EBRIAMAI 13
13
Ramaiye kabüa Sousa Loulai
1Thaihou jüraiye leshiyu hai tobai soumoa bulouwo. 2Shevai-shesüye sasa-a shepeiyu sü ngaikhaiso, daiolouzü sübüa souyu hinou mai kamainou sükhaimoa rakivamaiye sheloue. 3Hukhahi bumaitao ye neletaoa puletaoye koa buyu büa licho peikhaio; alia mainou soushi soukha peiyu maitaoye neletao-a koa veahoyu büa licho peikhaio.
4Sheenghiyu hai maikhemai hrülainou tsükhoulai, alia sheenghiyu vei zühnasü souzhaiwuso; daiolouzü Ramai nou khakha chaozüyu ea maipfü maipuo sapayu maiye chikulai.
5Neletao hrümaisü pousha züpayu hinou dosoulo, alia neletao vei bubuyu sünanou khralou baio. Daiolouzü Ramai nou haibüa paoe, “E nehinou takhai laimoe; moa Enou neye thao khai laimoe.” 6Südonou Eletao nou haibüa khuveia paolousüe:
“Mapaowo hai Eye soukha-apeio nasüe,
E pilai moe. Mainou Ahi dai souloulai?”
7Raiki neletao hi Ramai chipao pao peiyu neletao vei süthai-apei maitaoye licho khaio. Puletao nou kabüa hrüsa ea thaisa touyu sü chokhaio, alia puletao vei lü dosü doulo. 8Jisu Khrista hai doa, zhoua ea teisa nou kheihao baie. 9Neletaoye tya kukuyu ea dosüku zhai hinou doupeiyu sütaoye panou süthaipoa tawuso, daiolouzü touso vei naanou reiyu nanou moa nou Ramai vei zhuvea nanou lekhe soukhou peiyu hai veishoe; naanou sütao reiyu maitaoye sütaonou soukha peimoe.
10Eletao vei sheelabuh ali bue, sühi posheela khaitouyu hatalia sahpao hinou kuvah soua buyu maitao nou touyu zülia hae. 11Napao Peicha nanou khaosoutao zhesü mah donou posheela-a popeire donou Mashi Shilaibuh hi polouwe; ana khao soutao vei pfüphaowo louzü fühao vakou nou popa mei deiwu baiwe. 12Sükuyu donou Jisu-a lah puh zhenou maikhe maiye mah hinou soushee peire donou nuhdu vakounou thaie, 13südonou, Eletao-a fühao vakouhi tapa puh hi taveloua puhvei ahraoyu hisü zha ngaozho laikhe. 14Daiolouzü Eletaoye donou deiphao hai hisü teisa vei nuhdu hae, ana Eletaowo vere nuhdu nasü phoua laiwe. 15Sükuyu thaisü, Eletao nou Jisu vanou Ramai hisü tobai soumoa paoshoyu vei posheelayu süolouzü puhye nou Mapaowo süe tea münou dua paopayu sü popei laikhe. 16Avei vah souyu ea alinou liye soukhayu nasü ngaiwuso, daiolouzü sütaosü Ramai nou züpayu posheelayu taoe.
17Neletao vei süthai-apeimaitao chi zülo ea puletao khakhe hinou hrülo. Puletao nou neletao rakosü tobai soumoa khoa bue, daiolouzü puletao nou puletao vei vah peisü Ramai hi, chongao vuzülai. Neletao nou puletao chi zülouzü puletao nou puletao vahsü sasa-a soulai; sükumo louzü puletao sü le vealai, alia süsünou neletaoye donou ha zhiyu alia ngaolaimoe.
18Eletaoye donou tobai soumoa veachi paopeikhaio, Eh vei lekhetsü hai sheetoua bue touyu sü Ehnou süvuzü daiolouzü phabusa nou Ehnou cheche vah nasü sounüwe, 19alia Ramai nou thala-a Eye sü neletao hi seidakhai peire donou veachi paopeire Enou neletao hi khowe.
Akhai Veachi
20Puhvei posheelayu athai süna vanou teisa vei vo sünaye paoshee souyu, zhaotao vei Zhaokho-apeio Aduna, Eletao Mapao Jisu ye sü Ramai nou athai hinou souhrishu peire. 21Kaonayu Ramai nou nelelao hisü puhnou lichoyu souloure donou neletao nou moshilaiyu na avei teitei peiyu sü souloukhaio, alia Jisu Khrista vanou puhye panou puhnou züpa vahsü Eletao hinou soulou khaio. Alia Khrista hisü teisanou adusho paoyu sü souloukhaio! Amen.
Akhai Chipao
22Athaihou jürai khemai, le soudu peiyu chipao haitaosü shamea touloua keipeikhaio tea Enou neletao hi khowe; daiolouzü Enou neletao hi rüpeiyu seiko hainasü jübou baie. 23Enou neletaoye panou sülounüwe, süolouzü Eletao thaihou jürai Timothiye hukha hinou phapeire. Puhnou thala-a velouzü puhye koa Enou neletaoye ve daolai.
24Ehvei sasa-a khurüyu chidoh sü neletaoye süthai-apeimai ea sheeyumai hrülaihi peikhaio. Itali hi buyu thaihou jürai taonou neletao hi puletao vei sasa-a khurüyu chidoh seivewe. 25Ramai zhuvea nou neletao hrülaiye koa buyu sü souloutheo. Amen.
Currently Selected:
EBRIAMAI 13: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
