CHIKUAPEI MAITAO 21
21
Shokhai toua buyu Benjamin Maitaoye Khailu peiyu
1Israel maisou nou Mizpah hinou ve Mapao nghoujü nou haibüa chaachou souwure, “Etao mai tarali noua Benjamin maiye Etao nah naotumai panou nalai moe.” 2Ae Israel mainou Bethel hi ve shusoua kra-a Ramai nghoujü nou teimaiyu koute bue. 3Alia puletao haibüa veachi paoe, “Oh Ramai Mapao, daisounou haibüa zhou Etao Israel maiye panou khü ali hatawe?”
4Thainaisho shona sü Israel maisou nou kushuzhi loua buh sühinou rathobu ali souloure, ae mei deia rathoe alia sava-a hrüre donou Ramai ye posheela peie. 5Alia Israel mainou noue, “Israel mai khü teitei nou Mapao zhih hinou Mizpah hi vejüyu hisü thao mainou velou moe?” Daiolouzü puletao nou Mizpah hi ve Mapao nghoujü veloumo maiye sü southawulai tea khoushoa chaachou souwure. 6Ana Israel maitao nou puletao thaihou-jürai soua buyu Benjamin khüye ngaoloua zhuvea loure alia haibüa paoe, “Zhou teithe Israel mai hrohinou khü ali hatare. 7Shokhai toua buyu Benjamin maitao vei khapfü phoupeire donou Etao daisouyu nou veilaige? Daiolouzü Etao nou Mapao nghoujü nou puletaoye hasoukilia Etao nahmaiye peilai moe tea chaachou souwure.”
8Puletao nou “Israel mai hrohinou thaomai nou Mizpah hi Mapao nghoujü velou jüyu hisü velou moe?” tea nouyu phaki, Jabish-gilead hinou hrüyu mai ali koute-a veloumoyu sü phoupa loure. 9Daiolouzü puletao nou mai zhih kuyu phaki Jabesh-gilead hinou hrüyu mai aliro hare. 10Südonou Israel maisou nou khuvei shoyu reihmai thekiahai (12,000) dopaloua haibüa kharochi peia seitawure, “Taho Jabesh-gilead hinou hrüyu mai hrülaiye nahpfümai ae nahmaitou noupu loua southa khaiwo. 11Neletao nou haibüa soulai: Puotumai hrülai ae poutumaiye sazüwure touyu naotumai hrülai sü southa khai touwo.” 12Puletao nou Jabesh-gilead mai hrohinou sheesha touyu poutumaiye sazükhai moyu loumainah kaihdai hai ngaoloue. Südonou puletao nou homaitaoye sü Kanaan teidei hi buyu Shiloh nuhdu hisü save khaiwure.
13Süthaisü Israel maisou vejüa buyu hinou Rimmon chuhlya hinou tutsüa buyu Benjamin maitao hisü soureih soumoa kaona-a bailaire tea chi paota peie. 14Tutsüa buyu Benjamin maitao nou ko süna süloukhaie ki hi dakhai vere, alia Israel maitao nou puletaoye donou Jabesh-gilead hinou southa moa save khaitouyu loumainah taosü puletaoye peie, ana puletaoye donou chemore.
15Israel mainou Benjamin khüye ngaoloua zhuveare, daiolouzü Mapao nou Israel mai khütaoye panou chavei-a bulou hore donou soupeiwure. 16Südonou vejüa buyu hinou süthai-apei maitao nou paoe, “Benjamin khü hisü naotumai hare. Maipfü ngaolou moa buyu maitao donou Etao daisoulai? 17Israel mai hrohinou Benjamin khüye panou tyakayuo kaomo hie. Puletaoye panou hriloure donou Etao ludu ali phouyu tare. 18Ana Etao nahmaiye panou puletao ki velou shie, daiolouzü Israel mainou haibüa chaachou souwure, ‘Mai taralia Eletao nahmaiye Benjamin mai ki khailouzü puhye panou chaa pfütheo.’ ”
19Süthaisü puletao nou paoe, “Potei ali hi Mapao vei nüh Shiloh hinou nüyu teile nasü nghikoure.” (Shiloh hai Bethel reilova nou bue, Lebonah khekou nou bue, ae Bethel alia Shekem ko hi ludu buyu teinghi palova nou bue.) 20Puletao nou Benjamin maitaoye haibüa paodou peie, “Darkha kipei hinou tutsüa dalo, 21alia zhutou toulo; Shiloh hinou veyu loumainah taonou asah soua dosouyu phaki, neletao nou tuchüa buyu darkha peida hinou paloua neletao chapfü soure donou chekhei nülo alia Benjamin khü vei teidei hisü saho khailoua nalo. 22Alia homaitao puomai moa proumai nou neletao hi ve raroua paolouzü, haibüa paolo, ‘Zhuvea Etaoye panou naloua baio, daiolouzü Etao nou puletaoye maipfü soure donou soureih hinou nülou moe, moa neletao nou puletaoye Etao hi pei moe, südonou neletao nou chaachou soukhai touyu nasü neletao nou souphe moe.’ ”
23Benjamin maitao nou haibüa souloue. Loumainahtao nou Shiloh hi ve asah soua dosouyu hinou puletao mai alili nou loumainah chekhei sü puletao vei maipfü panou soure donou nüloure, alia save puletao vei teidei hi khailoua puletao vei nuh khesü soushupu loua sühinou hrüre. 24Süphaki Israel mai kukhetao-a buh sühinou tarapoa lahkuku vei khü, kihikha, ae teidei hisü vetare.
25Süteile phaki Israel mai hai veo mai hae, mai alili hai lanou sounü nasü soua baie.
Currently Selected:
CHIKUAPEI MAITAO 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
