ISAIAH 14
14
Vakou Nüpoa Tayu Maitao Dakhai Vere
1 Mapao nou Israel maiye zhuvea peilai, ae puletaoye puhvei mai soure donou dodakhai loua panou lah vei teidei hisü dakhai ve panou hrüpu loulai. Shetumai-a puletaoye koa ve hrüzholai. 2Tyahrü taoli nou Israel maiye soukha peilai, sübüa neletao ye Mapao nou peikhai touyu teidei hisü panou dakhai ve hrüpu loulai, ae tyahrü kukhe maiye puletao vei qila panou soua hrülai. Puletaoye nüpoa tayu maitao sü puletao nou nüloua puletao vei hukhamai soulai, ae puletaoye souveayu maitao pei hinou neletao nou khasa-a hrülai.
Babilon Veo Kaotayu
3Neletao panou veaho shoa ae chorosoua tateishoyu vah souyu hisü Mapao nou neletaoye soyu peiyu phaki, 4neletao nou Babilon veo hisü haibüa nou konülai:
“Zhaipou ashi veo sü kaotare! Puhnou maiye sü souvea souchoropu khailai more. 5Mapao nou ashi hinou nuh teidei khoyu maiye khouko sü souha peiwure, 6Lekha rarou hinou maikhe maiye tudeiyu ae zhaipou shishoa maikhe maiye souvea souhoyu peikho maiye sü souhawure, 7Chuo deiphao teitei sü asashoa shoyu ae kaonayu sü ngaoloure, mai hrülai sü sasho-a lou soua bure 8Lebanon hi haosüü ae sedar süübe khenou sashoa ne pei hi haibüa paoe, ‘Nenou kaodu tayu thai Etaoye chuo mai linoua vilai more.’
9“Rabedushao nou neye daore donou ne velouyu vuzhia bure. Deiphao hinou maiye khosa-a buyu ae tyahrü tya tya li hinou veo maitaoye Rabedushao sünou chalai tea puh buh hinou kushu bure. 10Puletao mai hrülai nou ne hi haibüa paolai, ‘Chuo ne-a Etao büa lelou hore! Ne sü chuo Etao bütoua baire! 11Neye sü maikhe mainou shapoulei, gaigou ae poa lou souyu basei nou tsükhoua lou sousho peie, ana chuo ne-a thaimai buh hisü vere. Shikhao sünou nevei zü khuyu ae bazüyu sah soure.’
12“Oh Babilon hi veo, vavei shoyu shona teivu, kabüa nou ne sü raki vanou dekou tare? Raichokio tyahrü kheye nenou veiloua buwe, ana chuo ne sü deiphi hi kaolou tare. 13Ne le hinou, ‘E rakiva kheloua Ramai vei teivutao pei hi pa avei vebuh soulai, ae ramaitao nou vejüa buyu reilova buyu deichi hinou veo mai büa Enou bulai. 14E teihao pei hi taopa bulai, alia kukulaio raibüa sühisü bulai,’ tea ne tsüchoe. 15Ana neye sü thoukayu thaimai buh hisü polou khaiwure.
16“Thaimaitao nou neye zhutei touloua haibüa tsücholai, ‘Deiphao soulüyu ae vedeitao soungu peiyu sü mai haina movu? 17Nuhdutao souhawua panou radeiki büa datayu ae hukha maiye phapei bayu sü mai haina movu?’ 18Deiphao hi veo mai hrülai hai lahlah vei khü hinou tsükhou shoa vukhai toupeie, 19ana newo louzü khü ha-e, nevei thaiphao sü tangiyu na ali büa laidu khaiwure, soureih souyu hinou thaiyu thaiphaotao koa nevei thaiphao sü lyaqulu hi laithou khaiwure. 20Veo mai ali büa neye louzü poa vupei more, daiolouzü ne hai lah nevei teidei sü soushi khaiwure alia lah nevei maitaoye sü southare. Ashi souyu nevei sholya hrülai sü panou mai ali koute-a hrilai moe. 21Mah souyu donou puletao panou deiphao hisü hrüpulai moe alia deiphao hinou nuhdu khesü panou soupapu laimoe.”
Ramai nou Babilon souhayu
22Khoukhoulai Mapao nou paoe, “Enou Babilon sü dutalai alia souhawulai, sübüa nahmai ali koutea panou hrilai moe. 23Enou Babilon teidei sü rekhaona buh soupeiwulai, ae zaidzü soudawulai. Phai nou poa phailaiyu büa Enou souhakhai touwulai,” tea Khoukhoulai Mapao nou paoe.
Ramai nou Assaria Maiye Souhalai tea Paoyu
24Khoukhoulai Ramai Mapao nou haibüa chaachou souwure, “Enou souda khaitouyu thaipfü haisü vepalai, alia Enou tsücho khaitouyu thaipfüa soulai. 25Enou Assaria maiye sü avei teidei hinou souhawulai alia puletaoye sü avei deichi hinou aphikhe taidei thou khaiwulai. Assaria maivei phaodao nasü avei maitao phao hinou laokou peilai, ae avei maitao vei kousüh nasü polai peilai. 26Deiphao teitei donou soudayu sü haire ae tyahrütaoye souveare donou abah sü thaipawure.” 27Daiolouzü Khoukhoulai Mapao nou haibüa soulai tea tsüchodawure, ae hainasü thaonou kha lousüe? Puh bah sü thaipawure, ae haisü thaonou nulousüe?
Ramai nou Philistin Maiye Souhare
28Veo Ahaz thaiyu po hinou paopeiyu chipao sü hai haie.
29Oh Philistin maitaore, neletaoye dayu süda nasü chatare tea asah souso, daiolouzü nghou ali thaitayuma süna thaosü shipuyu nghou ali pabaiwe, alia nghoudzü hinou shishoyu nghou alao kopa peiwe.
30 Mapao nou touha sohayu puhvei maitaoye sü vupa peilai, ana Philistin maitao hiolouzü tokaayu seive peilai, alia thaihao moa shokhai touyu maitao sü puhnou southawulai.
31Oh Philistin nuh teidei hi hrüa buyu mai hrülai, kra-a dopfü loukhaio! Oh Philistin mai hrülai, ngaopi lou khaio! Daiolouzü reilonou reihmai sü meikhaoyu büa laire, puletao hio khuhayu mai aliro laimoe.
32Etao nou Philistin maivei kopomai hisü kabüa chila peilai? Mapao nou Zion nuh sü soushupeie, ae veahoyu puhvei maitao nou buh sühinou kaozhou veia hrüloulai tea chila peilai.
Currently Selected:
ISAIAH 14: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
