JEREMIAH 37
37
Zedekiah nou Jeremiah hinou Akho Souyu
1Babilon hi veo Nebukhadnezzar nou Josiah nahpoutu Zedekiah panou Jehoiakim nahpoutu Jehoiakin thaosou Judah hi veo souloure. 2Ana Zedekiah moa puhvei peikho maitao moyuma maikhe maitao nou ahi paopeiyu Mapao vei chipao sü mailia louche more.
3Veo Zedekiah nou Shelemiah nahpoutu Jehukal, ae Maaseiah nahpoutu napao Zephaniah ye ahi seive tyahrü donou Etao Ramai Mapao hinou veachi paopeio tea paoe. 4Süphaki Eye hukhaki hi thoumo hie, südonou Enou lahdo soua maikhe mai hi takou takhe-a nou buhie. 5Pharaoh veo vei reihmaitao nou Ejipt hinou tapare touyu ko hai choulouyu phaki, Jerusalem hi reih huloulai tea buyu Babilon maivei reihmaitao sü dakhai tare.
6-7Süthaisü Israel maivei Ramai Mapao nou Zedekiah hi haibüa paopeio tea ahi paoe, “Ejipt maivei reihmaitao nou neye soukhare donou tapare, ana puletao hai lah ki hi dakhai ta-a bailai. 8Süthaisü Babilon mainou dakhaive nuhdu hai nasü reih hulou poloua bailai ae meidei bailai. 9Mapao Enou neletao hisü paopi peiwe, süolouzü Babilon mainou dakhai velai moe tea lah neletaoye lawuso, daiolouzü puletao hai dakhaive vuzülai. 10Hakinou neletao nou Babilon reihmai hrülai jünou reih veiloure touyuma, zhizhu khaitoua puletao vei sahpao hinou dazüa buyu maitao nou tashuloua nuhdu hai nasü meidei laiwulai.”
Jeremiah ye Nülouyu ae Hukhaki hi Thouyu
11Ejipt maivei reihmaitao nou takouyu donou Babilon maivei reihmaitao sü Jerusalem hinou dakhai tare. 12Südonou Enou Jerusalem sü thaokhaiwua avei kihikhamai vei navei khesü pore donou Benjamin teidei hi vetare. 13Ana Enou Benjamin vei Robomü hi velouyu phaki, reihkhao soua buyu peikhomai ali Hananiah tyao, Shelemiah nahpoutu Irijah nou Eye nuchao loure ae haibüa paoe, “Ne hai Babilon mai hinou tutare!”
14Enou chila peie, “Sükumoe, E Babilon mai hinou tuta moe.” Ana Irijah nou achi sü keipei moa Eye nüloua peikho maitao hi savere. 15Puletao nou lekha sholoua Eye dapeio, ae rü-apeio Jonathan ki hinou bekhaio tea kharochi peire, daiolouzü puh ki hai hukhaki souwure. 16Eye dei khevai hinou teithe taoli hai khaipeie.
17Veo Zedekiah nou maiye seive Eye saloue, ae puhnou kheikhei soua puhvei ki hinou ahi noue, “Mapao hinou chipao ali-a buhage?”
Enou chila peie, “Bue! Neye sü Babilon vei veo bah hi peiwulai.” 18Süthaisü Enou Veo Zedekiah hi noue, “Enou ne hi moa nevei peikho maitao hi daimah souwua Eye hukhaki hi thouwe? 19Babilon hi veo nou ne pei hi ae teidei hai hi soureih souloulai moe tea paoyu nevei rachipaola maitao sü daiki bue? 20Oh Puo Veo, Enou paoyu sü keipeio ae Enou khoyu sü zhuvea nou aetou peio. Zhuvea Eye Jonathan vei ki hi seidakhai peiso. Sühi hoyu thaio, E thai-a bailai.”
21Südonou Veo Zedekiah nou kharochi peia Eye veo vei ki hinou bekhaiwure. Nuhdu hi raokhao hamo koute, Eye teithe ali hinou raokhao ali peikoute-a Enou sühinou bue.
Currently Selected:
JEREMIAH 37: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
