JEMS 1
1
1Ramai ea Mapao Jisu Khrista vei kilai Jems hinou deiphao buh liki hinou raroupoa buyu Ramai vei mai khü kiahaitao hisü khurüyu chidoh seiwe.
Lü ea Ratsü
2Athaihou jürai khemai, neletao hi veahoyu tyatyali vedaoyu kisü, neletao lahnou rako veie tea choloukhaio, 3daiolouzü neletao nou süwe süolouzü neletao vei lü nanou sübüyu veahoyu sü kolouyu kisü shameayu vei khouko ngaolouwe. 4Neletao nou liche-a, chekhoua ea halia chemoyu ha-a buloure donou, neletao vei shameayu sünaye panou neletaoye ha teitei hinou veikhai loure souvu zülai. 5Ana neletao hronou kamainou ratsü chemoa bulouzü, puhye panou puh hi süna peilaiyu Ramai hinou khokhaio; daiolouzü Ramai nou mai hrülai hisü alaosoua ea leshishoa peibaiwe. 6Ana neletao nou veachi paoyu kisü, neletao nou louche vuzülai ea hakia leki khailaimoe. Lekiyumai talisü teikhainou hükou-hükheyu zaihi dzü-akhüh büe. 7Haibüyu le ahai souyu ea puhnou soupfüyu hata hinou le lalou hoyu puhnou 8Mapaowo hinou hatali ngaoshu laihie tea chokhaiwu laimoe.
Toure Hayu ea Kini
9Toure hayu thaihou jürai puhnou Ramai nou puhye soukupa peiyu kisü, lesalo, 10alia kini buyu puhnou Ramai nou puhye souna peiyu kisü lesalo, daiolouzü rekou poube vei poupah büa puh-a hata bailai. 11Daiolouzü teinghinou puhvei meisou sünaye koa paloua poube sünaye chatheawure; sünavei poupah-a raitare, alia sünavei ngah veinasü souhare. Süzhaibüa hanimai süna-a puhvei hu phoubu kinou hata bailai.
Zhai Zhuyu ea Thaoyu
12Zhai zhuyu hi shamea louyu puhsü rako veie, daiolouzü puhnou zhai zhuyu süsü kolouyu kisü, Ramai nou puhye leshimaiye peilai tea apaokhai touyu ahri peirü nasü puhnou ngaolai. 13Maitalinoua puhye thaoyu kisü, “Ramai nou Eye thaowe;” tea paowuso. Daiolouzü Ramaiye sü ashinou thaolou hoe, alia lah puh-a maitaliye thaotamoe. 14Ana mai aliliye lah puhvei züpa nanou paipoa tayu thainou ea southaiwuyu hinou thaowe. 15Süthaisü züpa nanou pou pfülouyu kisü mah napeiwe; alia mah nanou liche louyu kisü athai napeiwe.
16Leshiyu Athaihou jürai maitao, panou lawuso! 17Veiyu ea licheyu sapeina teiteisü raki hinou ve; haisü avataovei Puo hinou ve, puh hisü datayu vanou takuyu moa khudayu ali-a hae. 18Puhvei leli hinou Eletaoye panou puhvei hrikhaona teitei hronou raikaiyu shithoutao soure donou acheche vei chipaona vanou puhnou Eletaoye panou veloure.
Chouyu ea Vah Souyu
19Leshiyu Athaihou jürai khemai, haisü sülouwo! Maikhemai hrülainou chouyu hinou thayu, ana chi paoyuhi ea lekhayu hisü shosho souyu souloukhaio, 20Emai lekha sünanou Ramai vei acheche vah soumoe. 21Südonou hrühaoyu tatou ea zhaido ashi teitei thaokhaiwuwo, alia neletao rakoye khailu peilou süyu Ramai puhnou neletao lethou hi shothou khaitouyu chipao sünasü natai-a polo.
22Ana neletao nou chipao nasü souyumai soulouwo, alia lah neletaoye la-a chouyumai likhei souwuso. 23Daiolouzü maitalinou chipaona chouyumai souloua, souyumai soumo louzü, puhsü lahvei zhusü zhuzhu hinou zhuyumai kue; 24daiolouzü puhnou lah puh zhusü zhutouloua tare ea puh hai daiye raisa touyu sü thala-a ngaiwure. 25Ana maitalinou do soupeiyu licheyu razhaina hisü zhuloua sühisü thaokhaimoa le peitoua keiloua ngaiwuyumai soumoa süna souyumai soulouzü, mai sünaye sü puhnou soupfüyu hisü Ramai nou hapeilai.
26Maitalinou puh hai rahrüzhai veishoa tae tea chowu? Puhnou puhvei malisü tukhatsü khaiwu molouzü, puhvei rahrüzhai nasü hakobaie ea puhsü lah puhye labaiwe. 27Puo Ramai nghojünou sheetouyu ea zhaikhai moyu rahrüzhai sünawo louzü, vearounaye ea meamaipfütaoye puletao vei veahoyu hi tave zhupeiyu, alia mailinou lah puhye deiphao nou soushi peiwure hinou chaalia taomoa bulouyu sünasüe.
Currently Selected:
JEMS 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
