CHIKUAPEI MAITAO 20
20
Israel Mainou Reih Soure donou Soudayu
1Süthaisü Israel mai hrülai nou reilova buyu Dan teidei hinou poa teibeikou buyu Beersheba koute, ae teinghi palova buyu Gilead teidei teitei noupu loua Mapao nghoujü hinou tave me ali souloua Mizpah hinou jüloure. 2Israel mai khü teitei hinou süthai-apei mai hrülai hai Ramai vei maitao ve jüyu hisü veloue, alia deiphi hinou tayu reihmai the kaihdai (400,000) hai velou jüloue. 3Israel mai hrülai nou Mizpah hinou ve jüloure touyu ko sü Benjamin mainou chouloure.
Ae Israel mainou “Daipha soua haibüyu vah ashi sü vepare?” tea noue. 4Southa khaitouyu naotupai khapu, Levi puona nou paoe, “Benjamin maivei nuhdu Gibeah hi E ae akhapfü koa kheili ve chaolai tea ve-e. 5Gibeah nuhdu hi mainou khei nou ve Eye southalai tea Enou buyu ki nasü ve sühao loure, ana Eye southalou moa akhapfüye nüloua kheimathe sabu-sazü peiwure alia süvanou honapai sü thaire. 6Enou akhapfü thaiphao sü poloua souvava nou daode loua Israel mai khü teitei hisü souva chekhi seita peie, daiolouzü puletao nou haibüa vah ashi souyu hai Etao Israel mai hrülai hi soupeia baie. 7Neletao mai hrülai nou Israel mai baie, südonou Gibeah mai hi kabülai touyu sü zhou hai hinou phaloua paopeio.”
8Mai hrülai nou paila ali soua paoe, “Etao mai taralia la sahpao hi moa ki hi dakhai velai moe. 9Ana Eletao Gibeah mai hi haibüa soulai: Etao nou pou souloua reih huloulai. 10Etao Israel mai khü teitei nou mai kaihli hinou mai kirou ae mai theli hinou mai kaihli hai panou soureih soumai vei touso pfülalai, alia mai kukhetaoye panou Gibeah hi hrüyu Benjamin khüye puletao nou Israel mai hi haonghu vah souyu donou puletaoye reih soure donou talai.” 11Südonou Israel mai hrülai nou le alikhei souloua Gibeah nuhdu napei hisü soureih soure donou laloure.
12Israel maisou nou Benjamin mai khü hisü haibüa panou ko pomaiye paotae, “Daivanou haibüyu haonghu vah sü neletao nou souwe? 13Südonou chuo neletao nou Gibeah nuhdu hinou hrüyu mai ashi taosü phoupaloua Etaoye panou southawo, sübüa Israel mai hrohinou ashi buyu khesü sousheewulai.” Ana Benjamin mainou puletao thaihou-jürai Israel mainou paoyu sü keipei bare. 14Benjamin maivei teidei hinou hrüyu mai hrülaiye sü kuve Gibeah nuhdu hinou jüloua Israel maiye reih soure donou souda-a bure. 15Süzhou teithe Benjamin khü nou soureih soure donou velou jülouyu hai mai the kairou (26,000) velou jüloue, süsü Gibeah nuhdu hinou soureih souvei kayu mai kaihnaitao loumo hie. 16Mai sütao hrohinou mai kaihnai lihai nalova maie, ae puletao hai peishupo ali koute-a veimosoua kalou süyu lou poveih shoyu mai khaitoue. 17Alia Israel mai kukhetao Benjamin khü loumoa soureih soure donou ve jülouyu hai mai the kaihdaie (400,000), mai sütao teitei hai soureih soulousü mai khaitoue.
Benjamin Khü hi Soureih Souyu
18Israel mainou tave Bethel rathobuh hinou “Thao khü nou Benjamin khüye raikaia talou reih soulai?” tea Ramai hinou noue.
Mapao nou “Judah khü nou railai” tea chila peie.
19Süthaisü Israel mainou thainesho sü tapoa kou Gibeah nuhdu nghiyu buh ali hinou fühao souloua bure. 20Israel mainou Benjamin khüye reih soure donou puletao fühao thao-a tare, ae Israel mainou Gibeah nuhdu hi reih huloure donou souda-a buloure. 21Süzhou teithe Benjamin khü nou Gibeah nuhdu hinou tapaloua Israel reihmaiye mai the kaihai (22,000) southa peiwure. 22-23Süthaisü Israel mainou Mapao nghoujü hinou tave kra-a koukhe koute bue, alia Mapao hinou noue, “Etao taho Benjamin khüye reih soupu laiho baibailai?”
Mapao nou chila peie, “Puletaoye taho reih soupulaio.”
