2 TIMOTHI 1
1
Zhu Shingaoyu
1Eletao nou Khrista Jisu ye koa buyu hinou ngaolouyu apaopei khaitouyu ahrü nasü shangao peire donou seita-a buyu Ramai tsüdo hinou Khrista Jisu vei sei-atamai ali soua buyu Paul nou —
2Enou leshiyu nahpoutu Timothi hi rüwe:
Puo Ramai ea Eletao Mapao Khrista Jisu nou nehi zhuvea khu-leshi ea kaonayu peiyu sü souloutheo.
Kalo Paoyu ea Le Soudu Peiyu
3Apuo-pao maitao nou souyu büa Enou sheetouyu lekhetsü hinou kuvah soua laiyu Ramai puhye kalo paowe. Enou hea-khei veachi paoyutsü neye li-choa puh hi kalo pao-a bue. 4Enou nevei nghidzü sü li-choloua, Ahi panou sayu sünanou phoupei loure donou Enou neye ve daoresü züpashoa bue. 5Nehi buyu cheche lü nasü Enou li-chowe. Lü sünasü raia nepai Lois hi bue ea süthaisü nepfü Eunis hi-a bue ea süsü chuo nehi-a buvuzüe tea Enou chowe. 6Sübüyu vanou Enou nepei hi bah lakhaiyu ki Ramai nou nehi peikhai touyu sapeina nasü panou mei tao-a buloure donou Enou nehi li-cho pupeiwe. 7Daiolouzü Ramai nou Eletao hi piyu rako peimoe ana khouko, leshi ea lahye tukhalou süyu vei rakona peikhaitoue.
8Südonou Eletao Mapao donou moa Khristaye donou hukhamai soua buyu Avanou zhopaoh souyu hisü ahraowuso, ana Ramai khouko hinou Ko Aveina donou talou veayu zha nasü ngaozho khaio. 9Puhnou Eletaoye khailu peie ea lah puhmai souloure donou Eletaoye kuloue, süsü Eletao vei vahvei donou moe, ana lah puhvei aroh ea zhuvea vanoue. Puhnou zhuvea hainasü Khrista Jisu vanou teideiphao soushumo jühinou Eletao hi peire, 10alia chuo süsü Eletaoye khailu-apeio Khrista Jisu nou veyu vanou Eletao hi pongao peire. Puhnou athaivei khouko nasü souhare ea Ko Aveina vanou teisa ahri nasü pongao peire.
11Ko Avei haina donou Ramai nou Eye ko paodou-apeimai, sei-atamai ea dou-apeimai ali souloure doloure, 12alia sübüyu donou Enou veayu haitaosü dao-a bue. Ana Ewo ahraomoe, daiolouzü Enou loucheyu puhye sü Enou süwe, alia puhnou Ahi lüthou peikhai touyu nasü teithe süki koute puhnou khopei lousüe tea Enou louchewe. 13Nenou Ahinou choulouyu acheche chipaotao vei zhai taosü soutaosoua thaifülo, alia Khrista Jisu ye koa ali soulouyu hinou Eletao vei soua buyu lü ea leshina hinou bulo. 14Nehi lüthou peikhaitouyu acheche nasü Eletao lekhe hinou hria buyu Rako Mashi vei khouko vanou khotoulo.
15Phugelas ea Harmogenes-a koa loua Asia teideihi buyu maikhemai veishi nou Eye thaowu-a tare touyu sü nenou süwe. 16Mapaowo nou Onesiphoras kikha maiye zhuvea peiyu souloutheo, daiolouzü teisa nou puhnou Ale sousapeie. Ehai hukhahi bumai alie touyu vanou puhnou ahraoyu hae, 17ana puhnou Rom hi tavelou bükhaie Eye daoloure lenoushoa phouta-a Eye ve ngaoloue. 18Mapaowo nou puh zhuveasü teithe süki puh hi peiyu souloukhaio! Alia Ephesa hinou puhnou daizhozhou Eye donou kuvah soupeisa touyu sü nenou sütoua bue.
Currently Selected:
2 TIMOTHI 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
