ISAIAH 22
22
Jerusalem vanou Paoyu
1Zho hinou ngaoyu Deikho vanou paoyu chipao.
Daisounou neletao mai hrülai hai kipei hi taopa bukhai touwe? 2Nuhdu teitei hisü shurao soua buyu sü daidonoue?
Neletao mai thaiyu hai khoche nou daotha moe, moa reih soua thaimoe. 3Neletao vei peikhomai sü voulouthou ali koute-a kalou moa tuta-a nüloua baie. 4Südonou Enou paoe, “Eye zhuso, thaitayu avei maitao donou Eye panou kra-a buwo, Eye souva peilai hie tea teso.” 5Daiolouzü Khoukhoulai Mapao nou zho kounou ngaoyu Deikho hisü panou büraroua ngaopiyu, haongu pa ngaoyu, ae nuhdu vei kivo panou pepotayu alia shusoua sharayu paisü pa deichiva hi khana büyu teithe sü panou vedaoe.
6Elam teidei hinou reihmai khesü soutaosoua reih basei tupoa rheiluki ae rhei pfüa veloure. Kir hi mainou rü sü pfüa bure. 7Neletao vei veikayu Judah deikho taosü rheiluki nou phoutao loure, ae Jerusalem vei robomü hisü rhei pfüyu mainou la-a kholoure. 8Judah vei reihdubuh teitei sü souphepho khaiwure.
Süzhou teithe neletao nou rekou nou reih basei khesü polou sholaie. 9-10Neletao nou Jerusalem nuhdu vei kivo sü pepotayu taoli ngaoe, ae neletao nou Jerusalem hi buyu ki khesü sühao zhuta-e, alia neletao nou nuhdu vei kivo poa soure donou ki kamai-a deikho loure. Neletao nou dzü pojü khailoure donou, 11dzükhao araina hinou dzü kükouyu nasü nuhdu vei kivo ahai kohinou jokhai loure. Ana neletao nou haisü thaonou soupeie touyu sü licholou more moa daorai kinou haibüa soulai tea tsüchoda apeio nasü popeilou more.
12Süteithe zhousü Khoukhoulai Mapao nou neletaoye kra-a dopfülo, pei saiwuo ae soukousah banoulo tea paopeie. 13Ana neletao nou sübüa soure thaosü nühnüa chode ae zhaotu khesü dathaloua sou toua ae zhoah sü soa bure. “Tounü tou, sonü solai khe, daiolouzü dosho Etao thai bailai” tea neletao nou paore.
14Khoukhoulai Mapao nou ahi paoe, “Haibüa vah ashi souyu hai neletao thaimo koute neletaoye khaipei laimoe, tea Khoukhoulai Mapao Ramai nou paoe.”
Shebna ye Paopi Peiyu
15Khoukhoulai Ramai Mapao nou Eye taho veo vei ki khowo Shebna hi haibüa paopeio tea paoe, 16“Ne lah neye thaowe tea tsüchowe? Alia kuyu chulea hinou ne lah nevei khüh vouthou khaitouyu nevei zü daie bue? 17Ne hai matsü shoa buyu mai aliyuma Mapao nou neye poloua khilai bailai. 18Neye poloua süveivei loua bol büa teidei kukhe hi laiho khaiwulai, ae buh sühi sünou nenou khaophu soua buyu rheiluki phi hinou thailai. Nenou nevei paopu ki hisü ahrao pfüve peie. 19Mapao nou neye sü nevei vahbu hinou popawulai ae kuyu hinou ponakou khaiwulai.”
20 Mapao nou Shebna hi paoe, “Süzhou teithe sü Enou akilai Hilkiah nahpoutu Eliakim ye kuloulai. 21Enou nevei sabanü ae khyakho sü puhye noupeilai, nevei khouko sü puh bah hi thoupeiwulai, alia puhnou Jerusalem ae Judah hinou hrüyu maikhe maivei puo sü souwulai. 22Enou puh hisü veo vei khouko teitei ae David kihikha maivei khareih sü thoupeilai; sübüa puhnou kikhuyu sü mai linoua houlou laimoe, ae puhnou houkhai touyu nasü mailinoua khulou laimoe. 23Enou puhye sü kivo vahi hushu veathou khaitouyu büa veathou khaipeilai ae puh vanou puh puo vei kihikha maiye panou tsükhouyu ali soulai.
24“Puh puo kihikhamai ae kityarai mai hrülai nou kivo vahi veathou khaitouyu hushu hisü na veishi ae paikhaotao vaozhu khaiyu büa puh vanou bulai. 25Sübüyu teile veyu phaki, kivo vahi veathou khaitouyu hushu nasü ngaih talai ae dekouta bailai, alia sühinou vaozhu khaitouyu na teitei sü dekou-a bailai,” tea Khoukhoulai Ramai Mapao nou paoe.
Currently Selected:
ISAIAH 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
