ISAIAH 27
27
1Süzhou teithe sü Mapao nou puhvei veihshoyu khoche sünou poa Leviathan zhaoyu ae dakou dakheyu nghoudu nasü daotha peilai, alia zaidu hinou buyu khaona nasü southawulai.
2Süzhou teithe Mapao nou puhvei veishoa buyu darkha kipei vanou haibüa paolai, 3“Enou reihkhao soua kipei hainasü khowe, teisa Enou hainasü dzü zükou tewe. Mai taralia panou hainasü soushi more donou Enou hea-khei kho-a bue. 4E kipei süna donou raroupu more, sühi poube, shube ae haoro paitya sousheere buyu phaki, Enou sousheeloua meidei laiwe. 5Ana avei maitaoye ngaoba-a buyu maitao-a Enou vupeiyu sü jüpawe toulouzü, puletao-a panou Eye chaveilo, puletao-a Eye panou lathao-a bulo.”
6Vere teithe hiolouzü, Jakob vei tyaosholea, Israel maitao hai beima tsülou loulai, ae puletao hai veishoa nou duso paloua pah palai, alia deiphao teitei sü puhvei rashithou nou phoutaolai.
7Israel maiye Mapao nou puletaoye ngaobayu mai büa souvea moe, moa puletaoye ngaobayu maiye southayu büa southa moe. 8Mapao nou puhvei maitaoye hukhamai soua panou vakou nüpota-a souvea peie. Puhnou puletaoye sü teinghi palova teikhai ashi alinou pa hüpoa tare.#27.8 Phoure 8 nahai Hebrew hi sheesha moe. 9Ana Israel maivei mah khesü puletao nou haibüa soulouzü khaipeilai, ae puletao vei mahmo khaipeiyu rashithou meichekho-a buyu shee sü haibülai: ra kukheye thoyu buh ae chuhsho khesü naika souphoyu büa soupe souposasa khaiwuo, ae Ashera rapfüpai vei zhurai soukhai touyu basharatao, moyuma kainüvei poa meideiyu posheela buh teitei panou ali-a bumoa souhakhai toulai.
10Veihshoa chuh nou khohao khaitouyu nuhdu nasü mai vei paila choukhailai more, mai hrümoa thaovyua rekou büa bubailai. Sühisü choha (kikhaorü) nou pou touyu buh ae dazüyu buh souwulai. 11Süübo khesü kita chata-a bailai, alia naotumai nou süü sükhesü poloua mei deilai. Daiolouzü maikhe mai hai sükulou süyu tsüdo sü hare, südonou puletaoye Sou-apeio nou puletaoye zhuveayu sü bulai more, ae puletaoye leshi-jüpayu sü ngaopei laimoe.
12Süzhou teithe sü Mapao nou puhvei maitaoye sü Euphratis rei hinou Ejipt maivei deirai hi koute hai thou cheyu mainou vuyu büa mai alili nou dopaloulai.
13Süzhou teithe sü shabe houpoa Assaria teidei hi ho hrütayu maitao ae Ejipt teidei hinou ho hrütayu maitaoye sü kudakhai loulai, alia puletao nou sheeyu deichi Jerusalem hinou ve Mapao ye sü tholai.
Currently Selected:
ISAIAH 27: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
