JEREMIAH 35
35
Jeremiah ae Rekab Maitao
1Judah hi veo Josiah nahpoutu Jehoiakim nou veo soua buyu teile hi Mapao nou ahi haibüa paoe, 2“Rekab mai ki hi taho puletaoye chakhaio. Süthaisü puletaoye Rathoki vei kide ali hi salou loua zhaoh panou shokhaio.” 3Südonou Enou Rakab vei khü hi mai hrülai — Jaazaniah (puh sü Jeremiah vei nahpoutu kukhe mai alie, ae Habazzinah nahpoutue) alia puh thaihou jürai mai hrülai saloure — 4ae puletaoye Rathoki hi save loure. Enou puletaoye rachipaolawo Igdalia nahpoutu Hanan vei kide hi salou peie. Hai nasü Rathoki hi matsü shoyu peikhowo Shallum nahpoutu Maseiah vei kide pei hinou bue, ae peikhomai kukhe vei kide nghia nou bue. 5Süthaisü Enou Rekab maitao nghoujü hisü zhaoh leekhou ali ae pai khesü popa khaipeie, ae puletao hi paoe, “Zhaoh sholo.”
6Ana puletao nou chila peie, “Etaowo zhaohsho moe. Etao vei puopaoh Rekab nahpoutu Jonadab nou Etao hi ae Etao vei tyaosholea-a panou zhaoh shokhai touso tea kharochi peikhai toue. 7Süpei hinou puhnou Etao hi ki souso moyuma tataso, ae shira shothou touso moa sütao hai hüso tea paopei khaitoue. Puhnou Etaoye nou teidei hai hi teisa nou hrüloure donou shetumai ali büa sahpao hinou hrüa baio tea paopei khaitoue. 8Jonadab nou Etao hi paodou peiyu teitei sü Etao züa soupfüwe. Etao vei hümamai veishi hi Etao, moa Etao vei maipfü nahmai-a panou zhaoh sü sokhai toumoe. 9-10Etao hrüre donou Etao hai ki soubu moe, Etao hai sahpao hinou bua baie, ae Etao hai darkha kipei moa shinamara thoure donou dou hae. Etao vei puopaoh Jonadab nou kharochi peiyu veishi sü Etao nou zükhai toue. 11Ana Babilon hi Veo Nebukhadnezzar nou Etao teidei hi reih hulouyu donou Etao hai Babilon ae Sairia maivei reihmaitao hinou tuvai loure donou Jerusalem hai hi ve hrüa nou bubaie.”
12-13Süthaisü Khoukhoulai Mapao, Israel maivei Ramai nou ahi haibüa Judah ae Jerusalem maitao hi paopeio tea paoe, “Mapao Enou neletao hi paodou peiyu sü polai movu, ae achi kei peilai mowu? 14Rekab nahpoutu Jonadab vei tyaosholea maitao nou zhou koute hai kharochi züa zhaoh sü sokhai toumoe. Ana Enou neletao hio tobai soumoa pao-a nou bue, ae neletao nou achi sü züpei moe. 15Enou avei kilai rachipaolayu maitaoye neletao hi seive koute peie, ae puletao nou neletao hi vah ashi souyu khesü thaowua kaozü nasü soulo tea paopeie. Enou neletao vei puopaoh maitao hi peikhai touyu teidei hi teisa buloure donou puletao nou neletao hi rah kukheye thoso ae puletao vei kuvah souso tea paopi peie. Ana neletao nou achi sü keipei bare ae popei bare. 16Jonadab ae Rekab vei nahmaitao hai puletao vei puopaoh mainou kharochi peiyu züloue, ana neletao louzü achi zübare. 17Südonou chuo Israel maivei Ramai, Khoukhoulai Mapao Enou Judah ae Jerusalem maiye soushi souhawulai tea apaokhai touyu teitei sü soupeilai. Enou haisü daivanou soulai toulouzü neletao nou achi zübare ae Enou neletaoye kuyu phaki, neletao nou Eye chila peibare.”
18Ana Khoukhoulai Mapao, Israel maivei Ramai nou Rekab maitao hisü haibüa paoe, “Neletao vei puopah Jonadab nou neletao hi kharochi peiyu ae paodou peiyu teitei sü neletao nou chi züa soupfü louyu donou, 19Israel maivei Ramai, Khoukhoulai Mapao Enou Rekab vei tounah sü panou hakhai toumoa teisa anghoujü nou pa avei kuvah sü soukou telai.”
Currently Selected:
JEREMIAH 35: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
