ISAIAH 28
28
Reilo Vedei hi Hrüyu Maitaoye Tukhayu
1Israel maivei vedei hai daizhou koute vealaisa! Puhvei hüveiyu ae kathe hai vütayu poupa peirü ali zhaoh sozhi-a peikhoyu mai ali nou puh pei hi thou pfüyu büa baie. Puletao vei khaophu souyu sü pei hi kainüvei theadzü napfüa laiyu büe, ana sozhitei touyu mai ali nou kou dazü tayu büa sühi sünou kou zütare. 2Mapao nou khouko bushoyu mai aliye panou teikhai teirü ashi veyu büa reithou kouyu büa ae dzüdu nou ve soushiyu büa puletao teidei sü soushire donou soudawure. 3Touzhi sozhia buyu süthai-apei maitao vei khaophu sü phinou taidei khaiwulai. 4Khaophu souyu süthai-apei maitao vei kathe sü houki doushi meipa raikayu taosü mainou ngaolou khaie haitouha louyu büa bailai.
5Velaiyu teithe hisü Khoukhoulai Mapao nou puhvei shokhai touyu maitao hisü veishoyu vepeirü ae hüvei shoyu poupatou kulai. 6Puhnou chilou kuyu maitao hisü kaozü soulou süyu tsüdo peilai, ae reihkhaomai hisü khuvei ae khouko sü thoupeilai.
Isaiah ae Judah hi Zhaoh Sozhi-a buyu Rachipaola-apei Maitao
7Rachipaola-apei maitao ae napao maitao koute-a zhaoh sozhi poa chaorara-a baire. Puletao hai zhaoh sobaleyu donou choha-a laire. Ramai nou vepare donou zho ngaopeiyu sü sükulou hore, alia napao maitao-a kaozü hinou chidei soupeilou more. 8Puletao nou buyu buh teitei hisü rüpa phoutsü khaiwure, sheeyu buh ali-a hare.
9Puletao nou Eye paoshiwe, alia haibüa paoe, “Puhnou thaoye doupeilai touwe, ae thao hi ko sü paongao peilai touwe? Süsü naokhokhai touyu nahmaitou ali donou vei-a baie. 10Puhnou Etaoye larücha alili nou, lu alili nou, ae daodao tinou doupeilai tea tewe.”
11Neletao nou achi keipei ba louzü, Mapao ye panou la kukhe rao-a buyu vakou maiye panou neletaoye doupeilai. 12Ramai nou neletao veahoyu mai hrülaiye panou bu-so loure donou soupeie, ana puletao nou puh paisü keipei bare. 13Südonou Mapao nou neletaoye sü larüchah alili nou, lu alili nou, ae chichi nou doupei laire. Süthaisü neletao hai phika kapayu chüsü phisü loulai. Neletao hai zhizhu loulai, rüh hinou muloulai, alia hukhamai soua nüpoa talai.
Zion donou Kainghou hi Thoure Beikhei Chuh
14Südonou sükhokho soua Jerusalem khasa-a hrüa buyu maitaore, Mapao vei chipao sü keilo. 15Neletao hai khaophu soua bure, daiolouzü neletao hai thaiyu maiye koa vo souwure, ae rabedushaoye koa nou ae-ao soukhaiwure tea nou neletao hai hashi tarali veyuma neletaoye soushi lou hore, daiolouzü neletao hai dayu ae kaozü moyu hinou bailou süre tea bure. 16Chuo, haibüa Khoukhoulai Mapao nou paoe, “Zukhaio, Enou Zion hisü poa beikhei soure donou veishoyu ae khoushoyu chuh ali soukhaitoue. Chuh sünasü pepolou hoyu kainghou chuh soua beikhei hi thoulaie alia chuh sühisü haibüa larücha rükhai touwe, ‘Lüloucheyu maisü pilai moe.’ 17Enou kaozü sünou poa chiho chimoyu doure rai sü soulai alia acheche sünou poa thou-taoyu dou zhulai.”
Kaomoyu baibuh teitei sü reithou nou kou deihawulai, alia dzüdu nou buh sükhe veishi sü phaipoa takhai bailai. 18Süthaisü neletao nou koa athaimaiye vo soukhai touyu sü thaowua bailai, ae neletao nou rabedushao ye koa nou ae-ao soukhai touyu nasü lalou hoa bailai. Veahoyu ae kaozhou ashi sünou neletao jünou veiloua bailai. 19Veahoyu ae choroyu sünou neletao hisü thaokhai tumoa teithetsü ae hea-khei sü velai, alia neletao hi ko paoveyu teitei sü ngaopiyu ko khaikho bailai. 20Neletao hai tsüchi hinou paoyu mai ali büa züphao titouli hinou phi tolujüa ae sahba holoujüa züyu büa bailai. 21Mapao nou Perazim Deichi vanou reih souyu büa soulai, ae Gibeon deikho hinou souyu büa soulai. Puhvei khupayu vah haso khesü puhnou souchekhai toulai.
22Ramai nou soulai tea paopi peiyu khesü konüso, neletao nou ngaophou moa konü louzü haijünou tateipua neletao hisü peilai; daiolouzü teidei teitei nou soushi souhare donou Khoukhoulai Mapao nou lela chewure touyu paisü Enou choure.
Ramai vei Tsüveih
23Enou paoyu paisü keipeio; Enou neletao hi paongaoyu khesü leloua noupeio. 24Tatamai nou taimou thoure donou dou sha koute-a bubaiwu? Puletao nou ke da-a hrü koute-a bubaivu? 25Tatamai nou dou shaloua hrüchi cheyu thainou rachipou (dill) ae deihathou (cumin) daothou movu, ae southou alia shithou hai buh macha soua daothou movu,#28.25 Hebrew hi hai jünou larücha loupu hie, süsü dai paowe touyu sheesha timoe. alia tai-mou kukhe hai-a puhvei dou kainghou kainou ki thoumovu? 26Puhnou puhvei vah haso khesü kabüa soulai touyu sü süwe, daiolouzü Ramai nou puh hisü soutaosou doupeiwure. 27Rachipou (dill) hai süüpo nou poa dacha moe, moa deihathou hai lukiphi nou poa luwu moe, ana rachipou thou ae deihathou hai süü tai tyanou poa da baiwe. 28Raokhao soutoure donou sou saowe, ana mai ali nou thou da-a taikoute moe, puletao nou rheiluki pfüa thou dayuma, thou sü reiphe reipho sasa khaichamoe. 29Tsüdo haitao teitei hai Khoukhoulai Mapao hinou ve-e, ae puhvei tsüdo hai veisho-e.
Currently Selected:
ISAIAH 28: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
