ISAIAH 17
17
Ramai nou Sairia ae Israel Maiye Tudeire
1 Mapao nou paoe, “Damaskas hai nuhdu ali sou-a bupu khailai more, soushi khaitouyu ae tangiyu nakhe nou phoutao poa bubailai. 2Sairia vei nuhdutao hai teisa panou mai hrümoa buyu buh souwulai. Buh sütao hisü zhaotu ae nghitu nou pou touyu ae dazüyu buh souwulai, halinoua puletaoye sü daichoro laimoe. 3Ephraim maivei reihbutao ae Damaskas vei vedei sü hata bailai, alia shokhaitoua buyu Sairia maitao hai Israel nahmaitao büa khouko ava sü ngaolai,” tea Khoukhoulai Mapao nou paoe.
4 Mapao nou paoe, “Süzhou teithe Israel maivei kathe sü hata bailai, alia puletao vei hrübo aveih sü kita bailai. 5Israel mai hai Rephaim Deikho hi buyu doutao chachiyu mainou routhou vakhai loua vaomü likhei shokhai touyu büa bailai. 6Israel mai hai Oliv süübe hi rashithou haikhai touloua puhtao hi rashithou ahai-sü moa botao hinou rashithou asü-dai likhei shokhai touyu büa bailai, tea Israel maivei Ramai Mapao nou paoe.”
7Süzhou teithe sü maikhe mainou puletaoye Souva-apeio Mapao hisü dakhai velai, ae puletao nou Israel maivei Amasheeo sü phoutalai. 8Alia puletao bah nou soukhai touyu bashara khesü thaowulai, ae puletao bah nou soukhai touyu Ashera rapfüpai ae kainüvei pou dei-a posheelayu rathobu khesü louchemo ta-a bailai.
9Israel mainou talouyu phaki Hiv mai ae Amor mainou#17.9 Larübvü ali hi Hiv mai ae Amor mainou; Hebrew süü hrüyu ae deichi vei tyadei nou. puletao vei nuhdu khesü thao-a tutayu büa süzhou teithe veyu phaki puletao nou veishoa soukhai touyu nuhdu khesü thao-a tuta bailai.
10Daisounou toulouzü neletaoye vupa-apeio Ramai ye sü neletao nou ngaiwure, ae puletao vei baibu chuhdu nasü licholou more. Neletao hai sheeyu kipei#17.10 sheeyu kipei: Phoure 1.29 hi zhukhaio. alao soukhailoua vakou maivei rahye thore donou soudakhai tou-a bure. 11Neletao nou shothou khaitouyu süübe khesü vipayuma ae shinamara vuthou khaitouyu khesü paopayuma neletao nou sükhesü touloulai moe, ae veilou hoyu sounou khaikho vedao-a bailai.
Ngaobayu Tyahrütaoye Hraongu Soupeiyu
12Khouko pfüsho-a buyu tyahrü khenou raoyu paisü zai hi dzü nou rayu pai büa ra-a bure, alia dzüdu kho payu büa ra-a bure. 13Tyahrütao nou dzüdu külaiyu büa velai, ana Ramai nou puletaoye züpeiyu phaki, puletao hai tudakhai ta-a bailai, teikhai nou thouba hüpoa tayu büa alia teikhai ashi sünou halih hüpoa tayu büa puletaoye sü hüpoa ta-a bailai. 14Koukhedao hai puletao nou khushoa veloulai, ana thainesho shona sü puletao hai ha-a bailai. Neletao vei nangi shaolouyu ae teidei soushiyu maitao sü haibüa hata bailai.
Currently Selected:
ISAIAH 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
