ISAIAH 37
37
Veo nou Isaiah vei Paodou-apei Khoyu
(2 Vem 19.1-7)
1Hezekiah veo nou ko sü choulou khaie, levea loua puhvei sabanü khesü paiphawure, ae ngulousah baloua Mapao vei Rathoki hisü tare. 2Puhnou veo vei fühao hi peikhowo Eliakim, rü-apeio maitao hi peikhowo Shebna alia tsüsoua buyu napao maitaoye sü panou soukousah banouloua Amoz nahpoutu rachipaolawo Isaiah hisü seive-e. 3Puletao nou puh hisü paoe, “Veo Hezekiah nou haibüa paowe, ‘Zhou teithe hai veahoyu, mainou züpeiyu ae hraongu soupeiyu teithere, nah nare teile hi pfüchi hayu donou nakoulou hoyu büre. 4Assaria veo nou seive-a buyu Rabshakeh nou hria buyu Ramai Mapao ye konüa paoyu chipao khesü nevei Ramai Mapao ye panou choulouyu sü soulo, ae nevei Ramai Mapao nou choulouyu chipao vanou puletaoye sü tudei peiyu sü soushulai. Südonou shokhaitoua buyu etao maitaoye donou veachi paopeio.’ ”
5Hezekiah veo vei kilai maitao nou ve Isaiah hi chipao haitao paopeiyu phaki, 6Isaiah nou puletao hi haibüa chila peie, “Neletao vei paopu hisü paopeio, Mapao nou haibüa paowe: Assaria veo vei kilai nanou Eye paoshia neletaoye paopiyu chi khesü chouloua ngaopiso. 7E vuzünou puh hisü rako ali thoupeilai, sübüa puhye panou dayu ko ali chouloua lahvei ki hisü dakhai talai, ae Enou puhye sü panou lahvei khoche vanou thailai.”
Assaria Mainou Soupipuyu
(2 Vem 19.8-19)
8Süthaisü Rabshakeh hai dakhai tare, ae Assaria hi veo sü Libnah maiye soureih soua bushe touyu ko süloure, alia veo sü Lakhish nuhdu nasü thaokhaiwua tare touyu chouloure. 9Chuo Assaria veo nou Ethopia (Sudan) hi veo Tirhakah nou puh pei hi reih soulai tea tare touyu ko süloure. Puhnou ko hainasü choulou khaie, Judah hi veo Hezekiah hisü haibüa seiko sü seive-e: 10“Nenou louche-a buyu Ramai nou neye panou Jerusalem hai Assaria veo bah hi thoupeilai moe tea paoyu donou pa neye lawuso. 11Nenou süwe, süolouzü Assaria veo nou soushi souhawulai touyu tyadei teitei sü souha khailoua baiwe. Ne abah hinou tupa lousüe tea tsüchovu? 12Avei puopao mainou souha peikhai touyu Gozan, Havan, Rezeph ae Telassar hinou hrüyu Betheden maitaoye puletao vei Ramai nou khailupa peivu? 13Hamath, Arpad, Sepharvaim, Hena, ae Ivvah nuhdutao vei veo maitao sü daiki vetare?”
14Hezekiah nou seiko nasü kopomai na bah hinou poloua phouloure, süthaisü puhnou seiko nasü poloua Rathoki hi pove Mapao vei nghoujü hi khailoua 15haibüa veachi paoe, 16“Khoukhoulai Israel maivei Ramai Mapaowo, shouh pfüa buyu khaona cherubim peivanou vebuh abuo, ne likhei Ramai sü baie, ne likhei deiphao veo mai hrülai pei hi veo baie. Nenou raki ae deiphao sü soupeie. 17Oh Mapao, ne noubei sü pfüa keipeio ae ne nghithou hepa zhupeio. Hria buyu Ramai, neye ngaophou moa nou Senakherib nou paoyu chipao khesü keipei khaio. 18Oh Mapao, Assaria veo nou tyahrü taoli souhawure ae puletao vei teidei sü soushiwure touyu sü cheche-e, 19alia puhnou puletao vei rah khesü meidei laiwure, daiolouzü puletao sü Ramai moe, ana bah nou soukhai touyu süü-chuh baie, südonou puletaoye sü souhawure. 20Südonou chuo, Oh Mapao, Eletao Ramai, puh bah hinou Etaoye khailupa peio, sükulouzü deiphao hi buyu tyahrü hrülai nou ne likhei Ramai sü baie touyu süloulai.”
