CHIKUAPEI MAITAO 17
17
Mikah vei Basharatao
1Ephraim maivei teidei deichi nuh ali hinou hrüyu mai ali bue, puh zhih sü Mikah toue. 2Puhnou puh pfü hi paoe, “Shahu thelia kaihli (1100) ne hinou vaolouyu donou nenou vaomai naye chaa peiyu E-a süe. Pousha sütao ahi bue, Enou süsü poloure.”
Puh pfü nou paoe, “Anahna! Mapao ye panou neye shiha peitheo.” 3Puhnou pousha taosü puh pfü hi dakhai peire, alia puh pfü nou paoe, “Chaa nasü panou anah hi vemore donou pousha taosü Enou Ramai hi shee-a posheela peiwulai, ae sünasü panou poloua bashara ali souloua ne hi dakhai peilai.” 4Südonou puhnou pousha taosü puh pfü hi dakhai peie, alia puh pfü nou shahu kaih-hai poloua shahukumai hisü peire, puhnou shahu sütao poloua bashara soupeire alia süsü poa Mikah ki hi khailoure.
5Mikah hai la puh ki hinou rathobu ali bue. Puhnou bashara ae dai vepalai touyu rako zhuyu Ephod soukhailoua puh nahpoutu aliye panou süsü zhure donou napao soue. 6Süpha teile hi Israel mai hai veo mai ha-e, mai teitei nou lahlah jüpayu sü soua bubaie.
7Sübüa buyu phaki, nahlemai ali Judah teidei hi buyu Bethlehem nuh hinou Levi mai ali nuh sühi vei ve-e. 8Nahle puona nasü Judah teidei Bethlehem nuh thaokhaiwua puhnou hrüre buh phoua laiyu phaki hinou Ephraim deichi vanou buyu nuh Mikah ki hi velou loue. 9Mikah nou puh hi paoe, “Ne buh daikinou ve-e?”
Puhnou Mikah hi paoe, “E Judah teidei Bethlehem nuh hinou veyu Levi mai alie. E daikinou hrülai hai tea buh phoua lai-e.”
10Mikah nou puh hi paoe, “Eye koa bubaio. Neye panou avei paodou-apeio ae napao soulai. Enou neye potei ali hi shahu kirou, sabanü ae touso soupeilai.” 11Levi puona sünou Mikah ye koa bulai tea ae-ao souloure. Ae nahle puona sü puh nahmai ali büa puh hi bure. 12Mikah nou Levi puona ye sü panou napao soua puh ki bure. 13Süthaisü Mikah nou paoe, “Chuo Mapao nou Eye soukha peishu laire, daiolouzü Enou chuo Levi mai aliye panou avei napao souloure.”
Currently Selected:
CHIKUAPEI MAITAO 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
