ISAIAH 21
21
Babilon Kaodutare donou Zho Ngaoyu
1Babilon vanou paoyu chipao sü haitao-e.
Negeb hinou teikhai teirü ashi hüveyu büa, ngaopisho-a buyu teidei ali hinou reihmai sü veloure. 2Enou avei zho hinou ngaopi shoyu ali haibüa ngaoe-e; shohdo souyu mainou shoh souwe, ae maiye soushiyu mainou soushi peiwe.
Elam vei soureih maitao, reih hulou khaio! Media hi reihmaitao, nuhdu khesü talou soushi khaio. Puhnou maiye souvea hoyu teithe sü chuo Enou pa akhai soulaire.
3Avei zho kounou ngaoyu ae chouyu vanou Esü ngaopi shore alia apfüphao teitei sü sousho-a bure. Enou souyu hai naotumai ali nou nah nayu phaki souyu büa souwe. 4Apei sü vei-a bubaire ae ngaopiyu sünou nguhrührüre. Enou teimai louyu hai jüpa-a zhi-a bue, ana süsü veimoa nou shipu baire.
5Avei zho hinou puletao hai tousore donou buh souda loure, maikhe maiye panou bure donou soumai sah sü khuloure. Sübüa puletao nou touso-a buyu hinou, thashoa nou peikho maitao, “Neletao vei basei sü tuda lourao” tea paoe!
6Süthaisü Mapao nou ahi haibüa paoe, “Taho reihkhaomai khailo, alia puhnou ngaoyu teitei sü panou paopeio. 7Puhnou rhei pfüa laiyu mai ngaolouzü, papa nou pfüa lailouzü, rheisüh ae racho pfüa laiyu ngaolouzü, soutaosou zhutou loua panou paopeio.”
8Reikhaopu nanou paoe, “Oh Paopuwo, Enou reihkhaobu hai hinou hea-khei lapoa nou kho-a bue.”
9Enou rheipfüyu mai, mai ahai ahai nou laiyu ngaoe. Reihkhaowo nou haibüa sha-a paore, “Babilon sü kaota laire, kaolaire! Puh vei bashara teitei sü deiphi hi soukou deikho khaiwure.”
10Oh avei maitaore, neletaoye sü chathai hinou thou taiyu/dayu büa nou bue, ana chuo Enou Khoukhoulai Mapao, Israel maivei Ramai hinou chouyu ko aveih sü paosü peiwe.
Edom vanou Paoyu
11Chipao haisü Edom (Dumah) vanou-e.
Mai ali nou Eye Seir (Edom) hinou kuloua haibüa noue, “Reihkhaowo, khei teile sü kapha hinou chelaige?”
12Enou haibüa chila peie, “Tei thepa laire, anou khei kou daopu laihie. Nenou noupulai toulouzü dakhaive noupuloua bailai.”
Arabia Maiye donou Paoyu
13Chipao haisü Arabia maiye donoue.
Oh Dedan maitaore, rachome koa chaobu soupoa tave Arabia vei radeiki hinou fühao souloua buyu phaki, 14reia laiyu maitao nou neletao hi veyu phaki dzü peia panou kelo. Tema hinou hrüa buyu maitao, shetu maitaoye touso soupeio. 15Daiolouzü maikhe maitao hai khoche mü hinou, voulouthou hinou, ae soureih shishoyu hinou tuvewe.
16Süthaisü Mapao nou ahi paoe, “Po ali lüvai hinou Kedar maivei kathe khesü akhai soua bailai. 17Soureih souyu hi voulou poveih shoyu Kedar maikhe sü daotu shopeia bailai. Daiolouzü Israel maivei Ramai Mapao Enou paowure.”
Currently Selected:
ISAIAH 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
