ISAIAH 26
26
Ramai nou Puhvei Maitaoye Veilouyu sü Peilai
1Judah teidei hi haibüa lou soure teithe sü velaire:
Etao vei nuhdu hai khouko bue!
Ramai vuzünou kivo soukhai touyu büa kho peilai.
2Robomü sü houpeio sübüa chilee cheche-a buyu tyahrü nasü panou loulo,
kaozü soua buyu tyahrü nasü pa loulo.
3Neye tsüle ae hrümai nou peiyu mai hisü nenou kaonayu sü peie,
kaonayu sü daivanou ngaoloue toulouzü puletao nou neye loucheyu donoue.
4Teisa Mapao Ramai ye louchelo,
sükoulouzü teisa nou puhnou Etaoye vupeilai.
5Khaophu souyu maiye sü puhnou souna taikou khaipeiwe,
duso shoa buyu nuhdu khesü puhnou souha peiwe,
ae puhnou nuhdu vei kivo khesü deiphi hi soupepokou khaipeiwe.
6Touha sohayu mainou ae veaholai mainou chuo süsü puletao phi nou taideipoa tayu sü soure.
7 Mapaowo nenou mai aveih maivei ludu sü souveih peie,
ae acheche maivei ludu sü souchi peiwe.
8Oh Mapaowo, Etao nou nevei leli hisü talai,
ae Etao vei areih sü nebaie,
nevei zhih aveih sü Etao nou jüpa kayu nasüe.
9Khei teile hi avei tsüle teitei nou neye thainüwe,
avei hrümai teitei nou neye phouwe.
Nenou deiphao maiye chikuyu phaki deiphao hi hrüa buyu mainou acheche nasü süloulai.
10Nenou mai ashimaiye zhuvea peiyuma puletao nou kaozü nasü doulou chamoe.
Acheche maivei teidei hi-a puletao nou vah ashi sü soua bubaiwe,
ae nevei aduso nasü tsükhou peibae.
11Neye ngaobayu maitao hai nenou puletaoye tudei peilai touyu sü sümoe.
Mapaowo, puletaoye sü ahrao soupeio,
alia nenou tudeilai tea souda-a buyu veahoyu nasü panou puletao hi vetheo.
Ana nenou nevei maitaoye daizhou koute leshi peiwe touyu nasü panou puletao-a ngaolo.
12Oh Mapaowo nenou Etaoye savayu sü peie,
Etao nou soupfü louyu teitei sü nenou soukha peiyu donou baie.
13Oh Etao Ramai Mapaowo,
paopu kukhe maitao nou Etaoye khasa-a hrüwe,
ana Etao Mapao hai ne likhei baie.
14Chuo puletao hai thaitare, puletao hai hri dakhaipu laimore,
puletao vei rako sü kushupulai more,
daiolouzü nenou puletaoye sü tudei peiwure alia souhare.
Puletaoye sü mai lia lichopu khailai more.
15Oh Mapaowo, nenou Etao vei tyahrü sü souduso peie,
nenou Etao vei deirai sü kainghou adai teitei hinou soukapa peie,
südonou neye sü khuhaowe.
16Nevei maitaoye nenou tudei peiyu phaki,
veahoyu donou puletao nou neye phouve-e,
ae puletao nou ne hisü veachi paoe.#26.16 Phoure 16 nahai Hebrew hi sheesha toumoe.
17Naotumai ali nou nalaiyu phaki khya soua krayu büa
Oh Mapaowo, Etao nou ne nghoujü nou kra-e.
18Ehnou khya soue, ana halia nalou moe,
Ehnou deiphao hinou ngalouyu sü ali-a ha-e,
ae deiphao hi hrüloure donou-a haliro soulou moe.#26.18 Ehnou deiphao...haliro soulou moe; Hebrew hi sheesha timoe.
19Thaitayu nevei maikhesü hrishupu loulai,
deiphao hinou züzhi-a buyu maitao,
kushulo alia savayu lou sü soukhaio.
Daiolouzü vidzü nou kou dei theyu hi shopeiyu büa Mapao nou raichoki nou thaitayu maikhe sü soukaishu peilai.
Tudei Peiyu ae Khailupa Peiyu
20Avei maitaore, neletao kikhahi lou kikhu sü khuloua bulo, Ramai vei lekha rarou sü khaitamo koute phateile daotu kikha nou tutsüa buwo. 21Deiphao mainou mahmo souyu donou puletaoye takou tudeire donou Mapao sü rakiva puh buh sü thao-a tapare. Deiphao hinou maiye southayu maisü pongao peilai, ae southa khaitouyu maikhesü dei nou pokupu lou laimoe.
Currently Selected:
ISAIAH 26: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
