ISAIAH 13
13
Ramai nou Babilon Maiye Tudeire
1Amoz nahpoutu Isaiah nou Babilon donou zho ngaoyu sü haitaoe.
2Halia hayu deichi matao hisü taopaloua reihmaitao hisü shusoua shapei khaio, ae reih soure sahra sü pola peikhaio, alia khaophu soua buyu nuhdu vei robomü hisü reih huloure donou bah lapa ngaopei khaio. 3Mapao nou louche-a khaophu soulou vei ae puhnou soushee khaitouyu reihmaitao sü kupa loua panou puhnou lekhayu maitao hisü reih soure donou soudawure.
4Deichiva hi mai soudu nou shusou raoyu pai sü kei khaio. Keikhaio, tyahrü taoli ae vedei taoli tave jüa buyu paisü. Reihmaitao vei Khoukhoulai Mapao nou reih soure donou puhvei reihmaitao sü soudawure. 5Puletao hai tyadei adoukou nou velouwe, ae teidei akhai hinou vewe. Mapao nou puh vei lekha rarou hinou tyadei teitei sü souhawure donou veloure.
6Kra-a dopfü loukhaio, daiolouzü Mapao vei teithe sü nghiteire; Khoukhoulai Mapao nou veahoyu sü seive laire. 7Süphaki mai hrülai bah sü lülou hoa bailai, ae mai veishi nou khuha talai. 8Puletao hai ngaopi talai, sounou ae veahoyu sünou puletao hi velai, puletao hai naotumai nou nah nalaiyu phaki khya souyu büa veasholai. Puletao hai maili nou aliye zhuloua ngaopilai, ae puletao pah sü mei taoyu büa hraoyu nou phoutaolai. 9Zhukhaio, Mapao vei teithe sü laire, leshiyu ha-a nou lekha rarou ae zhaipou shiyu sünou deiphao sü soushire donou alia mahmaiye sü souhare donou velai. 10Süzhou teithe sü teihi vutao ae rakiva ava khesü puletao vei ava sü vapeipu laimoe, teinghi-a zhitei tabailai ae khouh-a vamo ta-a bailai.
11 Mapao nou paoe, “Enou deiphao sü soushiwulai, ae mai ashi maiye puletao mah donou soushiwulai, khaophu souyu maiye sü souhawulai, ae leshiyu ha-a aduso zhai soua laiyu maikhe sü sounakou khaipeilai. 12Thaimoa hria buyu maitaoye sü Enou sana jünou veipua soupeilai. 13Khoukhoulai Mapao Enou, avei lekha payu teithe sü rakiva buyu na khesü ngulülai, ae deiphao hai puh buh hinou souda laiwulai.
14“Shuh ali souhumai nou huyu büa, moa zhaotu ali hai zhaokhomai hayu büa Babilon hinou ve hrüa buyu vakou maitao sü lahkuku vei nuh teidei hisü tuta bailai. 15Nülouyu maikhe maiye sü southa bailai. 16Puletao nahmaiye sü puletao vei nghingao hinou southa bailai, puletao vei ki sü soushiwulai, ae puletao khapfüye sü, sabu sazü peiwulai.”
17 Mapao nou paoe, “Enou Medes#13.17 medes: Tyahrü haina hai Babilon vei reiko-teinghi palova nou bue, ae puhmaitao hai Persia maivei vedei hi loutare. maiye panou Babilon hi reih huloure donou soupeilai. Puletao hai shahu donou tsücho moe alia sana jüpayu hae. 18Puletao vei voulou nou nahlemai khesü vuthawulai. Nahmai touye zhuvea leshiyu sü puletao hi hae. 19Veishoa buyu Babilon vedei, alia sühinou hrüa buyu maitao vei khaophu ae kathe khesü, Mapao, Enou souhayu teithe sü Sodom ae Gomorrah raibüa bailai. 20Buh sühisü mainou ve hrüpu khaitou laimoe, Arab mai-a puletao vei sahpao sü buh sühi ve haopu laimoe, zhaokhomai-a zhaotu save buh sühisü khopu laimoe. 21Ana buh sühisü rekhaona nou bua bailai, ae khebo nou phe soua bulai, Ostrik rehou alia rekhaona khenou tukou tukhe-a bubailai. 22Veishoa nou soukhai touyu kipeitaoh ae veo vei fühao tao hisü nüsei alia lakhao rayu buh souwulai, sübü laiyu teile sü nghitei baire alia sübüyu teithe sü shomore.”
Currently Selected:
ISAIAH 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
