao hi povere. 15Puletao nou puh hi paoe, “Talou buloua larü nasü Etao hi phoungao peikhaio.” Südonou Baruk nou puletao hi phoungao peie. 16Puhnou phoungao peiyu thai, puletao hai alinou aliye ngaopi shopoa nou zhue, ae puletao nou Baruk hi paoe, “Etao nou haisü veo hi paosü peimo louzü shire.” 17Süthaisü puletao nou Baruk hi noue, “Kabüa chipao haitao hai ne rüloue, Etao hi paongao khaio. Jeremiah nou ne hi paopeia nenou rülouvu?”
18Baruk nou puletao hi chila peie, “Jeremiah nou chipao alili nou paopeia sütao sü Enou larü hai hi larüdzü nou rüloue.”
19Süthaisü puletao nou Baruk hi paoe, “Jeremiah ne hai taho tutsülo, ae ne hai daiki nou bue touyu mai lia panou süsho.”
Veo nou Larü nasü Mei Deiyu
20Peikho maitao nou larü nasü veo vei rü-apeio Elishama vei kide hi pokhaiwua veo hi taho sütao veishi hai paongao peie. 21Süthaisü veo nou Jehudi ye seiho panou larü nasü poloure. Puhnou larü sü Elishama vei kide hinou poloua veo hi ae süpehao hinou la-a buyu peikho maitao hisü poungao peie. 22Haisü khouh akü nava hinoue, ae veo nou puhvei teisaiki vei ki hinou mei voa nou bue. 23Jehudi nou chime asü moa adai phoukouyu phaki sütao hai veo nou koutu ali poloua lekhai touyu larü nasü vadeloua mei deipeie. Haibüa lekhai touyu larü teitei sü veo nou meidei laikhai toure. 24Ana phoungao peiyu chipaotao vanou veo alia puhvei peikho maitao hai mailiro chouloua ngaopiyu moa leveayu sü hare. 25Elanathan, Delaiah ae Gemariah puletao nou veo hisü zhuvea nou larü sü meidei peiso tea khowe, ana veo nou puletao vei akho sü keipei more. 26Süthaisü veo nou puh nahpoutu Jerahmeel, Azriel nahpoutu Seraiah ae Abdeel nahpoutu Shelemiah puletaoye nou Eye alia avei larü rü-apeio Baruk ye nülo tea kharochi peie, ana Mapao nou ahai ye poku peie.
Jeremiah nou Larü Kukhe Ali Rüpu louyu
27Enou Baruk hi paopeia panou rükhai touyu larü nasü Veo Jehoiakim nou meideiyu thai, Mapao nou ahi 28larü kukhe ali poloua raichoki rükhai touyu chipao raibüa rüpulo tea paoe. 29Mapao nou veo hi haibüa paopeio tea ahi paoe, “Nenou lekhai touyu larü nasü meidei laiwure, ae Jeremiah hisü daisounou Babilon hi veo nou tave teidei hai nasü soushiwulai ae maikhe maitao alia hrikhaona khesü southawulai tea paowe tea noue. 30Südonou chuo Mapao Enou Judah hi veo Jehoiakim hisü paowe, süolouzü nevei tounah ali-a panou David vei vedei hisü veo soupulai moe. Neletao vei thaiphao khesü panou hea teile hi teinghi nou phulai, ae khei teile hi panou vüra nou kou sholai. 31Enou neye ae nevei tounah maitao, alia nevei peikho maitao hrülaiye sü puletao nou mahmo soukhai touyu donou tudee peilai. Enou paopi peiyu khesü nenou moa Jerusalem ae Judah hi maitao nou ngaophou peimore, südonou Enou paopi peiyu teitei sü neletao mai hrülai pei hi pove peilai.”
32Süthaisü Enou lekhai touyu larü ali poloua avei larü rü-apeio Baruk hi peie, ae Enou paopeiyu teitei sü puhnou rüloure. Enou raichoki paopeia rükhai touyu larü süna bütoua puhnou rüpu loure.
Currently Selected:
JEREMIAH 36: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
