1 SAMUEL 6
6
Vo Sübvü Seidakhaive Peiyu
1 Mapao vei Vo Sübvü nahai Philistin maivei teidei hinou khouh anai bure. 2Süthaisü Philistin mainou napao maitao ae keingumai hrülaiye kupo veloua nou puletao hi noue, “Mapao vei Vo Sübvü donou Etao daipha soulaige? Etao hainasü raichoki buyu buh hi seidakhai ve peilai toulouzü kabüa seitalai?”
3Puletao nou paoe, “Neletao nou Israel maivei Ramai vei Vo Sübvü nasü seidakhai ve peilai toulouzü, neletao nou mah soukhai touyu donou posheela noupu koa seidakhai vepeio. Vo Sübvü nasü panou sakhai-a taso, sükulouzü neletaoye souvei peishulai, ae puhnou daisounou neletaoye souvea peisa touyu hai-a süloulai.”
4Maikhe mainou “Etao daina nou koa seitalai?” tea noue.
Puletao nou haibüa chila peie, “Philistin maivei veo mai angou buyu thaifüa sanake angou hai maah pa-a souyu zhairai hinou soulo, ae sanake angou hai zhao zhurai hinou soulo; daiolouzü neletao mai hrülai vahi ae veo mai angoutao va hisü maah pa-a veasho-a nou souyu sü peie. 5Neletao nou maah pa-a souyu zhairai ae neletao teidei soushi-a buyu zhao zhairai souloua Israel maivei Ramai ye tsükhou peio, sükulouzü puhnou neletao pei hi, neletao vei ratao pei hi ae neletao vei teidei hai soushipu moa khaipei shulai. 6Daisounou neletao hai Ejipt maivei veo ae Ejipt mainou le khoushoyu büa neletao vei tsüle-a khoushowe? Ramai nou puletaoye soushi chekho peiyu thainou, Israel maitaoye Ejipt maivei teidei sü panou thaokhaiwua tashe touyu hai ngai peiso. 7Südonou choluki ashu ali soudalo, ae sa-a tatakhai toumoyu chokü ahai phoulo, alia choluki nasü chokü sühai phao hi daokhai peio, ana chotoutu sü ki hi hupove khaio. 8Mapao vei Vo Sübvü nasü choluki phaova khailo, ae neletao nou mah soukhai touyu donou posheela peire sanatao sü Sübvü pe hi khailo. Süthaisü choluki nasü panou ludu hi lah likhei tawo. 9Süthaisü kabüa tayu zhukhaio; choluki nanou touleipoa Beth Shemesh hilova tare toulouzü, Etao pei hi shishoa nou veahoyu hai Israel maivei Ramai nou seivewe touyu süloulai, ana sükua tamore toulouzü Etao pei hi veaho veyu hai lah tebüa vepa-a baie touyu süloulai.”
10Puletao nou paopeiyu büa souloure. Chotoutu naonao-a buyu chokü ahai sü choluki hisü khikhai loure ae chotoutu sü choki hi huthou bekhaiwure. 11Puletao nou Mapao vei Vo Sübvü nasü choluki va popa thoupeiwure, ae sana nou zhao ae puletao vasou hi maah pa-a soua buyu zhaitao hinou soukhai touyu sanatao sü sübvü ali hi thouloua koa khaipeire. 12Chokü ahai sü choluki pfüloua Beth Shemesh hilo tayu ludu hilo vasü rapoa toulei nou tare. Philistin hi veo mai angoutao-a thaifüpoa nou Beth Shemesh deirai hi koute zhupoa ta-e.
13Süphaki Beth Shemesh hi mai hai deikho hinou southou chachia nou bue, ae puletao nou lashu zhuyu phaki Vo Sübvü nasü chokü ahai nou choluki hinou pfüpoa laiyu ngaolou khaie, puletao hai asa shore. 14Choluki nasü Beth Shemesh hinou hrüa buyu Joshua vei dou hinou takou chaore, ae süpe hi hai chuhdu ali bue. Maikhe mainou choluki soukhai touyu süütao sü hrapaloua chokü ahai hai datha poshu Mapao hi meidei-a posheela peie. 15Levi maitao nou Vo Sübvü ae sana nou soukhai touyu zhurai thoukhai touyu sübvü nasü poloua chuhdu phaova popa khaiwure. Süthaisü Beth Shemesh hi mainou Mapao hi meidei-a posheela peie ae sheela kukhe-a posheela peie. 16Philistin hi veo mai angoutao-a puletao nou soua buyu teitei zhua nou bue, süthaisü süzhou nou puletao hai Ekron nuhdu hi dakhai tare.
17Maah pa-a souyu zhairai hinou sanake angou hai Philistin mainou souloua Mapao hi puletao nou mah soukhai touyu donou posheela soua seive peie, süsü puletao vei nuhdu angou— Ashdod, Gaza, Ashkelon, Gath ae Ekron thaosoua seive peie. 18Ae puletao nou sana nou zhaoti zhairai angou souloua seive peiyu hai Philistin maivei veo mai angou taonou khasa-a hrüyu nuhdutao ae nuh teidei hi kaopo poa soukhai touyu nuhdutao alia kaopo poa soumoyu nuh teitei donoue. Beth Shemesh puona Joshua dou hinou Mapao vei Vo Sübvü pokhaiyu chuhdu nahai zhaodao koute-a shaki soua bue.
19 Mapao nou Beth Shemesh hi mai rainai hai southawure, daiolouzü puletao nou Vo Sübvü hi dai-e busa tea zhuwure. Mapao nou mai taoliye southayu donou maikhe mai hai puletaoye donou dopfüa bue.
Kiriath Jearim hi Vo Sübvü Khaiyu
20Süthaisü Beth Shemesh hi mainou paoe, “Thaonou Sheeyu Ramai Mapao nghoujü nou lalou süyu buge? Puhvei Vo Sübvü nasü thaohi seive peilaige?” 21Puletao nou Kiriath Jearim maitao hi haibüa ko seitare, “Philistin mainou Mapao vei Vo Sübvü nasü Etao hi seive peikhai toure. Takou haina sü poloua neletao hi pove khailo.”
Currently Selected:
1 SAMUEL 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
