CHIKUAPEI MAITAO 18
18
Mikah alia Dan Mai Khü
1Süpha teile hi, Israel mai hai vemai hae. Ae süphaki Dan mai khü hai puletao nou bure buh phoua laie, daiolouzü teile süphaki koute-a Israel mainou teidei sü dezhi loumo hie. 2Südonou Dan mai khü nou puletao hrohinou soulousüyu mai angou dopaloua Zorah ae Eshtaol nuhdu hinou seiho panou teidei sü zhure donou tare. Puletao nou tave Ephraim deichi hinou hrüyu nuh ali hinou Mikah tea kua buyu maipouna ki hisü velou chaoloue. 3Puletao nou Mikah ki hi chao-a buyu phaki, Levi mai ali nou raoyu paikho chouloukhaie, puletao nou puh hisü kouloua “Thaonou neye haihi save peie? Ae ne buh hai hinou daivah soua bue” tea cha-e.
4Puhnou puletao hisü “Mikah nou Eye sa-a panou puh vah souwe alia puhvei napao soua bue” tea chila peie.
5Puletao nou puh hi paoe, “Etao nou ta-a buyu vah nasü veilousü moge touyu zhuvea Ramai hinou noupeio.”
6Napao nanou puletao hisü paoe, “Kaona-a tawo, neletao nou ta-a buyu vah nahisü Ramai nou koa neletaoye salaie.”
7Süthaisü mai angou taonou tapoa Laish nuhdu hisü velou loure. Puletao nou nuhdu sühi hrüa buyu mai hai, Sidon mai büa ngaopiyu lia ha-a vashoa nou kaonaphi tea hrüyu sü ngaoloure. Puletao hai chejüyu ali-a hanou kini nishoa Sidon mai hinou hrosho nou ae mai kukhemaiye sa-a hrümoyu sü puletao nou ngaoloure. 8Puletao mai angou nou Zorah ae Eshtaol nuhdu hi dakhai veyu phaki, sühi hrüa buyu puletao vei thaihou-jürai mainou puletao hisü “Neletao nou taho teidei zhutayu sü kabüwe” tea noue. 9Puletao nou paoe, “Teidei sü veishoa ngaokhai toure, Etao talai khe. Neletao hai hinou halia soumoa bulai hiwu? Thashoa taho teidei nasü poloumo louzü shire. 10Neletao nou nuh sühi velou louzü, nuh sühi hrüa buyu hai maiye lechüyu ha-a ngaolai. Teidei süsü dushoa bue, alia sühisü mai alinou koshoyu na teitei buche-e, ae teidei sünasü Ramai nou neletao bah hi peiwure.”
11Südonou Dan mai khü nou mai kaihrou hai reihna panou tuloua Zorah ae Eshtaol nuhdu sü thaowua tare. 12Puletao nou tave Judah teidei hinou buyu Kiriath Jearim tea kuyu buh hinou fühao souloua chaore. Südonou buh sünasü chukoute hai Mahaneh-dan (Dan maivei fühao buh) tea süwe, süsü Kiriath Jearim teinghi loulova nou bue. 13Buh sühinou puletao nou tapoa Ephraim mai deichi hinou hrüyu Mikah ki hi velou loue. 14Süthaisü Laish nuhdu hi taho reikeih pomai angou taonou puletao samaitao hisü paoe, “Ki haihi vepare zhuyu ephod ali ae shahu nou soukhai touyu bashara bue touyu neletao süho moe? Etao daisouyu nou veilai?” 15Südonou puletao nou Levi puona nou buyu Mikah ki hisü talou “Vei-a buho moe” tea cha-e. 16Dan mai khü hinou reihna tupoa laiyu mai kaihrou taosü kipah nou la-a bue. 17Napao nanou reihna tupoa laiyu maitao ye koa buyu phaki nou raiki reikeih potayu mai angou taonou ki hisü talou vepare zhuyu ephod ae shahu nou soukhai touyu bashara taosü poloure.
18Homaitao nou talou Mikah ki hinou rathoyu natao ae vepare zhuyu ephod nasü polou khaie, napao nanou “Neletao dai souwe” tea noue.
19Puletao nou paoe, “Raoso, khe ne Etao vei puo ae napao souloua baio. Ne kikha ali hinou napao souyu-a veiho Israel mai khü ali vei napao souyu-a veihie?” 20Süthaisü napao nasü asa shore, alia puhnou vepare zhuyu ephod ae bashara taosü poloua puletao ye koa tare.
21Puletao süthaisü puletao vei veidu sü tashupu tare, kikhaorü ae natao panou puletao jünou rai-a ta-e. 22Puletao nou Mikah ki hinou doushoa tayu thainou Mikah nou kinapa maiye kuloua Dan maitaoye thaihu kou phüloure. 23Ae puhnou Dan maitao hisü shusoua cha-e. Dan maitao nou reida khailoua Mikahye “Ne mai haitao ye sa-a daisoulai touwe” tea noue.
24Mikah nou “Enou soukhai touyu basharatao ae napao naye neletao nou sata likhu, ae Eye halia khai peimo likhu, alia ‘Eye daisou touwe’ tea neletao nou nouyu sü daivanoue?”
25Dan maitao nou puh hi paoe, “Etaoye chasou baio, molouzü Etao hrohinou lekha ashi mainou neye daishulai, sükulouzü ne ae ne kikhamai hrülai nou tyaka shulai.” 26Süthaisü Dan maitao hai puletao vei veidu sü tapu tare. Mikah nou puletaoye dulou hore touyu süloukhaie, puhsü la ki hi dakhai tare.
27Dan maitao nou Mikah hinou polouyu basharatao ae napao naye sa-a tave kaona-a hrüyu ae maiye lekhi moa buyu Laish nuhdu hisü velou puletaoye southawure alia nuhdu nasü mei deiwure. 28Nuhdu sühi hrüa buyu maitaoye sü mai linoua vupa peire mai hare, daiolouzü nuhdu süna hai Sidon jünou doushoa buloure alia puletaoye mai linoua soukha peire mai hare. Nuhdu sünasü Beth-Rehob nghia buyu deikho hinou bue. Dan mai khü nou nuhdu sünasü soushupu loua sühinou hrüre. 29Puletao nou Laish nuhdu nasü puletao vei paipaoh mai zhih hinou “Dan” tea sada loure. Puhsü Jakob nahpoutue. 30Dan maitao nou ratho loure donou bashara sü khailoure, alia sühisü Moses tyao, Gershom nahpoutu Jonathan ye panou puletao vei napao soure. Puhvei kityarai maitao nou puletaoye ngaobamai nou nüpoa tamo koute sühinou napao soua bue. 31Mikah vei bashara nasü Shiloh hi rathoki buyu koute sühinou bue.
Currently Selected:
CHIKUAPEI MAITAO 18: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