Südonou Israel mainou aliliye le souduloua teithe arai nabüa reihmaitao ye sü panou reihbuh tuda loure. 24Israel mainou teithe ahai zhousü Benjamin khüye reih soure donou tare. 25Süzhou teithe-a Benjamin khü nou Gibeah nuhdu hinou tapaloua soureih souveih shoyu Israel maiye mai the kiacha (18,000) sü southawure. 26Süthaisü reih soulai tea tayu Israel mai hrülai nou Bethel hinou khe krare, ae puletao nou Mapao nghoujü nou koukhe koute sü hatoumoa lüa Mapao nghoujü nou maisou vei posheela ae kainüvei pou mei dei-a posheela peie. 27-28Süteile phaki Ramai vei Vo sübvü nasü sühi bue, ae Aaron tyao, Eleazar nahpoutu Phinehas nou sünasü zhua bue. Israel mainou Mapao hi noue, “Etao thaihou-jürai soua buyu Benjamin khüye Etao taho reih soupu laiho bailaige?”
Mapao nou “Taho reih soupuraio, doshowo Enou neletaoye veilouyu sü peilai,” tea paoe.
29Südonou Israel mainou reihmai me aliye panou Gibeah nuhdu pehao hinou tutsüa daloure. 30Süthaisü Israel mainou Benjamin khüye reih soure donou teithe asü zhoua raichoki büa Gibeah nuhdu hi reih huloure donou buh souda loure. 31Benjamin maitao nou reih soure donou nuhdu hinou vakou tapa peikhaie Israel mainou puletaoye ngaopiyu dousouloua tukhaita peikhaie, Benjamin maitao nou puletaoye sü thaingou poa tare. Alia raichoki büa puletao nou Bethel hi tayu ae Gibeah hi tayu ludu adu hisünou Israel maiye mai shirou phali southa peiwure. 32Süthaisü Benjamin mainou paoe, “Raichoki büa puletao jünou Etao nou reih sü veilou süre.”
Ana Israel mainou sübüa puletao nghoujü hinou ngaopiyu dousouloua puletaoye nuhdu hinou sapoa ludu adu hilo satare donou soudawure. 33Israel maivei reihmai me adu nanou thaitsüpoa Baaltamar hi kouyu phaki, Gibeah nuhdu pehao hinou tuchüa da-a nou buyu maitao nou nuhdu hisü talou loure. 34Sühisü Israel mai hrohinou mai thekirou hai dopaloua panou Gibeah nuhdu hi reih huloue, ae reih sü tateishoa soue. Ana Benjamin khü nou puletao hai hakatare teile nghire touyu puletao nou süloumore. 35Mapao nou Israel maiye Benjamin khü jünou reih veilouyu sü peie. Israel mainou süzhou teithe Benjamin maiye mai the kaingoua kaihli (25,100) southa loue. 36Süthaisü Benjamin mainou puletao hai veilou hore touyu sü süloure.
Israel Mainou Kabüa Reih Veiloue Touyu
Israel mai reihme adu nanou Benjamin mai jünou tudakhai tapeie, daiolouzü puletao nou Gibeah nuhdu pehao hinou tutsüa buyu reihmaitaoye louche loure. 37Tutsüa buyu maitao nou thashoa Gibeah nuhdu hisü louloure, ae sühi hrüa buyu mai hrülaiye sü southawure. 38Israel maisou ae tutsüa Gibeah nuhdu pehao hinou dapoa buyu maitao kohisü shee ali soukhai toue, süolouzü nuhdu hinou meikhao khaopare toulouzü, 39Israel maisou nou reidakhai loua reih sü soutalai. Teile süphaki Benjamin mainou Israel maiye mai shirou phali southa pare, ae puletao nou haibüa paoe, “Raichoki büa Etao nou reih veilou süre.” 40Ana nuhdu hinou meikhao sü khaopa khaie, Benjamin maitao nou thailo reidakhai ve zhuyu phaki, puletao vei nuhdu hinou meikhao sü teihi khaokhea ngaoloure. 41Süthaisü Israel mainou reidakhai loua Benjamin maiye dukoure, ae Benjamin maitao hai ngaopi pare, daiolouzü puletao hai hakatare teile sü nghire touyu süloure. 42Südonou puletao nou Israel mai nghoujü nou hiphao lova tudakhai tare, ana puletao nou tutalou hore. Nuhdu meidei-a tapayu maitao ae Israel maisou kohinou puletaoye sü souhawure. 43Israel mainou Benjamin maiye haoloua Nohah hinou Gibeah teinghi palova koute thaihu poa puletaoye southa showure. 44Puletao nou Benjamin maiye mai thekiacha (18,000) southa peie, puletao hai soureih souveiyu mai khaitoue. 45Benjamin mai taoli nou hiphao lova Rimmon chuhlya hisü tutare. Puletaoye thaihu poa ludu hinou Israel mainou mai thengou southa peie, alia puletaoye thaingou poa Gidom hinou kou mai thehai southaloue. 46Süzhou teithe Israel mainou Benjamin maiye southa peiyu hai mai thekaingou-e (25,000), puletao mai hrülai nou soureih souvei shoyu maikhai toue.
47Ana mai kaihrou lihai Rimmon chuhlya hilo vanou tupa loure, ae puletao nou sühinou khouh adai bue. 48Süthaisü Israel mainou dakhai ve Benjamin mai hrülaiye sü kikhaorü noupu loua southa khaiwure, alia puletao vei nuh teitei sü mei deikhai toure.
Currently Selected:
CHIKUAPEI MAITAO 20: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
