ISAIAH 29
29
Jerusalem Nuhdu Kaodutayu
1Ramai vei posheelabu, David veo nou fühao soua buyu Jerusalem nuhdu hai daizhou koute vealaisa! Po ali moa po ahai sü panou puletaoye khonü ralya soua buwo; 2süthaisü Ramai nou Ariel (Ramai vei posheelabu) nuhdu nasü veahoyu seive peilai, ae nuhdu sühisü kra-a dopfüa bulai, alia posheelabu hi zhe lazü khaitouyu büa nuhdu süna teitei hisü zhe nou phoutao-a homara-a külai. 3David veo büa Ramai nou nuhdu nasü reih hulou haoloulai, alia nuhdu teitei sü soupepo khaiwua poloua bailai. 4Süthaisü puletao hai dei khenou chi paopalai, ae dei nai hrohinou neletao hai pai raopalai. Neletao vei paila sü deikhe hinou maah nou raoyu büa alia neletao vei chipao khesü dei nai hrohinou raomümüyu büa bailai.
5Ana Jerusalem, neye hrai-a buyu vakoumai hrülaiye sü naihü büa hüpoa ta-a bailai, ae zhaipou ashi mai sü teikhai nou hüpoa tayu thouba büa bailai. Lichokhai timoa buyu hinou, thasho-a nou, 6Khoukhoulai Mapao nou nüsüyu ae teisüyu teikhai teirü ashi alia mei nou taopoa ve neletaoye sü khailupa peilai. 7Süthaisü Ramai vei posheelabu (Jerusalem) pei hi soureih souyu tyahrü hrülai ae puletao vei reih basei teitei alia puletao vei reihbuh teitei sü zhiho mekou ae zho ngaoyu büa hata-a bailai. 8Jerusalem pei hi soureih soulai tea buyu tyahrü hrülai sü hou sho-a laiyu mai ali nou zhiho mekou nou hatou-a kaishu hou sho-a buyu bülai moyuma dzü rei sho-a laiyu mai ali nou mekou nou dzü ke-a kaishu reisho-a rukha moa buyu büa bailai.
Paopi Peiyu sü Ngaophou moyu
9Neletao chaome soua vo-a buwo! Neletao lah nghithou soucha loua hangao moa buwo! Neletao zhi-a buwo, ana zhaoh shoyu vanou mo-a! Chaorara-a laiwo, ana zhaoh sozhiyu vanou sousho! 10Daiolouzü Mapao nou neletaoye panou zhitei tare donou rako sü seive peiwure. Rachipaola apei maitao hai maisou vei nghithou souyu pha-e, ana Ramai nou puletao nghithou sü vaoho loure alia vepare zhingaoyu maitao pei sü hongiwure. 11Zho hinou ngaoyu teitei sü neletaoye donou sheesaoka khaitouyu larübüa ali büa bailai. Hai nasü neletao nou larü phoulou süyu mai ali hi pove phoungao khaio tea paoyu phaki, puhnou hainasü phoulou shi-e, daiolouzü hainasü sheesaoka khaiwure tea pao-a bulai. 12Alia neletao nou larü phoulousü moyu mai ali hi pove hainasü phoukhaio tea paolouzü puhsü phoulousü moe tea chila peia bailai.
13 Mapao nou paoe, “Mai haitao hai Eye thowe tea paowe, ana puletao vei tsüle louzü ahinou dousho-a bue. Puletao nou Eye thoyu haiolouzü mai nou doupeiyu zhai hinou soua baie. 14Südonou Enou mai haitao hisü khupayu ae ngaopi shoyu vah khesü soupu peilai hie. Puletao vei sükulou süyu tsü sü souhawulai.”
Haithai donou Areih
15 Mapao hinou kheikhei soua vah soua laiyu maitao alia tutsüa thaonou Etaoye ngaolai ae thaonou Etaoye süloulai tea buyu maitao, neletao hai daizhou koute vealaisa! 16Neletao hai ha teitei nou podadou laikhaiwure! Nailee souyu maipu neye sü nai bai-e tea polaivu? Soukhai touyu na ali sünou sou-apeio hisü, “Nenou Eye soupei moe” tea paolou süvu? Moyuma soukhai touyu na ali sünou sou-apeio hisü, “Ne halia sümoe” tea paolou süvu?
17Haibüa paoyu tsüchi ali bue, süolouzü haithaio vaobvü hinou shinamara thou-a tah daoh toulai, alia tah daothou-a buyu dou khesü vaobvü data-a bailai.
18Haibüyu teile veyu phaki, noubi peyu maikhe nou larübvü hinou rükhai touyu chipao khesü choulai, ae nghithou cha-a teizhitei touyu hinou hrüa buyu maitao sü nghi hrüpa ha ngaoloulai. 19Touha-soha laimai ae nataiyu maikhesü Israel maivei sheeyu Ramai Mapao hinou vasayu sü ngaopuloulai. 20Mai ashi maisü hatalai ae khaophu souyu mai vei teile sü akhai soua bailai. Mahmo vah ashi soulai tea buyu maikhesü souha bailai. 21Maiye da-a nou soumah peiyu maitao, mahmo souyu maiye phaobo peiyu maitao alia acheche maivei zü panou ngaolou moa porei laiyu maikhesü Ramai nou souhawulai.
22Südonou chuo Israel maivei Ramai, Abraham ye khailupa apeio Mapao nou paoe, “Avei maitaoye panou veahoyu sü ngaopu laimoe, alia puletaoye panou hraoyu daopu laimoe. 23Daiolouzü puletao hi Enou peiyu thoudzü khesü ngaolouyu phaki, E hai sheeyu Israel maivei Ramai-e touyu puletao nou süloulai. Süthaisü puletao nou Eye khuhraolai ae Eye tsükhoua hrülai. 24Alia chaochao soua voa laiyu maikhe sü tsü pfüloulai, ae chorosoua nolealeayu maitao-a doupeiyu khesü poloulai.”
Currently Selected:
ISAIAH 29: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
