CHIKUAPEI MAITAO 19
19
Levi Puona ae Puhvei Khapfüpai
1Daoh teile hi Israel mai hai veo ha-a nou hrüe. Süphaki Ephraim maivei deichi thailo vanou hrüa buyu Levi mai ali nou Judah teidei hinou buyu Bethlehem nuh hinou khapfü ali saloue. 2Ana honapai nou puh hi rarouloua puh puo ki Bethlehem nuh hisü dakhai ve tare, ae sühinou ve honapai nou khouh adai phali bue. 3Süthaisü honapai khapu nou honapaiye dakhai ve-a baio tea kure donou tae. Puhnou puhvei kilai mai ae rheisüh ahai saloua tae. Puhnou honapai puo ki hi velou khaie, honapai puo nou puhye asasa-a süloure. 4Puh paoh, naotupai puo nou puhye panou taba-a teithe asü sühinou chaore. Ae sühinou puletao nou koa touso zho-a bue. 5Teithe adai zhousü puhnou shona nou kushuloua talaire tea souda loure, ana puh paoh nou puh hisü paoe, “Ha phoutou lourai nou tawo.”
6Südonou puhai nou chobuloua ha phoutou loure, ae süthaisü naotupai puo nou puh hi paoe, “Zhoukhei hai hinou vashoa chaoloua baio.”
7Levi puona nou lashuloua talaire touyu hinou puh paoh nou puhye tasou baio tea nutei louyu vanou süzhou khei-a sühinou chao-a baire. 8Teithe angou zhousü puhnou shona nou talaire tea kushu loure, ana naotupai puo nou paoe, “Ha phoutou louraio, ae teinghi panou nakou louraio.” Südonou puhai nou hatou loure.
9Levi puona nou puh khapfü ae kilai maiye saloua talaire teanou buyu hinou naotupai puo nou paoe, “Zhukhaio haina, zhou tayu hai nalaire, thashoa tei sü zhilou bailai, südonou zhoukhei hai hinou vashoa chaoloua baio. Dosho shona nou kushu zhiloua ta-a baio.”
10Ana Levi puona sünou süzhou khei sühinou chaonü more. Südonou puhnou kushuloua tare ae Jebus (süolouzü Jerusalem) nghiyu hisü velou loure. Puhye koa puh khapfü ae rheisüh ahai kou soupfüa laie. 11Puletao nou Jebus hi nghia kuyu phaki tei sü zhiloure, südonou kilai puona nou puh paopu hisü paoe, “Khe Etao zhoukhei Jebus mai nuhdu hi talou chaoloua baishe.”
12Ana puh paopu nou puh hi paoe, “Israel mai moyu vakou maivei teidei hi Etao chaolai moe. Tawo daoli tapoa kou Gibeah nuh hisü chao-a bailai.” 13Puhnou puh kilai hi paoe, “She Etao tapoa kou Gibeah moa Ramah nghiyu hinou chao bailai.” 14Südonou puletao nou ludu sü tapu tare alia tapoa kou Benjamin khü nou buyu Gibeah nuhdu nghiyu hi koulouyu phaki, teinghi sü loutare. 15Puletao nou süzhou khei chaore donou Gibeah nuhdu hisü talou loure. Ana puletaoye süzhou khei sheshe peire donou mai aliro puletaoye kumore, südonou puletao nou kijüdu hinou bue.
16Puletao nou kijüdu hinou buyu phaki, tsümai ali hai teizhi loulaire teanou buyu hinou vah souloua dou hinou dakhai ve-e. Mai honapuo hai Ephraim maivei deichi hinou hrüyu nuh mai-e, ana puhsü Gibeah hi ve hrüa bue. Nuh sühi hrüa buyu mai hai Benjamin khüe. 17Puotsü mai nanou nuhdu kijü hinou shejümai buyu ngaolou khaie, puhnou takou puletao hisü noue, “Neletao daiki nou ve-e alia daiki talaie?”
18Levi puona nou puh hi paoe, “Etao hai Judah teidei Bethlehem nuh hinou laie, alia Ephraim deichi vanou buyu Etao nuh hisü talai tea laie. Mai ali noua Etaoye panou chaore donou kumore. 19Ne kilai avei rheisüh panou toure rouvao, Etao nou tousore raokhao ae darkhadzüa lah Etao nou pfülaie.”
20Paohtsü puona nou paoe, “Aki ve chaolo. Neletao nou koyu nataosü Enou peilai, kijü haihi bumoa baishe.” 21Südonou puhnou homaitao ye saloua puh ki hi save loure, ae rheisüh panou pou touloure, alia puletao phi dzü khüpeia panou touso sü touloure.
Gibeah Nuh Mainou Mah Souyu
22Puletao nou vashoa buyu phaki hinou nuh hi mai ashimai taoli nou ve ki sü sühaoloua kikhu sü dakhua shusoua nou paoe, “Ne ki hi ve chaoyu maipou nasü vakou sapa peio, Etao puhye sazülai.”
23Ki paopu nanou vakou paloua homaitao hisü paoe, “Athaihou-jürai maitaore, zhuvea vah haibüyu ashi sü soulai toupeiso! Mai haina sü avei shemaiyu thaifüa vah ashi soupeiso. 24Neletao nou jüpa louzü, haihi mainou sazü khaimoyu anahpai-a bue ae puh khapfüa bue, Enou puhaiye sü sapa peilai, neletao nou sounü nasü puhai hinou souwo, ana maipou haina hi zhuvea vah ashi soupeiso.” 25Ana homaitao nou puh chi sü keipei baire, südonou Levi puona nou puh khapfüye homaitao hi popa peiwure, ae homaitao nou honapaiye sü tei thepamo koute sazü peia tei thepayu thainou puletao nou honapaiye phapeie.
26Tei thepayu phaki honapai nou puh paopu nou buyu kikhu hisü kaokou züa bure. Honapai nou sühinou tei themo koute bue. 27Honapai khapu nou shona kushuloua kikhu nghoupayu phaki, puhnou puh khapfü sü kikhu bomü hinou bah thaipa zha-a buyu sü ngaoloue. 28Puhnou honapai hisü paoe, “Kushulo, Etao talai khe.” Ana honapai nou chila peimore. Süthaisü puhnou honapaiye rheisüh phaova popa khailoua ki hi vere donou tare. 29Puhnou ki hi ve louyu thai, puhnou koutu ali poloua puh khapfüye sü souva kiahai soua daodeloure alia süsü Israel mai khü teitei hisü seita peire. 30Süsü ngaolouyu mai hrülai nou “Haibüyu hai Israel mainou Ejipt teidei hinou tapalouyu nou zhou koute ngaokhai toumo hie, alia pakhai toumo hie. Haihai tsücho khaio, ae chi phaloua paopeio” tea paore.
Currently Selected:
CHIKUAPEI MAITAO 19: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
