ISAIAH 40
40
Ramai vei Maitaoye Sousava Peiyu
(Lk 3.4-6)
1“Amaitaoye souvasa peio,”
tea Eletao Ramai nou paoe. “Puletaoye sousava peio!
2Jerusalem hinou hrüa buyu maitaoye pailako aveih nou keapeio,
ae puletao hisü haibüa paopei khaio,
süolouzü puletao hai teile taoli veaho shore,
anou chuo puletao vei mahmo khesü khaipeiwure.
Enou puletaoye sü mahmo souyu donou soutaosoua tudei peiwure.”
3Pai ali haibüa sha-e,
“Mapao ye donou ludu souda peio,
Etao Ramai ye donou radeiki hisü ludu vapeio.
4Deikaorao teitei sü thouchi khaiwulai,
ae deichi deitao teitei sü souna kouwulai,
alia thou-tao-a buyu dei teitei sü souchiwulai,
ae makhukükou buyu dei khesü souzü khaiwulai.
5Süthaisü Mapao vei khouko ava sü pongao peilai,
ae deiphao mai hrülai nou süsü ngaokhai toulai.
Haisü Mapao masha vuzünou paopawure.”
6Pai ali nou haibüa paoe, “Shusoua shakhaio!”
“Daitoua shalaige?” tea Enou noue.
“Deiphao mai hrütou hai poube büa baie,
ae puletao vei hüveiyu hai poupa ali büa baie.
7 Mapao nou teikhai seive hüshoyu phaki,
poube sü kita-a baiwe, ae poupa sü raita-a baiwe.
Cheche vuzünou maihrütou hai poudai büa baie.
8Poudai khesü kita-a bailai, poupa sü raita-a bailai;
ana Ramai vei chipao sü teisa nou bukou telai.”
9Oh Zion, deichi pei hi taopa loua ko aveih nasü shapao peikhaio,
pai chihsho-a nou shapao peikhaio, ngaopiso.#40.9 Oh Zion, deichi pei hi...ngaopiso!; moa Deichi peimatao hi taopa loua ko aveih nasü Jerusalem hi paopei khaio! Pai chihsho-a nou ko aveih nasü Zion hi shapao peio!
Judah vei nuhdutao hisü paopei khaio,
puletao Ramai hai velaire.
10Khoukhoulai Mapao sü khouko noupu khasa-a hrüre donou velai.
Puhnou khailupa peiyu maitaoye buu pfüve peilai alia puletao paozho khesü khaipeilai.
11Puhnou puhvei maitaoye sü zhaotu khoyu mainou zhaotuye kiko peiyu büa kiko peilai,
ae zhaotu sü puh bah nou pove jüpeilai,
alia zhaotu ke khesü zhutou poa sa-a tapeilai.
Paonada Louhoyu Israel Maivei Ramai
12Thao nou zai hi buyu dzü sü puh bah hi thouloua doulou süe,
ae raki sü puh bah nou doulou süe?
Thaonou dei hi buyu maitao sü pai ali hi thouloua doulou süe,
ae deichi deitao khesü sühdou khao ali hi thou doulou süe?
13Thaonou Mapao ye haibüa soulo tea paolou süe?
Moa puhye thaonou paodou peilou süge?
14Puhnou thaoye koa haibüa soulai tea chi phazhoyu bue,
ae thao hinou puh hai kaozü nasü douloue?
Thaonou puhye hasüyu ae sükulou süyu tsüdo khesü doupeie?
15 Mapao vei nghoujü hio tyahrütao hai hatoulia moe,
dzükhou ali hinou dzü zhaota-ta kouyu büa baie,
alia kadou shoa dzü nou sühao poa buyu nuh teidei ali hai naihü touli büa baie.
16Lebanon hi hrüyu soukhaona veishi hai Ramai ye poa sheela peilou jüe,
moa sühi buyu süü teitei hai poa sheelayu mei deilou jüe.
17Tyahrü hrülai-a puh nghoujü hiolouzü hatou lia moe,
puhye donou puletao hai hazho toulia moe ae sakhai-a buyu büa baie.
18Südonou Ramai ye sü neletao thaoye nou poa nadalai,
moyuma dai nou paonadalai?
19Ramai hai shamara souyu mai nou zhurai ali souloua sünasü sana nou meaho loua ae shahu rai nou souhao khaitouyu bashara ali raimoe.
20Sübüa sana moa shahu nou soulou hoyu#40.20 Phoure 19-20a nahai Hebrew hi sheesha moe. touha maitao nou taralou hoyu süü nou doloua shamara souyu maiye panou zhurai nasü kaodu more donou soukhai toue.
21Neletao haisü sümovu?
Hai nasü soushurai nou neletao hi paopei movu?
Deiphao hai kabüa soushu-e touyu sü neletao sümovu?
22Hai nasü deiphao ae raki pei hinou buyu punou soupeie;
sükhe hinou hrüyu maikhesü chasei ali büa baie.
Puhnou rakiva hai topa haosah ali hapayu büa baie,
ae sahpao ali haokhai touyu büa haoloua baiwe.
23Puhnou veo maitao ae aduso maitaoye sü sounakou hazhotou lia moyu hisü khaipeiwe.
24Puletao hai rashibe shokhai touyu pha somoa buyu büa buhie.
Mapao nou teirü teikhai seiveyu phaki,
puletao hai thaita-a bailai,
alia thouba hüpoa tayu büa puletaoye sü hüpoa ta-a bailai.
25Sheeyu Ramai ye sü neletao thaoye paona dalai?
Mailia puhye raiyu buhae?
26Ne pei pfülashu rateiva sü zhukhaio!
Thaonou teivu khesü buh kukua khaipeie,
ae chokhai khaitoue,
sükhesü alili nou zhih sapeie;
daiolouzü puh hai khouko pfüshoe,
ae khouko bushoyu donou ali koute-a maha moe.
27Oh Israel maitaore, neletao daisounou Mapao hi neletao vei veahoyu sü zhupei moe,
ae kaozü nasü neletao hi soupei moe tea paowe?
28Ne sümo hivu? Ne choumo hivu?
Mapao hai teisa bure Ramai nasüe,
teideiphao sou-apeio nasüe.
Puh sü lelouho moe moyuma veahoyu sü ha-e,
Puhvei tsüdo hai mai lia sülou hoe.
29Puhnou lelouho maiye soukhoupu peiwe,
ae khouko hayu maiye sü pfüchi peiwe.
30Nahlemai koute-a lelouho-a veata bailai alia shaloua kaodu talai.
31Ana Mapao vei vu kholouyu maisü puletao vei pfüchi sü soukhoupu peilai.
Puletao sü leche büa shouh pfüloua zhaoloulai.
Puletao sü tuta loulai ana vealai moe,
puletao hai talai anou holai moe.
Currently Selected:
ISAIAH 40: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
