RUTH 1
1
Elimelech alia Puhvei Kihikha mainou Moab hi Tayu
1Chikuapei maitao nou nuh khoa buyu phaki, teidei sühisü tokaayu vere, südonou Judah teidei hinou Bethlehem teanou kuyu nuh hi hrüa buyu kihikha maili, puhvei khapfü alia nahpoutu ahai sa-a Moab teidei hisü taho hrütare. 2Puh zhih hai Elimelech toue, alia puh khapfü zhih hai Naomi toue, ae puh nahpoutu ahai zhihsü Mahlon ae Chilion touwe; puh kihikhamai hai Judah teidei Bethlehem nuh hinou Ephrath mai khüe, puletao nou Moab mai teidei hi ve hrüe. 3Anah Noami khapu Elimelech hai thaitare, süthai honapai nou nahpoutu ahai sa-a sühinou hrüa bue. 4Puh hainou Moab maipfüye naloue; maipfü ali zhih hai Orpah toue alia ali napai zhih hai Ruth touwe. Puletao hai po kirou phali koa hrüe, 5Mahlon alia Chilion sü thaitare, süthai Naomi hai nahpoutu ahai sa-a puhvei khapu ha-a hrüe.
Naomi ae Ruth nou Bethlehem hi Dakhai Veyu
6Süthaisü Naomi nou puh vei maitao hai Mapao nou pa thoudzü veishoa chiloushe touyu sülou khaie, puhnou puh mou ahai sa-a Moab teidei thao-a dakhai tare donou soudaloue. 7Südonou honapai nou buyu buh hinou puhvei mou ahai ye sa-a Judah teidei hi dakhai tare donou tashu tare. 8Ana Naomi nou puh mou ahai hisü paoe, “Ne hai lahpfü teidei hi dakhai tabaio, Ne hai nou thai tayu mai hi alia Eye veih shoa zhupeiyu büa, Mapao panou nehai yesü zhuvea peitheo. 9Mapao panou ne haiye sü shanghi soupuloua nou hrüyu soulou theo.”
Süthai Naomi nou puhai yesü mü mupeie, ae puhai nou shusoua krare. 10Alia mouhai nou puh hisü paoe, “Moe, ahaia neye koa ne mai hisü dakhai talai.”
11Ana Naomi nou paoe, “Anahpai haire, nehai dakhai tabaio, daisounou nehai Eye koa talai touwe? E nahpoutu hrüpuloua pa nehaiye napulaihi tea chowu? 12Dakhai ta baio, anah haire, daiolouzü nehaiye khapu phoupeire donou E tsülere. E nou zhou khei nghiloua nahpoutu hrülouyuma, 13nehai puh dupayu kholousü hiwu? Süsü khoa nehai nou nghisha soumoa bulousüo? Moe, anahpai haire, sühai soulouhoe. Nehai ye donou Ae levea shore, daiolouzü Mapao nou ahi aetou moyu bure.”
14Süthaisü puhai nou paichia krapu khaire; alia Orpah nou puh nai yesü mümu peia lah kihi dakhai tare, ana Ruth louzü puhye taotei loua tabare. 15Naomi nou puh hi paoe, “Ruth, ne chi-o lah mai hi dakhai tare alia lah vei rah#1.15 rah; moa ramaitao. hi dakhai tare. Ne-a puhye koa dakhai tabaio.”
16Ana Ruth nou chila peie, “Eye panou neye thaowuso alia ne thaifü moa kihi dakhai tare donou soupeiso; daiolouzü nenou tayu buh hisü E-a talai, alia nenou buyu bu hisü E-a bulai; nevei maitao hai avei mai soulai, alia ne Ramai sü a Ramai soulai; 17Nenou thaiyu buh hisünou E-a thailai, alia sühinou E-a daovulai. Athai moa nou E neye thaowua rata louzü Mapao panou Eye souvea peitheo.”
18Honapai nou Naomi ye sata vuzülai touyu le lahlouyu ngaolou khaie, puhnou chilia paopu more.
19Sübüa nou puh hai nou Bethlehem hi vere donou tare. Puh hai nou Bethlehem hi velouyu phaki nuh hi buyu mai hrülai nou ngaokhu pare alia naotu maitao nou haibüa paore, “Hainapai hai Naomi mowu?”
20Puhnou homaitao hi chila peie, “Eye ‘Naomi’ teanou kuso, ‘Mara’#1.20 naomi...marah: Hebrew maila hi Naomi touyu sü “savayu” alia Marah touyu nou ‘khayu’ paowe. teanou kupeio, daiolouzü Hali-hala soulousüo Puhnou Eye sü khayu peia baie. 21Enou haihi thaowua tayu phaki, phoutao poa tae, anou Mapao nou Eye hazhia panou haihi dakhai ve baie. Ramai Mapao nou ahi veayu alia hakayu peia baie, daisounou Eye ‘Naomi’ teanou kukhai laige?”
22Südonou Naomi nou Moab hinou puh mou, Moab pfüpai Ruth ye koa Bethlehem hi dakhai ve-e. Puh hainou Bethlehem hi veyu phaki, sühi buyu mai hai shithou va tare.
Currently Selected:
RUTH 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.