KOPAODOUWO 11
11
Tsüveiyu Mainou Souyu Vah
1Nevei raokhao sü dzühi laithouwuo, daiolouzü nenou teithe taoli thai ngaoda khailou bailai. 2Nevei kini buyu taohai zha anai moa acha soua dade khailo, daiolouzü deiphao haihi dai shili palaisa tiyu nenou sümoe.
3Teihao nou chaotei loua deiphao va teirü koupeiwe; süübe linou kheko moa reikou kaolou yuma, süübe sünanou kaolouyu buh hisü bubailai. 4Teikhai zhai zhu-a bunasü thoutai vuhthou khailou laimoe; alia teihao vanou tsücho-a bunasü chachi laimoe. 5Nenou kabüa nahbvü hinou nahtu ali hai ssühea loue tiyu sümoyu büa, hali hala soupeio Ramai vei vah sü nenou sümoe. 6Shona nou thoutai vuhlo, alia koukhe-a ne bah thaowuso; daiolouzü nenou sümoe kananou veilaisa tiyu, haina ho tenasa, moa ahai kheinou raibüa veilaisa.
7Ava sü jühmouwe, alia teinghiye zhuyu hai nghithou donou vashoyu lie. 8Mai linou po alao hrülouzü, puhye panou sütao teitei hinou savalo; ana puhye pa teizhiyu teithe hai-a alao bue tiyu tsücholo. Velaiyu teitei hai hamako baie.
9Oh nahlepunare, ne nahle-a bukinou lesalo, alia nevei nahleyu teithetao vanou neye sü panou ne le sousavalo; nenou jüpayu ludu alia nghithou nou ngaoveiyu hisü takhaio. Ana haisü sülouo, akhai hisü hai teitei vanou neye Ramai nou chikulai.
10Nele hinou jüphiyu hai souhawuo, alia ne pfüphao hinou souhyu nasü polaiwuo; daiolouzü khelouyu ae nahleyu-a hamako baie.
Currently Selected:
KOPAODOUWO 11: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