Isaiah nou Veo hi Chi Paoveyu
(2 Vem 19.20-37)
21Süthaisü Amoz nahpoutu Isaiah nou veo Hezekiah hi Israel maivei Ramai Mapao nou haibüa paoe: “Nenou Assaria hi veo Senakherib donou veachi paoyu sü, 22Mapao nou puh vanou haibüa paoe, ‘Jerusalem nuhdu hinou hrüa buyu maitao nou neye sü ngaora-a kronüa bure. 23Nenou ngaophou moa jünüyu sü thaowe? Nenou paoshiyu nasü thaoge? Nenou ngaophou moyu nasü Israel maivei Sheeyu Ramai-e. 24Nevei kilai maiye panou ve Mapao ye sü konüre,’ alia haibüa nenou paore, ‘Avei rheiluki khesü pfüloua Enou deichi kuyu hisü paloue, Lebanon deichi kukayu hi koute-a taopa loure; Enou sedar süübe kukayu ae haosüübe veikayu khesü viloue, alia vaobvü touchü hi koute-a talou loure. 25Enou vakou maivei teidei hia dzükhao heloua dzü sü ke-e, ae Ejipt teidei hi buyu reidzütao sü avei reihmaitao nou taithe peie.’
26“Haitao teitei sü Enou daoh nou choda khaiwure touyu sü ne sümovu? Enou raichoki nou tsü chodayu khesü chuo panou vepawe. Enou neye panou veisho-a soukhai touyu nuhdu khesü soushi loure khouko peia baie. 27Nuhdu sütao hinou hrüa buyu maikhe sü khouko ha-e, chathai tare ae hraore. Puletao hai dou hi buyu poudai büa baie, alia hiphao vanou poube tsüpa-a buyu khesü dupalou moa bukinou teinghi nou phuthayu büa baie.
28“Nenou kushuyu ae kou buyu, nenou palouyu teitei, alia nenou apei hi rarouyu sü Enou süwe. 29Nenou Eye paoshiyu ae nenou khaophu souyu sü anou hi chouve loure, südonou Enou ne nghou sü vouwulai alia ne mü sü phuloua nenou veyu ludu hisünou neye panou dakhai talai.”
30Süthaisü Isaiah nou veo Hezekiah hi paoe, “Neye donou shee sü haibüa soupeilai; khai ae daoko po hiolouzü lanou paopayu shinamara nou toua bailai, ana thaikou louzü neletao hai taimou thouloua chachi loulai, ae darkhabe sholoua rashithou haitoulai. 31Judah teidei hi thaimoa shokhai toua buyu maitao sü beima veishoa dei hi tsülouloua rashithou alao shipeiyu süübe büa bulai. 32Jerusalem ae Zion Deichi vanou shokhai touyu maitao sü vakou tapalai, daiolouzü Khoukhoulai Mapao nou haibüa panou vepare donou soudawure.
33“Mapao nou Assaria veo donou haibüa paoe: Puhnou nuhdu levai sü talou laimoe, voulouthou ali koute-a kathou laimoe, moa nuhdu nghiki sü reihmai ali koute-a rü pfüa takou laimoe, moa soureih soure donou sahpao ali koute-a soukhai laimoe. 34Puhnou veyu ludu na hinou puh sü dakhai ta-a bailai, nuhdu levai sü talou laimoe, süsü Mapao Enou paoe. 35Daisounou toulouzü avei kathe donou ae Enou avei kilai David hi chaachou souyu donou nuhdu hainasü Enou vupeilai alia khopeilai.”
36 Mapao vei rakivamai nou takou Assaria mainou fühao soua buyu hisünou reihmai 185, 000 southawure. Thainesho shona sü buh sühisü thaiphao khaikho baire. 37Süthaisü Assaria veo Senakherib vei kilai nasü dakhai ve Nineveh hisü chaore. 38Teithe ali puhnou puh rah Nisrokh ye rathoki hinou ratho-a buyu phaki, puh nahpoutu ahai, Adrammelekh ae Sharezer nou puhye sü khoche nou daothawure, ae puhai sü Ararat teidei hi tuve tare. Puh nahpoutu Esarhaddom nou puh thaosü veo kouloure.
Currently Selected:
ISAIAH 37: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
