ISAIAH 39
39
Babilon hinou Kopomai Veyu
(2 Vem 20.12-19)
1Teile süphaki Babilon hi veo Baladan nahpoutu Merodak-Baladan nou veo Hezekiah hisü kopomai panou seiko ae sapeina khesü pove peie, daiolouzü puhnou Hezekiah hai sounou soua buyu hinou veiloure touyu sü choue. 2Veo Hezekiah nou puletaoye sü süloua sheshepeie alia puhnou puletao hisü puhvei kini khaiyu ki hi buyu nangi teitei sü ngaoe— sana, shahu, mutei shoyu theadzü khe, kaivei poutao, alia reih basei teitei sü ngaoe. Kini khaiyu ki hi buyu ae vedei hi buyu na matsü teitei sü puletao hi ngaokhai touwure. 3Süthaisü rachipaolaowo Isaiah nou veo Hezekaih hi ve paoe, “Puletao hai daiki nou ve-e ae puletao nou daichi paowe?”
Hezekiah nou chila paie, “Puletao hai ka doushoa buyu Babilon hinou ve-e.”
4Isaiah nou noupue, “Puletao nou veo fühao hai hisü daidai ngaoe?”
“Puletao nou hai hinou buyu na veishi ngaokhai touloure, ngaomoyu halia hare,” tea Hezekiah nou chila peie.
5Süthaisü Isaiah nou Hezekiah hi paoe, “Khoukhoulai Mapao nou haibüa paoe, 6Nevei ki hinou buyu na veishi ne puopaoh nou zhou koute pojü khaitouyu teitei sü Babilon hi potare teithe velai, na ali koute-a shokhai pei laimoe. 7Ne vanou nakouyu nahpoutu kamai-a Babilon hi nüpoa ve jüthoula-a panou veo vei fühao hinou vah soulai.”
8Süthaisü Hezekiah nou Isaiah hi paoe, “Nenou paoyu Mapao vei chipao sü veishore.” Daisou nou toulouzü puhnou haibüa tsücho loure, “Avei teile hiolouzü kaona-a piyu ha-a hrülou süe.”
Currently Selected:
ISAIAH 39: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
