2 TIMOTHI 2
2
Paoyu Züyu Khrista Jisu Reihmai
1Südonou, Anahpoutu, newo Khrista Jisu ye koa ali soulouyu hinou Eletao vei soua buyu zhuveana hinou khou-a bulo. 2Alia nenou zhopaoh maitaoli nghojünou Enou paoyu chou-choulouyu doupeiyu taosü poloua mai kukhe maiye-a doupei lousü laiyu puletao bah hi lüthou peikhaio.
3Paoyu züyu Khrista Jisu vei reihmai alibüa veayu hisü koa lou zha ngaozho khaio. 4Vah soua buyu reihmai talinoua maisou hrühi koa lou hrüa butamoe, daiolouzü puhvei züpa süwo louzü puh pei chanavei li-choyu soure nasüe. 5Tuvayu mailinou zhaina thaifüa tumo louzü puhnou buusü ngaolou hoe. 6Te-a tatayu puhnou chathou sünavei zha arai nasü ngaozüe. 7Enou pao-a buyu süna vanou tsü chokhaio, daiolouzü Mapao nou neye sütao teitei süloure soukha peilai.
8Enou Avei Ko Aveina hinou paodouyu büa athai hinou hrishu louyu, David tyao-nah hinou veyu Jisu Khristaye li-chokhaio. 9Daiolouzü Enou Ko Aveina paodouyu vanou Esü veahowe ea mah soulaimai ali kua Eye sü hurainou phukhaitoue. Ana Ramai vei chipaowo hurai nou phukhai moe. 10Südonou Ramai nou dolouyu maikhe maitao donou süolouzü puletao-a Jisu Khrista hinou veyu teisa khouko-ava poveyu khailu louyu nasü ngaoloure donou Enou ha teitei hinou shameawe. 11Pao-a buyu haina hai chekhaoe:
“Eletao nou puhye koa thaire toulouzü,
Eletao-a puhye koa hrizholai.
12Eletao nou shamea-a bulouzü,
Eletao-a puhye koa vezholai.
Eletao nou puhye balouzü,
Puh-a Eletaoye balai.
13Eletao nou cheche molouzü,
Puhwo cheche-a bubaie,
daiolouzü puhnou lah puhye sü motou louhoe.”
Ramai nou Aetouyu Vah Soumai
14Puletao hi chi haitaosü paopu peikhaio, alia puletaoye chipaotao vanou veiva more donou Ramai nghojünou kaona-a tuzü peikhaio, daiolouzü sünanou veiyulia soupeimoe, ana kei-a buyu maitaoye souha-kayu likheibaie. 15Acheche vei chipaosü soutaosou sei-a, lah puhvah donou hraoloure hayu vahsoumai alibüa, nelah neye Ramai nou ae-ao toupeiyu maili kua Ramai hi posheela loure soutaosou tekhaio. 16Ahraopayu ea voyuchi phakuyu hinou tareilo, daiolouzü sünanou maikhe maiye Ramai hinou doulailai-a hutawu baiwe. 17Sübüyu puletao vei chi pha-kuyu sü vasouhi cho paloua vasou toulouyu sou süna bübaie. Sübüa doupeiyu puletao hrohinou mai ahaiwo louzü Humena ea Philetas süe. 18Puletao sü cheche ludu hinou tala tare ea chuo hrishuyuhai pachere tea pao-a lüloumai kamaitao vei lüsü puletao nou souhare. 19Sütoukhaia Ramai nou soushupa khaitouyu kifü sünawo louzü soukho louhoe; alia süpei hisü sükua paoshee soukhaitoue: “Mapaowo nou puhmai soua buyu taoye sü süwe” ea “Mapao vei zhih ku-a buyu maitalinou ashi soua buyu hinou tarei talou vuzülai.”
20Kidu ali hisü sana ea shahu vei pai-khao likhei bubaimoa süü ea nai vei pai-khao-a bue; alia sütao hronou kamaiye sü teile veiki seiloure ea kamaiye sü teile taki seiloure donou khai khaitoue. 21Maitalinou puh lah ashi sütao teitei hinou sousheeloua bulouzü, puhwo vah vei hi seiloure donou sousheewuyu paopunou seiloure moshilaiyu vahvei tali donou souda khaitouyu pai-khao büe. 22Südonou nahlemaivei pfüphao züpa nasü thaowuwo, alia le sheetouyu hinou Mapao hi soukha khoa buyu maikhe maitaoye koa, acheche, lü, leshi ea kaonayu sütaosü te-a phoulo. 23Ana avoyu ea tsü ha-a veivayu sütao hinou tarei talo; daiolouzü sütaonou zü-veiyu povepeiwe touyu sü nenou süwe. 24Mapao vei kilaimai sü zü-vei sülaimoe. Puhsü avei ea shamealou süyu dou-apeimai ali soua maikhemai hrülaiye zhuvea peilousü vuzülai, 25alia puhye ngaobamai taoye kaonayu hinou paodouzü peilai, daiolouzü Ramai nou puletao hi panou ledaloua acheche naye süloure teile avei peilouveie. 26Alia sükua rashi nanou puhvei li-choyu sü panou souloure donou puletaoye niloukhaia puletao nou puhvei sho-rüh hinou tupaloulai.
Currently Selected:
2 TIMOTHI 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
