1 SAMUEL 7
7
1Südonou Kiriath Jearim hi mainou ve Mapao vei Vo Sübvü nasü poloua deichi vanou buyu Abinadab ki hisü pove khaiwure, ae puh nahpoutu Eleazar ye panou Vo Sübvü nasü zhure donou sousheeloua vahbu thoupeie.
Samuel nou Israel Maiye Khasa-a Hrüyu
2Teile taoli, po kai phali hai Mapao vei Vo Sübvü nasü Kiriath Jearim hinou bure. Teile süphaki Israel mai hrülai nou kra-a Mapao hinou soukha sü kho-e.
3Samuel nou Israel maitao hisü paoe, “Neletao vei tsüle teitei nou peia Mapao hi dakhai veloua vakou maivei rahtao, ae Ashtaroth vei basharatao sü thaokhai louzü, alia neletao vei hrü hai Mapao hi peithou khaiwua puhye likhei tho bailouzü, puhnou neletaoye Philistin mai bah hinou vupa peilai.” 4Südonou Israel mainou Baal ae Ashtaroth basharatao sü thaokhaiwua Mapao ye likhei tho-a baire.
5Süthaisü Samuel nou Israel mai hrülaiye Mizpah hi tave jülo tea kue, daiolouzü puhnou puletaoye donou Mapao hi veachi paopeilai tea paosüta peie. 6Südonou Israel mai hrülai hai Mizpah hinou ve jüloure. Puletao nou dzü poloua Mapao hi posheela soua lazü peie, ae süzhou teithe hai puletao nou ha toumoa lüh-e, alia puletao nou haibüa paoe, “Etao nou Mapao nghoujü nou mah sü souwure.” (Samuel nou Mizpah hinou Israel maivei chilou khesü kupeiwe.)
7Israel mainou Mizpah hinou velou jüa bure touyu ko hai Philistin mainou sülou khaie, Philistin hi veo mai angou taonou Israel maiye reih soulai tea souda-a bure. Israel mainou ko haisü choulou khaie, ngaopi shore, 8ae puletao nou Samuel hi haibüa paoe, “Philistin mai bah hinou Etaoye vupa peire donou Etao Ramai Mapao hi veachi paokhaio.” 9Südonou Samuel nou nao khomoyu zhaotu ali dathaloua Mapao hi teitei nou poa meidei-a sheela peie, ae Samuel nou kra-a Mapao hi veachi paoe, alia Mapao nou puhvei veachi sü noupeie. 10Samuel nou meideia posheela peia buyu teile hisünou Philistin mainou Israel mai hisü reih hukoure, ana süzhou hai Philistin mai pei hisü Mapao nou chishoyu kho sünou teisüyu büa puletao vei tsü sü souha peiwure, ae puletao hai bürarou poa Israel mai nghoujü nou tupo rarou tare. 11Israel mainou Mizpah hinou tapa Philistin maiye hupoa Bethkar hi koute reih hukou peie.
12Süthaisü Samuel nou chuh ali poloua Mizpah ae Shen kohinou shola loue, ae haibüa paoe, “Mapao nou Etaoye chu koute-a soukha peiwe,” südonou puhnou chuh sünasü “Soukha peiyu Chuh” tea zhih sapeie. 13Sübüa Israel mainou Philistin mai jünou reih veiloue, ae Samuel nou hria buyu koute hai Mapao nou Philistin maiye panou Israel maivei teidei hi reih hulou moe. 14Philistin mainou Israel mai hinou polouyu nuhdutao, Ekron ae Gath kohinou buyu teitei sü Israel mainou podakhai loure. Alia Israel mai ae Kanaan mai-a koa kaona-a nou hrüe.
15Samuel nou hria buyu koute hai puhnou Israel maiye khosa-a hrüpeie. 16Puhnou po patsü hai Bethel, Gilgal, ae Mizpah, alia buh kukhe hia tasühao poa nou maikhe maivei chilou khesü kupeie. 17Süthaisü puhnou buyu Ramah nuhdu hi dakhai ve bue, ae puhnou buyu buh hia maikhe maivei chilou khesü kupeiwe. Ramah nuhdu hinou puhnou Mapao ye posheelabu ali soushu peie.
Currently Selected:
1 SAMUEL 7: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
