CHIKUAPEI MAITAO 15
15
1Phajütou thai, southou vayu teile phaki, Samson nou puh chapfü hi holai tea nghitu ali nüpoa tae, ae puhnou puh paoh hi ve paoe, “Eye panou achapfü kide hisü louwo.”
Ana honapai puo nou puhye sü panou loubare. 2Honapai puo nou puh hisü paoe, “Ne honapaiye jüpa moyu phare tea Enou choloua puhye sü ne samai hi peiwure. Honapai jünou puh thaihou napai-a hüveipu hie, südonou honapai nou naloua baio.”
3Samson nou puletao hi paoe, “Zhouvuo Enou Philistin mai hi vah ashi souyuma amah hadao!” 4Südonou Samson nou taho lakhao kaihsü nüloure alia lakhao ahaihai nou mi sü soucholoua sühi mei taoloua khaipeire. 5Mei saoloua khaitouyu lakhaotaoye sü puhnou Philistin maivei dou hi phapeia panou vajü khaitouyu routhou ae dou hinou valou moa buyu routhou alia oliv kipei ae darkha peida teitei sü deiwure. 6Süthaisü Philistin mainou “Thaonou haibüa souwe” tea noutare. Puletao nou haisü Samson nou souwe, daivanou toulouzü puh paoh nou puh chapfüye puh samai ali hi peiyu vanou-e tea süloure. Südonou Philistin mainou tave honapai ae honapai puo ki noupu koa mei nou deithawure.
7Samson nou puletao hi paoe, “Neletao nou haibüa soulai toulouzü, E neletao hisü khüphou vuzülai, khü phouloumo koute E baikhai toulai moe.” 8Puhnou rarou sholoua maitaoli southawure. Süthaisü puhnou taho Etam teidei hinou lyaqulu ali hi butare.
Samson nou Philistin Maiye Pahda Peiyu
9Süthaisü Philistin mainou Judah teidei hinou fühao souloua buloure, alia Lehi nuhdu hisü reih souloue. 10Judah mainou puletao hisü noue, “Neletao daisounou Eh pei hi reih hulouwe?”
Puletao nou chila peie, “Etao Samsonye nüloulai tea reih hulouwe, puhnou Etao hi soupeiyu büa Etao-a puhye soupeilai.” 11Südonou Judah hi mai thesü nou taho Etam hi Samson nou buyu lyaqulu na hisü veloua puh hi paoe, “Philistin mainou Ehye tukhasa-a bue touyu ne sümovu? Ne daisounou haibüa vah souwe?”
Puhnou puletao hisü paoe, “Puletao nou ahi soupeiyu büa E-a puletao hi soupeia baie.”
12Puletao nou puh hi paoe, “Etao neye rainou phuloua Philistin mai hi peire donou vewe.”
Samson nou puletao hi paoe, “Neletao lah Eye southalai moe touyu ahi paohpeio.”
13Puletao nou puh hi paoe, “Nenou paoyu sü aetoue, Etao neye rainou phuloua puletao bah hi thoupeia bailai, Etao neye southalai moe.” Südonou puletao nou rai ashu ahai nou puhye phuloua lyaqulu hinou sapa loure.
14Puhye sa-a Lehi nuhdu hi kouyu phaki Philistin mainou shusoua puh hi tukoue. Süpha teilebü hinou Mapao vei rako nou puh hi louloua puhye phukhai touyu rai sü meidei khaitouyu rai büa puhnou tyade paloure. 15Süthaisü puhnou rheisüh khourao ali poloua sünanou mai theli dathaloue. 16Südonou Samson nou haibüa lousoue,
“Rheisüh khourao ali nou poa Enou mai theli southaloue;
Rheisüh khourao ali nou poa Enou puletaoye dathathou khotao khaipeie.”
17Puhnou haibüa paocheyu thai, rheisüh khourao nasü khilaiwure. Füdei sünasü Ramath Lehi#15.17 Ramath Lehi: Haina vei artha hai “Khourao Deichi” tiwe. tea sapeie.
18Süthaisü Samson hai reisho loure, südonou puhnou Mapao hi paoe, “Nenou haibüa ne kilai Eye veilouyu peie; ana chuo Eye panou haibüa reithawu laiwu, ae sheemoyu Philistin maiye panou nüloua bailaiwu?” 19Süthaisü Ramai nou Lehi deithou ali hinou dzü sü panou küpa peie. Samson nou dzü sü ke louyu thai puh khouko sü ngaopu loue. Südonou dzüla süna zhih sü En-hakkore#15.19 En-hakkore: Hebrew maila hinou ko haina hai “Khoyu Dzüla” touwe. tea sapeie. Haihai chukoute-a Lehi hi bue. 20Philistin mainou Israel maiye khasa-a hrüyu teile phaki, Samson nou Israel maiye po kai hai khosa-a hrüpeie.
Currently Selected:
CHIKUAPEI MAITAO 15: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
