ISAIAH 23
23
Phonisia vanou Paoyu Chipao
1Chipao hainasü Tair maiye donoue.
Dzüluki pfüa buyu Oh Tair maitao, kra-a dopfü loukhaio, daiolouzü neletao vei ki ae dzüluki khikhaiyu buh khesü soushi souhawure. Ko hainasü puletao nou Kaipras teidei hi buyu phaki nou paosü peiwure. 2Oh zaipe hinou hrüa buyu maitao alia Sidon hinou huhasoua buyu maitao, neletao paikhai toumoa bulo. Neletao vei kopomai khesü zaidu tala tare, 3alia zaidu pei hinou bure. Neletao vei nangi khesü Ejipt hinou payu thoudzü ae Nail rei hinou chachi louyu thoudzü khesü poa neletao nou tyahrütao hi huhasouwe. 4Oh Sidon hi maitao, hraolo, daiolouzü zaidu sünou haibüa paopare, “Enou khya soua nahmai ali-a nakou moe, moa Enou nah naotu moa nahpoutu ali-a kidupa peimoe.”
5Tair teidei hai soushire touyu ko sü chouloua Ejipt koute-a levea-a chathai talai.
6Phoenisia maitao, dopfüa kralo, Spain hi tupa loure donou tekhaio. 7Daoh raichoki nou puletao nou khaophu soua soushu khaitouyu Tair nuhdu nasü hainavu? Dushoa buyu füdei kukhe hi taho puletao vei füsho khaitouyu nasü hainavu? 8Veihshoa buyu nuhdu, veo mainahtao nou huha soua buyu alia nuhdu sühinou huha souyu maitaoye deiphao mai hrülai nou tsükhoua buyu Tair nuhdu nasü thaonou haibüa soushi souhare donou tsüchoda khaiwe? 9Puletao vei kathe, khaophu souyu teitei, alia deiphao mainou tsükhoua buyu veishi sü souhare donou Khoukhoulai Mapao nou haibüa soure donou tsüchoda khaiwure.
10Oh Tarshish (Spain) hi hrüa buyu maitaore, neletao lavei teidei sü thaokhaiwua ta-o, daiolouzü mai linoua neletaoye sü vupeire hare.#23.10 Phoure 10 haina hai Hebrew hi sheesha timoe. 11Mapao nou puh bah sü zai pei hi thaipa khailoure, puhnou vedei khesü khaongu khaire. Puhnou Phoenisia (Kanaan) maivei huhasoua buyu nuhdu khesü soushi khaio tea kharochi peiwure. 12Oh Sidon nuhdu hinou hrüa buyu maitao, neletao vei savayu sü akhai soure, neletaoye souvea hoyu hinou kushu loua Kaipras nuhdu hi tuve loua buyuma, buh sühi-a neletao nou kaozhou aveih sü ngaoloulai moe.
13(Zhukhaio, haisü Assaria mainou moe, ana Babilon mainou baie, puletao nou Tair maivei teidei sü panou rekhaona buh soupeiwure. Puletao nou reih hulou veiloua polouyu kipeitaoh nasü soukhore, alia honapai vei veo fühao teitei sü soushiwure alia honapaiye sü souhare.#23.13 Phoure 13 nahai hai Hebrew hi sheesha moe.)
14Oh Tarshish hi buyu dzülukitao, neletao levea-a dopfü loukhaio, daiolouzü neletao vei dzüluki chaoyu buh khesü soushi khaiwure.
15Süzhou teithe hinou Tair sü po rainai koute hai ngai-a bailai, süsü vemaiphao ali hrüyu pha-e. Po rainai cheyu phaki Tair hai khakhapfü vanou lou souyu büa bailai:
16Lou poa souyu gaigou poloua nuhdu sü sühao takhaio,
Oh mainou ngaiwua buyu khakhapfüpai!
Maikhe maiye panou neye lichopu loure donou lou sü soulousü koute soukhaio.
17Po rainai cheyu phaki, Mapao nou Tair hisü veloulai, ae honapai nou raichoki souyu vah hisü dakhai loulai, ae deiphao vedei teitei hi puhnou khakha-a bulai. 18Honapai nou khalouyu pousha khesü Mapao bah hi thoupeilai, ae puhnou pousha khesü pojükhai laimoe, ana Mapao ye thoyu maikhe nou puletao vei touso ae sabanü sü hüloulai.
Currently Selected:
ISAIAH 23: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
