ISAIAH 38
38
Veo Hezekiah Souyu ae Veilouyu
(2 Vem 20.1-11; 2 Puo 32.24-26)
1Teile hai phaki Hezekiah veo sü souloure alia thainore. Rachipaolawo Amoz nahpoutu Isaiah nou puhye ve cha-a haibüa paoe, “Mapao nou haibüa paorae; ne ki sü kaozüsoua tubai khailo, daiolouzü ne hai veilou moa thai bailaire.”
2Süthaisü Hezekiah nou puh pah hai kivolo pfüa reiloua nou veachi paoe; 3“Oh Mapao, Eye licho peikhaio tea ne hi khowe, süolouzü Enou kabüa ne nghoujü nou cheche-a avei tsüle teitei nou peia nevei kuvah sü soupeie, ae nevei nghingao hisü nou aveih vah teitei sü teroupoa soupeie.” Sübüa paowua puh sü leveashoa kra-e.
4Süthaisü Mapao nou Isaiah hi haibüa paoe, 5“Ne taho Hezekiah hi haibüa paopeio: Ne puopaoh David vei Ramai Mapao nou paoe, nenou veachi paoyu sü Enou chouloure, nenou nghidzü kouyu sü Enou ngaore; Enou nevei hümai sü po kiangou thoupu peilai. 6Enou neye alia nuhdu hai nasü Assaria mai bah hinou vupa peilai alia kho peilai.”
21 # 38.21 Phoure 21-22 nahai chime akhai hinou haihi pokhewure (2 Vem 20.6-9 hi zhukhaio). Isaiah nou paoe, “Doushi ali leakho loua chopayu zhime hisü mealo, sübülouzü puh sü veiloua bailai.” 22Süthaisü Hezekiah nou noue, “Enou Mapao vei Rathoki hi tave loulai touyu vei shee sü daie?”
7Isaiah nou paoe, “Mapao nou apaokhai touyu nasü soupeilai touyu Mapao vei shee nasü hai nae: 8Ahaz veo nou soukhai touyu phiheadou hisü nou pa khungu nasü phika kirou thailo dakhai talai.” Südonou khungu sü phika kirou hai thailo dakhai ta-e.
9Hezekaih nou veilouyu thai, puhnou Mapao ye lou sou shoyu hai nasü rüpeie;
10Enou tsü choe,
avei pfüphao veishoa bukinou Esü rata laire,
Avei hümai shokhai touyu taosü thai maivei deiphao hisünou ho hrüta laire.
11Enou cho-e hria buyu mai vei deiphao hisü E hai Mapao ye ngaopulou hore,
alia hrimai ali koute-a ngaokhailai more.
12Zhaokho maivei sahpao ali büa avei buyu buh sü hrakouwure.
Sah doyu mainou sah sü zükhaiyu büa avei hümai sü zükhai peiwure;
Ramai nou avei hrü sü panou akhai soulaire tea Enou tsüchoe.#38.12 Ramai...tea Enou tsüchoe; Hebrew hi sheesha timoe.
13Chipeikhaodu ali nou arao souchayu büa souleyu donou kheimathe sü kra Enou soukha kho-e,
Hea nou polou khei soupeia puhnou avei hümai sü akhai soupei laire tea Enou choe.#38.13 Phoure 13 nahai Hebrew sheesha toumoe.
14Khaitu ae raohou büa Enou ra-e,
alia rahou büa E sü lüe,
Enou rakiva sü zhungere,
Mapao, veahoyu haitao hinou Eye vupa peio.
15Ana Enou daie tea paolaige?
Daiolouzü haikhe teitei sü Mapao nou soua baie.
Ale vealeyu donou Esü zhithoulou hore.
16Oh Mapao, E neye donou hrilai,
neye donou likhei hria bailai;
Eye souvei peio, Eye panou hrilo.#38.16 Phoure 15-16 nahai Hebrew hi sheesha timoe.
17Cheche vuzünou veahoyu haitao teitei sü
Eye panou veiloure donou baie.
Nenou avei hümai hai sü kaoshi-a raobvü hi loure hinou khailupa peie,#38.17 Larübvü ali hi khailupa peie; Hebrew leshi peie.
Nenou avei mahmo teitei khaipeie.
18Daiolouzü athai maivei teidei hisü mailia neye paosholou hoe,
Thaitayu mainou nevei tobai soumoa leshiyu nasü zhipu laimoe.
19Enou chu neye paoshoyu büa hria buyu mainou neye sü paoshoa bue.
Ne hai tobai soumoa leshi peiyu nasüe tea puo khemai nou nahmaitao hisü paodou peiwe.
20 Mapao nou Eye souvei peie,
Etao nou hria bukisa sü Mapao vei ki hinou puhye sü lou sousholai.#38.20 Phoure 21-22 haina ahai hai phoure 6 thaibü hinou bue.
Currently Selected:
ISAIAH 38: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
