CHIKUAPEI MAITAO 14
14
Samson alia Timnah vei Loumainah Ali
1Teitheli Samson nou Timnah nuh hi kouyu phaki nuh sühinou puhnou Philistin maipfü ali ngaoe. 2Süthaisü puhnou khe puh pfüpuo hisü paoe, “Enou Philistin maipfüli Timnah nuh hinou ngaoe, honapaiye sü aki noukhai peio.”
3Ana puh pfüpuo nou paoe, “Daisounou ne sheemoyu Philistin maipfüye nalai touwe? Lah Etao khü hi naotumai ali-a ngaolou hodou?”
Ana Samson nou puh puo hi paoe, “Honapaiye aki noukhai peia baio, daiolouzü Enou honapaiye sü jüpa loure.”
4Haibüyu hai Mapao hinou vewe touyu puh pfüpuo nou sümoe, daiolouzü Mapao nou souyu hai Philistin maiye panou kabüa züvei loure ludu phouwe. Süpha teile hi Philistin mainou Israel maiye khasa-a hrüe.
5Südonou Samson nou puh pfüpuo sa-a Timnah nuh hisü kouh tare. Puhnou Timnah hi kouhlai tea darkha kipei tachoyu phaki puhnou kipeikhaodu ali ra-a chou-e. 6Mapao vei rako sü puh hi koulou loua puhnou kipeikhaodu nasü nghitu aliye paikhaoyu büa puh bah nou paikhao peiwure. Ana puhnou daisouwe touyu sü puh pfüpuo hi paomoe.
7Süthaisü puhnou takou naotupaiye sü koa bue, ae puhnou honapaiye sü jüpa loure. 8Teile phazütou thai, puhnou honapaiye sü naloure donou ta-e. Puhnou takouyu phaki, raiki puhnou southa khaitouyu kipeikhaodu nasü zhulai tea kouyu phaki, kipeikhaodu thaiphao hinou voutou sü voudzü bua ngaoloue. 9Puhnou süsü khüloua ludu talikhu toue. Ae puhnou süsü pove puh pfüpuo-a peia panou toue. Ana puhnou voudzü sü kipeikhaodu thaiphao hinou poloue touyu sü puh pfüpuo hi paomoe.
10Akhai vei ae-ao souloure donou puh puo sü naotupai ki hi savere, ae Samson nou sühi nou nühnüa maiye vaie. Haibüa souyu hai nahlemai zhaie. 11Philistin mainou puhye ngaolou khaie, nahlemai shirou sü panou puhye koa bure donou seive peie. 12Samson nou puletao hi paoe, “Enou neletao hisü khadachi ali noulai, süsü daitouwe touyu shinghiyu vei nüh teithe anai levai nou neletao nou süloua paopei louzü, Enou neletaoye veishoyu saba shirou bapeilai. 13Ana süsü neletao nou daitouwe touyu sülou more toulouzü, neletao nou Eye saba shirou peio.”
Puletao nou puh hi paoe, “Nevei khadachi nasü paokhaio.”
14Puhnou puletao hisü paoe,
“Touyu hinou touyuna ali payu;
ae khoushoyu hinou jüyu payu sü daige?”
Puletao nou teithe asü cheyu thai-a khadachi sünasü paolou hore.
15Teithe adai zhousü puletao nou Samson chapfü hisü paoe, “Ne kipou hinou khadachi nasü daitouwe touyu nouloua Etao hi paopeio, sükumolouzü ne puo ki sü ne-a koa loua nou mei deiwulai. Nehai nou Etaoye haihi kupoa veyu hai panou Etaoye hakalai touwu?”
16Südonou Samson chapfü sü kra-a puh hi paoe, “Ne Eye leshi moe, Eye ngaora-a baie. Nenou asamai hi nouyu khadachi nasü daitouwe touyu ahi paomoe.”
Puhnou honapai hisü paoe, “Khadachi sünasü Enou apfüpuo hia paomoe, kabüa ne hisü paokhailai.” 17Honapai nou nühnüyu teithe anai koute kra-a puh hinou nüda nasü daitouwe tea nouloure, südonou teithe anai zhousü puhnou khadachi nasü daitouwe touyu honapai hisü paopeide. Süthaisü honapai nou khadachi nasü daitouwe touyu taho Philistin mai hi paopeie. 18Philistin mainou teithe anai zhou teinghi loumo jünou tave Samson hi paoe,
“Voudzü jünou jüveiyu dai bue?
Dainou kipeikhaodu jünou khoupuyu bue?”
Samson nou puletao hi paoe,
“Neletao nou acho ye sa-a tata molouzü Neletao nou avei khadachi nasü sülou laimoe.”
19Süthaibü Mapao vei rako puh hi louloua puhnou taho Ashkelon nuhdu hinou mai shirou southa loue alia puletao vei sabanü sü poloua pove puhvei khadachi paolouyu maitaoye saba chekhi bapeie. Puh sü rarou shoa puh puo ki hi dakhai tare. 20Alia puh chapfüye sü puh paoh nou puh samai hi peiwure.
Currently Selected:
CHIKUAPEI MAITAO 14: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
