EZEKIEL 37
37
Thaimai Rao Kirürüa buyu Deikho
1 Mapao vei khouko sünou ahi velou loure, ae puhvei rako nou Eye thaimai rao nou phoutao-a buyu deikho ali hi savere. 2Puhnou Eye süthaisa-a deikho nasü sühao ta-e ae deikho sühisü mairao hai alao bue ae sütao veishi hai kirürüa bubaie. 3Puhnou ahi haibüa nou paoe, “Thai-a bailaiyu mainare, sourao haitao hai hridakhai lousü homoe?”
Enou chila peie, “Süsü Ramai Mapao likhei nou chila peilou süa baie!”
4Puhnou ahi paoe, “Rao haitao hi rachipaola peikhaio. Kirürüa buyu rao haitao hisü Mapao vei chipao keilo tea paopeio. 5Puletao hi Ramai Mapao Enou haibüa nou paowe tea paopeio: Enou neletao hisü ssü sü houthou peilai ae neletaoye hriyu peilai. 6Enou neletaoye ngharai ae souke sü thoupeilai, ae neletaoye sü souhee nou zhopeilai. Enou neletaoye sü ssü houthou peilai ae souhri dakhai peilai. Süthaisü neletao nou E hai Mapao-e touyu sü süloulai.”
7Südonou ahi kharochi peiyu thaifüa Enou rachipaola peie. Enou chi paobe-a buyu teile hinou hakho khesü choupare ae raotao sü tave jüloure. 8Enou zhua buyu phaki, ngharai ae souke khesü souraotao hi ve zholoure, süthaisü souhee nou sütao hisü zholoure. Ana pfüphao sütao hisü ssü hai ha hie.
9Ramai nou ahi paoe, “Thai-a bailaiyu mainare, teikhai#37.9 teikhai; moa rako. Hebrew maila hinou hainasü teikhai, moa rako, moa ssü paolou veie. hisü rachipaola peikhaio. Teikhai hisü Ramai Mapao nou haibüa kharochi peiwe, süolouzü kainghou adai hinou tave thaiphaotao hisü ssü houthou peikhaio ae puletaoye sü souhri dakhai peio.”
10Südonou ahi paoyu thaifüa Enou paopeie. Thaiphaotao hisü ssü houthou peire ae puletao hai hridakhai loua laloure. Puletao hai reihmaime dushoyu ali zhoure.
11Ramai nou ahi paoe, “Thai-a bailaiyu mainare, Israel maitao hai rao haitao raibütoua baie. Puletao nou paoe, ‘Etao hai kirürü tare, areih touyu ali-a hare, ae Etao hai hazei toure.’ 12Südonou avei Israel maitao hisü rachipaola peio ae Ramai Mapao Enou puletaoye sü khüh hinou houpa peilai tea paopeio. Enou puletaoye popa peilai ae puletaoye Israel mai vei teidei hi sa-a dakhaive peilai. 13Enou avei maitao vei khüh hai houpaloua nou puletaoye popa peiyu thai, puletao nou E hai Mapao-e touyu sü süloulai. 14Enou avei ssü sü puletao hi houthou peilai, ae puletaoye souhri dakhai peilai, ae puletaoye sü panou lah puletao vei teidei hisünou pa hrüa bulai. Süthaisü puletao nou E hai Mapao süe touyu hai süloulai. Enou haibüa soupeilai tea chaachou souwure, ae Enou haisü soulai. Mapao Enou hai nasü paowe.”
Judah ae Israel Maivei Vedei Ali
15 Mapao nou ahi haibüa nou paopue, 16“Thai-a bailaiyu mainare, süüru ali polo ae süvasü ‘Judah maivei Vedei,’ tea rülo. Süthaisü süüru kukhe ali-a polo ae sühisü ‘Israel maivei Vedei,’ tea rüthoulo. 17Süthaisü süüru süna ahai sü panou ali bütoua ngaoloure donou ne bah hinou pothou palo. 18Nevei maitao nou haibüa nenou süüru poyu sü daivanoue tea nouyu phaki, 19Ramai Mapao, Enou Israel maivei vedei ae Judah maivei Vedei tea rüthoukhai touyu süüzhu ahai pothou ali soulai tea puletao hisü paopeio. Süüzhu ahai sü abah hinou pothou ali souloua poloulai.
20“Ne bah hinou süüzhu ahai sü polo ae maikhe maiye panou ngaolo. 21Süthaisü Ramai Mapao Enou avei maitaoye tyahrütao hi hupho rarou khaitouyu hinou pove jüloulai ae puletaoye lahvei teidei hi savethou peilai tea puletao hisü paopeio. 22Enou Israel maivei deichitao, puletao vei teidei hinou tyahrü ali soua pove jüpeilai. Puletaoye khasa-a hrüre hai veo ali bailai ae puletao hai tyahrü ahai soua dadepulai moe, moa vedei ahai soua bupulai moe. 23Puletao hai ngaorayu basharatao hinou lah puletaoye souzhaipu laimoe, moa mahmo hinou puletao hai lahye soushipulai moe. Puletao nou vah ashi soua Eye malaiyu veishi hinou pa lahdo souloulai. Enou puletaoye soushee peilai ae puletao hai avei mai soulai alia Enou puletao vei Ramai sü soulai. 24Avei kilai David büyu mai ali nou pa puletao vei veo sü soulai. Puletao hai vemai ali khehinou chavei lathao-a hrülai ae avei chikha khesü soutaosoua zülai. 25Enou avei kilai Jakob hi peikhai touyu teidei puletao vei poupaoh maitao vei teidei hinou hrülai. Puletao nou teisa sühinou hrülai ae puletao vei nahmai tyaomaitao-a sühinou hrülai. Avei kilai David veo büyu vemai ali nou puletaoye khasa-a teisa nou hrülai. 26Enou puletaoye panou teisa nou kaozhou vei-a hrüloure vei vo ali koa nou soupeilai. Enou puletaoye sü soushu peilai ae pletaoye soupoupa peilai alia avei Rathoki nasü puletao vei teidei hi khaipeilai, sünasü panou teisa nou bulai. 27Enou puletaoye koa sühinou hrüpeilai; Enou puletao vei Ramai sü soulai, ae puletao hai avei mai soulai. 28Enou avei Rathoki nasü puletao hi panou teisa sü bure donou khaipeiyu phaki, tyahrü kukhe taonou E hai Mapao-e ae Enou Israel maiye avei mai soure donou dopa loure touyu hai süloulai.”
Currently Selected:
EZEKIEL 37: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
