2 TIMOTHI 3
3
Akhai Teithetao
1Ana akhai teithetao hisü tatei shoyu pha-teile velai touyu sü süa bulo. 2Daiolouzü maikhe mainou haibülai süolouzü, lahye leshi baiyu, loküyu, aduzhai souyu, khaophu souyu, chi souyu, pfüpuo chi zübayu, soupei muh sümoyu, sheemoyu, 3leshilou sümoyu, maiye khaipeilou hoyu, maichi-maila paoshiyu, lahye tukhalou sümoyu, ssü shiyu, avei naye ngaorayu, 4khei-a ngaobamai mü boyu, le souyu, nou khouyu, Ramaiye leshiyu jünou pfüphao vayu naye leshiyu sükuyu sü palai; 5puletao nou vakouhiwo louzü Ramaiye lüyu zhai soulai, ana sünavei acheche khouko süwo louzü balai. Sübüyu maitao hinou tarei talo. 6Daiolouzü puletao hrohinou kamainou ki kihi taloua lah puletao vei mah vanou kou süa pfüa buyu ea ashiye züpayu tyaliye panou süthaia laiyu, 7maitali chi teisanou keinü-a buyu ana hatakia acheche naye sü sülou hoyu, lelou hoyu naotumai taoye sü puletao nou koloure. 8Janne ea Jambre nou Mosesye motouyu büa, tsü shitayu ea lü hinou ha-ka tayu mai haitao nou-a acheche naye sü motouwe. 9Ana puletaosü vei-a phasho takoulou laimoe, daiolouzü mai sühaibüa puletaosü daizhozhou vosa touyu sü maikhemai hrülainou ngaolai.
Akhaisoua Doupeiyu Chitao
10Ana newo Avei doupeiyu, Azhaidou, alia Ahrühi soure tsüdo, Alü; Avei shameayu, Avei leshi, Avei teisanou shameayu, 11mainou Eye souvea-souhoyu ea Avei veahoyu sütao veishi thaisü füloure. Antiok, Ikonia ea Lustra hinou Ahi dai pasa süolouzü daizhozhou ngaopi-a souveayu sü Enou shameasa touyu teiteisü nenou sükhaiwe! Ana Mapaowo nou sütao veishi hinou Eye vupapeie. 12Acheche nou Khrista Jisu ye koa rahrümai hinou hrüyu züpayu mai taye sü souvea-souholai; 13alia mai ashimai ea aveikho soumai taosü mai kukhe maiye la-a ea lah puletaoye-a la-a shikhai shikhai tabailai. 14Ana newo nenou sülouyu ea soutaosoua louche louyu hinou tobai soumoa bulouwo. Nenou neye dou-apeimai taosü thaohmaisa touyu sü süwe, 15alia kabüa nenou taibu kinou Khrista Jisu ye lülouyu vanou neye khailu peiyu hi süthaithou peiyu ratsüna peilou süyu sheeyu larübvü taosü sülouresa touyu sü nenou süwe. 16Sheeyu larübvü teiteihai Ramai nou süpeie ea süsü achechena doupeire donou, mahyu naye züpeire donou, kao-zümoyu sü souzü peire donou, alia cheche hrü hrüloure doupeire donou zhishoe, 17alia haibüa Ramai vei kuvah souyu maisü vahvei tali souloure donou liche-a souda chekhou loulai.
Currently Selected:
2 TIMOTHI 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
