EZEKIEL 39
39
Gog nou Hraongu Ngaoyu
1Ramai Mapao nou paoe, “Thai-a bailaiyu punare, Meshek ae Tubal vei tyahrü ahai hi veo nahpoutu Gog hisü aetou more, ae Enou puhye hraiyu maisouta laire tea paopeio. 2Enou puhvei ludu sü poda peiwulai ae puhye dousho-a buyu reilova nou süthaisa-a Israel maivei deichiva hisü save peilai. 3Süthaisü Enou puhvei voulou hai puh bah nalova nou khoulai peiwulai ae puhvei voulouthou hai bah zhoulova nou soulai peiwulai. 4Gog ae puhvei soureih maitao alia puhye koa zhoyu reihmaitao hai Israel maivei deichitao hinou thailai ae Enou puletao vei thaiphao khesü panou toulai. 5Puletaoye panou vakou nou thai-a bailai. Haisü Ramai Mapao Enou paowe. 6Enou Magog teidei hi alia zaipe hinou halia daichoroyu ha-a hrüyu maitao vei teidei hisü meishao peilai, ae mai hrülai nou E hai Mapao-e touyu sü süloulai. 7Enou avei Israel maitaoye panou sheeyu avei zhih sü sütou touloulai, ae Enou mailia panou avei zhih sü souzhaipu peilai moe. Süthaisü tyahrütao nou E hai sheeyu Israel maivei Ramai Mapao-e touyu sü süloulai.”
8Ramai Mapao nou paoe, “Enou paoyu teithe nasü ve vuzülai. 9Süthaisü Israel maivei nuhdutao hinou hrüyu maitao nou tapa thaokhai touyu basei khesü poloulai ae meideilai. Puletao nou rüh, voulou, vouloushu, heung ae süübou khesü poloua po anai koute hai meidei loulai. 10Puletao meideiyu süü hai phoutalai moe, daiolouzü puletao hisü mei deire donou reihbasei hai alao soumoa bua bailai. Puletaoye soushi peiyu ae puletao vei na shaolouyu vei sü shaoloulai.” Ramai Mapao nou haisü paowe.
Gog ye Daovu Peiyu
11 Mapao nou paoe, “Haibüyu teitei hai vepayu thai, Enou Gog ye daovure buh sü Israel maivei teidei, Veihao souyu maivei Deikho, Athai Zai vei teinghei palova nou peilai,#39.11 Hebrew hi larücha adai loupu hie, sütao vei artha hai sheesha tea sümoe. ae deikho sünasü Gog vei Reihmai vei Deikho tea kulai. 12Israel maitao nou thaiphao hai khouh anai koute daovulai ae süthai nou teidei hai soushee loulai. 13Teidei taihinou hrüyu mai hrülai nou thaiphao daovuyu hisü soukha peilai, ae Enou veilouyu teithe zhou hai puletaoye haidonou tsükhou peilai. Ramai Mapao Enou haisü paowe. 14Khouh anai thaisü, puletao nou kamai-a dopaloua nou panou thaiphao daovu chelou moa buyu khesü phouta-a panou daovu peilai, sübüa puletao nou teidei sü soushee peilai. 15puletao nou teidei sü sühaopoa zhutayu phaki, mairao hai bua nou ngaoloure touyu phaki, buh sühisü raopoa buyu maitao nou Deikho hinou daovu peilai. 16(Nuhdu ali Hamonah tea süpe hinou bulai.) Sübüa teidei nasü sousheepu loulai.”
17Ramai Mapao nou ahi haibüa nou paoe, “Thai-a bailaiyu mainare, holo hailo nou buyu raohou ae hrikhaona veishi sü Enou puletaoye donou souda-a buyu posheela nasü tave toukhaio tea kulo. Hai zhou hai Israel maivei deichitao hinou khonü dusho-a nou nüh nüki, ae puletaoye panou sou sü toulai ae zhe sü kelai. 18Puletaoye panou reihmaitao vei thaiphao hai toulai ae deiphao hi khasa-a hrüyu maitao vei zhe sü panou kelai, puletaoye sü zhaotu moa nghitu moa hüveiyu chode dathayu büa southa peilai. 19Enou mai haitaoye posheelayu ali büa southayu phaki, teihi raohou ae soukhaona taonou toulou süyu koute hai touloulai ae puletao nou peilumo koute hai zhe sü kelai. 20Avei tovai buh hisü puletao nou toulou süyu koute hai puletao nou rheitao, rheipfüyu maitao, soureih maitao ae khouko buyu maitao hai toulai. Haisü Ramai Mapao Enou paowe.”
Israel Maiye Podakhai Louyu
21 Mapao nou paoe, “Enou tyahrütao hi avei khouko ava nasü soungao pailai ae puletao hi Enou soulai tea lela khaitouyu nasü soungao peilai. 22Süthaisü Israel maitao nou E hai puletao vei Ramai Mapao-e touyu hai süloulai. 23Ae tyahrü kukhe nou Israel maitao hai lah puletao vei mahmo donou hukhamai soua vakou nüpoa ta-a baie touyu hai süloulai. Enou puletaoye sü ngaobayu maitao nou hraongu soupeia reihbu hinou southare. 24Puletao nou sheemoyu donou ae vah ashi souyu thaifüa soupeia nou baie, ae Enou puletaoye sü thao-a tare.”
25Ramai Mapao nou paoe, “Ana chuo Enou Jakob vei tyaosholea maitao, Israel maitaoye sü zhuvea leshi peilai, ae puletaoye sü sousavapu peilai. Enou avei sheeyu zhih nasü vupeilai. 26Puletao nou lah puletao vei teidei hinou kaozhou vei-a hrüpu louyu thai, ae mai linoua puletaoye soupiyu hai ha-a nou bulouyu thai, Eye khaitya-a ahi nou tarei tayu hai daizhou koute veahosa touyu khesü ngai bailai. 27Tyahrütao hi E hai sheewe touyu soungaore donou, Enou avei maitaoye sü puletao vei ngaobayu maitao hinou hrüyu tyahdei veishi hinou sa-a dakhaive peilai. 28Süthaisü avei maitao nou E hai puletao vei Ramai Mapao nasüe touyu hai süloulai. Puletao nou hai sü süloulai, daiolouzü Enou puletaoye sü hukhamai soua vakou hi seita baie, ana chuo puletaoye sü pove jüloua lah puletao vei teidei hi mailia shokhai peimoa sa-a dakhaive thoupeie. 29Enou Israel maitao hisü avei rako hai seive thoupeilai ae puletao nou ahinou tarei tavai tapukhai toulai moe. Ramai Mapao Enou haisü paowe.”
Currently Selected:
EZEKIEL 39: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
