ISAIAH 16
16
Moab Maiye donou Areih Hayu
1Radeiki hilonou buyu Sela nuhdu hisü nou Moab mainou zhaotu ali sü Jerusalem hi khasa-a hrüyu maitao hisü seive peie. 2Raohou phe hinou hulai khaitoua zhaokou zhaokhe-a buyu raohoutao büa Moab maitao hai shizhumoa Arnon reipe hinou takou toukhe-a bure.
3Puletao nou Judah maitao hisü paoe, “Etao dai-e soulai touyu paopeio. Hea tei soushoyu phaki süübe phinou ve bailouyu büa Etaoye panou neletao phi nou bailo, Etao hai shetumai baie, Etaoye pokupeio, do ashi tya soupeisho 4Etaoye panou neletao teidei hinou buwo, Etaoye souhalai tea phouyu maitao bah hinou vupeio.”
(Souchoroyu maikhe sü hata laire, ae veahoyu sü akhai laire, alia maiye soutai sounouyu maikhe sü teidei sühinou halaire. 5Süthaisü acheche ae leshi hinou vebuh ali soushulai, vebuh sühisü David vei tyaosholea hinou hrüveyu mai ali nou bulai. Puhnou acheche hisünou chiku peilai, kaozü nasü phoulai, ae checheyu nasü thashoa soupeilai.)
6Judah mainou paoe, “Etao nou Moab mai hai khaophu soushoyu ae rochiyu sü choue, ana puletao nou khaophu souyu sü hamako baie.”
7Moab mainou puletao veahoyu donou dopfüa kralai. Puletao mai hrülai nou Kir Heres hinou touso aveihli potouyu sü licholoua kralai. 8Hebron hi buyu doutao ae Sibmah hi darkha kipei khesü soushire— daoh teile ali hio tyahrü vei peikho maitaoye panou vashoa sozhiyu vei darkhabe khesü Jezer nuhdu hi ae teinghi palo hai radeiki khete kipoa ta-e, alia teinghi loulo hai athai zai hi koute kikou-e. 9Chuo Enou Jezerye donou krayu büa Sibmah hi darkhabetao donou krawe, Oh Hebron ae Elealeh, Enou nehai donou avei nghidzü kouwe, dai sounou toulouzü neletao vei thoudzü meipa-a chachiloua asashoa shusoure sü hare. 10Chamou veisho-a chilouyu doutao donou mailiro savayu sü hare, ae darkha kipei hinou lou soua shusouyu sü hatare. Darkha dzü süa shusoua hihiyu sü raomozhi tare.#16.10 Daohraichoki nou la dapakhai touyu Larübvü ali hi shusoua hihiyu sü raomozhi tare; Hebrew puletao nou sashoa shusouyu sü Enou souhawure. 11Südonou Enou Moab ae Kir Heres donou levea-a dopfüe. 12Moab hi maitao nou deichi vanou taopa puletao vei rathoki kinou veachi paota-e, ana puletao donou veiyu hali-a ngaolai moe.
13 Mapao nou Moab maiye donou rai-a paopeiyu chipao sü haitao-e. 14Alia chuo Mapao nou paoe, “Po asü levai hinou Moab maivei nangi teitei sü hata bailai, ae mai alao buyu sü mai daotu shokhaipei bailai alia mai sütao hai-a lelou hoyu maitao nou bubailai.”
Currently Selected:
ISAIAH 16: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
