EZEKIEL 38
38
Gog ye Ramai vei Basei Soua Poa Vah Souyu
1 Mapao nou ahi haibüa paoe, 2“Thai-a bailaiyu mainare, Magog teidei hinou buyu Meshek ae Tubal tyahrü ahai vei veo nahpoutu Gog hisü aetou more tea rachipaola peio, 3ae puh hi Ramai Mapao Enou hraita laire tea paopeio. 4Enou puhye sü khaolu peilai, puhvei khou sü khahsüshu nou vaoloulai ae puh ae puhvei reihmai hrülaiye sü pairoupoa laiwulai. Puhvei reihmai, rheitao ae raibütoua na tuloua rheipfüyu maitao alia rü pfüa khoche poyu reihmai hrülai noupu vakou hupa laiwulai. 5Persia, Sudan ae Libya hi maitao-a rü ae hupeirü sü pfüa puhye koa lai-e. 6Reilova nou hrüyu Gomer ae Beth Togormah maitao, soureih soulou süyu mai hrülai alia tyahrü kukhe hi-a maitaoli hai puhye koa salai-e. 7Puhye soudalo tea paopeio, alia puhnou khosalai-a buyu puhvei reihmai metao-a panou tudalo tea kharochi peio. 8Po teile taoli thaisü, Enou puh hi tyahrü tyali hinou pove jüpei khai touyu tyahrütao, chuo ngaopiyu halia ha-a hrüyu maitao hisü reih huloukhaio tea kharochi peilai. Puhnou Israel maivei deichitao, raichoki teile taoli hai soushiwua thaokhai touyu teidei hisü soureih huloulai ana maikhe mai hai chuo kaozhou ashi daore halia pimoa nou hrüa bue. 9Teikhai teirü ashi veyu büa ne, nevei reihmaitao ae neye koa salaiyu tyahrü kukhe maitao nou puh hisü soureih hai huloulai.”
10Ramai Mapao nou Gog hisü haibüa nou paoe: “Teile süna veyu phaki, nenou tsüdo ashi khesü chotalai. 11Nenou khouko lia ha-a buyu tyadei, nuhdu khesü kaopo pohao moa hrüa buyu maitao ae kaonaphi tea nou kaozhou ashi vere ngaopiyu ha-a buyu maitao hisü soureih huloulai tea lela loulai. 12Raichoki soushi khaitoua soushu dakhai loua hrüyu maitao vei nuhdu khesü nenou soushi peia puletao vei na khesü nenou shaoloulai. Puletaoye tyahrütao hinou save jüpei khaitoue, ae chuo kikhaorü ae nevei ha bua nou deiphao toutsü hinou hrüa nou bue. 13Sheba ae Dedan hi maitao nou alia Spain vei nuhdutao hinou huha soua buyu maitao nou ne hisü haibüa nou chi noulai, ‘Nenou soureih maitao save jüloua soureih souyu hai maivei shaore donou baimoge? Nenou reihmai taoli saveyu hai shaolouyu nevei shahu, sana, kikhaorü ae na khesü potare donouvu?’ ”
14Südonou Ramai Mapao nou Eye Gog hi haibüa paopeio tea paoe, “Chuo avei Israel maitao hai ngaopiyu ha-a kaozhou vei-a nou hrüa buyu hinou ne sü tashu talai. 15reilova nou doushoa buyu nevei buh hinou nenou dushoyu ae khouko dushoyu reihmaime sü tyahrü taoli hinou saloua nou talai ae puletao mai hrülai hai rheiphao hinou talai. 16Nenou avei Israel maitao hisü teikhai teirü ashi veyu büa veloulai. Teile süna veyu phaki, Enou neye sü panou avei teidei hi soureih soua huloulai, sübüa tyahrütao hi avei sheeyu nasü ne vanou soungao peilai. 17Raichoki nou phaku-a buyu nasü neye Enou avei kilai Israel maivei rachipaola peiyu maitao hinou paosüpa peiwure, süolouzü teithe süna veyu phaki, Enou mai aliye panou Israel mai hisü reih huvelai.” Haisü Ramai Mapao nou paowe.
Ramai nou Gog ye Tudeiyu
18Ramai Mapao nou paoe, “Gog nou Israel mai hi soureih soulai tea hulouyu teithe zhou sü Enou avei lekha palai. 19Enou avei lekha rarou hinou shapao pawe süolouzü süzhou teithe hi Israel maivei teidei hisü shisho-a nou nüsülai. 20Dzü hi khah ae tei hi raohou, hrikhaona taidu veishi, ae deiphao hi buyu mai hrülai nou Eye ngaopi sho-a nou ngulai. Deichi khesü kaodu talai, chuhlya khesü pepo talai, ae kivo teitei hai pepokoua bailai. 21Enou Gog ye veahoyu tyatyali nou soupi peilai.#38.21 Larübvü ali hi Enou...soupi peilai; Hebrew hi sheesha toumoe. Ramai Mapao Enou paowe. Puhvei maitao hai lah ali nou ali hi khoche nou daotha velai. 22Enou puhye sü sounou ashi zhe kükouyu nou tudee pailai. Teivu ashi ae reithou, süpei hinou mei ae meithou nou puh hi ae puhvei reihmaitao hi alia puhye koa salaiyu tyahrütao hisü koupeilai. 23Haibüa nou Enou tyahrütao hi E hai dusho-e ae sheewe touyu sü soungao peilai. Süthaisü puletao nou E hai Mapao-e touyu sü süloulai.”
Currently Selected:
EZEKIEL 38: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
