CHIKUAPEI MAITAO 13
13
Samson ye Nalouyu
1Israel mainou Mapao nghoujü nou vah ashi sü soupu takhaire, südonou Mapao nou puletaoye sü Philistin mai bah hinou po raidai panou hrüe.
2Zorah teidei hinou hrüyu Dan maipuoli Manoah tea bue. Puh chapfü hai nahapfü ali soua nahmai ali-a hrüpei moe. 3Mapao vei rakivamai ali nou naotupai hisü ve zhungaoloua paoe, “Zhukhaio, ne nahapfü ali soua nahmai hae, ana chuo ne nahmai hrüloulai, alia nahpoutu ali naloulai. 4Südonou chuo ne soutaosou reihlo, zhaoh solai moe ae sheemoyu touso toulai moe. 5Nenou nahtou nasü nalouyu thai, puh pei bikhai toulai moe, daiolouzü nahpoutu naye nalouyu teithe hinou Ramai bah hi thaothoua panou Nazir mai#13.5 Nazir mai: Nazir mai touyu hai kabüyu mai paowe toulouzü, puletao hai zhaoh solai moe, moa rashidzüa kelai moe, pei bilai moe, moyuma thaiphao sü deilai moe tea chaachou soua puletao vei hrümamai teitei nou Ramai hi peiwulai tea chaachou soukhai touyu mainou paowe (Mai 6.1-8 hia zhuo). ali soutalai; alia puhnou Israel maiye Philistin mai bah hinou khailupa peilai.”
6Süthaisü naotupai nou taho puh cha hisü paoe, “Ramai vei mai ali ahi ve-e, puh zhu hai rakivamai büa ngaopi shoe. Puh daiki nou vewe touyu Enou noulou more, alia puh zhih-a ahi paopei moe. 7Ana puhnou ahi paoe, ‘Zhukhaio, ne nahmai hrüloulai, alia nahpoutu ali naloulai. Südonou ne soutaosou reihlo, zhaoh solai moe, ae sheemoyu touso toulai moe, daiolouzü nahtouye nalouyu teithe hinou Ramai bah hi thaothoua panou Nazir mai ali soutalai.’ ”
8Süthaisü Manoah nou Mapao hi veachi paoe, “Oh Mapao, E ne hi veachi paoe, nenou achapfü hi seiveyu mai nasü seivepu peiraio, panou kabüa nalaiyu nahtou nasü kiko loulai touyu sü paodoupu peilaio.”
9Ramai nou Manoah nou khoyu paisü noupeie, ae rakivamai nasü naotupai nou dou hinou chaobu phakinou vepue, ana honapai cha Manoah sü honapaiye koa bumoe. 10Südonou honapai nou tuve puh cha hisü paoe, “Raiki ahi veyu mai nasü chua vepu khaire.”
11Manoah nou kushuloua puh chapfü thaifü tare, alia veyu mai nahi sü paoe, “Naotupaiye chayu nasü newu?”
Puhnou chila peie, “Oungai, Enou-e.”
12Süthaisü Manoah nou paoe, “Ne chipao thaifüa nahtou nalouzü, nahtou nasü kabüa panou hrülai, ae puhnou daisoulai?”
13 Mapao vei rakivamai nanou Manoah hi paoe, “Enou ne chapfü hi paopei khaitouyu teitei sü panou soutaosou soutoulo. 14Honapai panou darkhabe hinou payu hataralia panou touso, moa honapaiye panou zhaoh shoso, sheemoyu touso toulai moe, alia Enou honapai hi paopeiyu teitei sü panou soulo.”
15Manoah nou Mapao vei rakivamai na hisü paoe, “Zhuvea tapei souraio, Enou neye donou nghitu ali dathaloua khopeilai.”
16 Mapao vei rakivamai nanou paoe, “Nenou Eye nuchao khaitouyuma Enou nevei touso sü toulai moe. Ana nenou soupeilai toulouzü, süsü mei deiloua Mapao ye posheela peio.” (Manoah nou puh hai Mapao vei rakivamai-e touyu sülou moe.)
17Manoah nou Mapao vei rakivamai na hi paoe, “Ne zhih thaotouwe? Nenou paokhai touyu navei chipao taosü vete loure toulouzü, Enou neye tsükhou loure donou ne zhih paopeio.”
18 Mapao vei rakivamai nanou paoe, “Ne daisounou azhih sü nouwe? Azhih sü khupayu zhih-e.”
19Südonou Manoah nou nghitu ae thou daotou poloua khupa souyu Mapao ye chuh nou soukhai touyu sheelabu hinou posheela peiwure. 20Sheelabu hinou meikhao sü raki hi khaokheyu phaki, Mapao vei rakivamai nasü Manoah ae puh chapfü nou zhua bukinou meikhao hisü louloua raki hi khetare; ae puhai nou deiphi pei pfüa nakou khurüe. 21Mapao vei rakivamai nanou Manoah ae puh chapfü hisü vepu more. Süthai nou Manoah nou puh hai Mapao vei rakivamai-e touyu süloue.
22Manoah nou puh chapfü hisü paoe, “Ahai thaivuzü baishulai, daiolouzü ahai nou Ramai ye ngaowure.”
23Ana puh chapfü nou puh hi paoe, “Mapao nou ahaiye southalai toulouzü, puhnou ahai vei posheelayu nasü popei laimoe, moa haibüa ahai hi paoyu chi khesü paolai moe.”
24Naotupai nou nahpoutu ali naloure, alia puh zhih sü Samson tea saloure; ae nahtou nasü vipa loure, alia Mapao nou shiha peie. 25Puhnou Zorah ae Eshtaol kohi buyu Mahanehdan nuh hinou buyu kinou Mapao vei rako nou puhye sü soukhou peitare.
Currently Selected:
CHIKUAPEI MAITAO 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
