ISAIAH 25
25
Paoshoyu Lou
1Oh Mapao, ne hai avei Ramaie,
Enou neye tsükhoulai alia ne zhih sü Enou paosho peilai.
Daiolouzü nenou khupayu vah tyatyali soupeie,
raichoki nou tsüchoda khaitouyu teitei sü nenou veikhai toumoa souvete peie.
2Nenou nuhdu khesü soushi khaiwure,
alia puletao vei veihshoa soukhai touyu kivo ae robomü khesü soupepo khaipeiwure.
Eletao ngaobamai vei veo fühao teitei sü souhakhai toupeiwure,
sükhesü soushupu laimore.
3Südonou khouko pfüshoa buyu tyahrütao nou neye paosholai,
zhaipou shishoa buyu nuhdutao vei tyahrü khenou neye ngaopilai.
4Daiolouzü touha sohayu mainou bailoure buh sü ne-e,
veahoyu mainou bailoure buh sü ne-e.
Teikhai ae teirü ashi veyu phaki bailoure buh sü ne-e
alia teinai soushoyu phaki panou soukao loure sü ne-e.
Daiolouzü lekhashi mainou kaki teikhai hüve kivova shoyu büa,
5alia teikoyu phaki soushoyu teikhai hüveyu büa nou ve-e,
ana Mapao, nenou ngaoba mai paisü souha peiwure,
teinai soushoyu phaki teihao nou kou chaolea loua kaotayu büa lekha ashi mainou lou souyu khesü souha peie.
Ramai nou To Vaire donou Soudayu
6Khoukhoulai Mapao nou Zion deichi vanou deiphao hi buyu tyahrü hrülaiye donou touso aveihli nou vaire donou souda peilai. 7Alia puhnou deichi vanou tyahrütaoye veahoyu sünou hopfü buyu nasü souha peiwulai. 8Puhnou athai nasü teisa polaiwulai, ae Mapao nou mai hrülai nghithou hisü nghidzü southe peilai, alia deiphao hinou hrüa buyu puhvei maitao nou veaho-a chaa pfüa buyu nasü polai peilai, daiolouzü Mapao nou haibüa paoe.
9Teithe haizhou sü mai hrülai nou haibüa paolai, “Puh hai Etao Ramaie, Eletao nou puhye louchewe, alia puhnou Etaoye khailupeie. Puh sü Mapao, Etao nou puhye lüloucheyu vanou chuo Etao hai sava-a nou bure, daiolouzü puhnou Etaoye khailupa peie.”
Ramai nou Moab Maiye Tudeire
10 Mapao nou Zion Deichi sü vupeilai, ana Moab maiye sü puhnou dou hi rouvao taifüyu büa taifü khaiwulai. 11Sühi sünou puletao nou dzü dayu mainou bah thaipayu büa thaipalai, ana puletao vei khaophu souyu sü Mapao nou sounakou peia bailai. 12Puhnou Moab maivei kushoa soukhai touyu kivo ae reihkhaobu khesü deiphi hi soulakou khaipeilai.
Currently Selected:
ISAIAH 25: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
