1 SAMUEL 8
8
Maikhe Mainou Veo Khoyu
1Samuel nou tsüpayu thai, puhnou puh nahpoutu maitaoye panou Israel maivei chiku-apeio mai soue. 2Nah tsüna zhih nou Joel toue, ae thaihou na zhih nou Abijah toue; puhai china ahai khinou Beersheba hinou chiku-apeio mai soue. 3Ana puhai china hai puh puo nou tayu büa tamore; lah viloure ludu phoua maikhe mai hinou seihla poloua chilou khesü kaozü hinou chiku peimore.
4Süthaisü Israel maiye süthai apei mai hrülai nou tave jüloua Samuel nou buyu Ramah hisü vere, 5ae puletao nou haibüa puh hi paoe, “Zhukhaio, ne sü tsüloure, ae ne nahpoutu ahai sü nenou tayu büa tamore. Südonou tyahrü kukhe maitao büa Etao pei hinou khasa-a hrüre donou veo ali phoupeio.” 6Puletao nou veo dopeio tea khoyu sü chouloua Samuel hai levea shore, südonou puhnou Mapao hi veachi paoe, 7ae Mapao nou haibüa chila peie, “Maikhe mainou ne hi paoyu chi veishi keitou toulo. Daiolouzü puletao nou neye malai moe, ana Eye malai-a baie ae puletao nou Eye sü panou puletao pei hi veo souba-a baie. 8Enou puletaoye Ejipt hinou sapa peiyu nou poa zhou koute hai puletao nou ahinou tarei poa rah kukhe taoye tho tare, ae puletao nou ahi souyu bütoua ne hia souwe. 9Südonou puletao nou khoyu nasü kei peio, ana puletao pei hi veo mainou haibüa khasa-a hrülai touyu veishi hai soutaosoua paongaotou toupeio.”
10Südonou Samuel nou puh hinou veo mai ali dopeio tea khoyu maitao hisü Mapao nou paoyu chipao teitei hai paongao peie. 11Puhnou haibüa paopeie, “Neletao pei hinou khasa-a hrüre veo nou haibüa neletaoye sa-a vah soulai: Puhnou neletao vei nahpoutu maitaoye panou puhvei reihmai soulai; kamai-a panou puhvei rheiluki pfüyu mai soulai, kamai-a panou rheiluki pfüa soureih soulai, ae kamai-a panou rheiluki nghoujü nou tutalai. 12Puhnou kamai-a panou mai theli peikhoyu mai, ae kamai-a panou mai raingou pei khoyu mai soulai. Puhnou neletao vei nahmai taoye sü sa-a puhvei dou hinou tatalai, kamaia sa-a chachilai, ae kamai-a sa-a panou puhvei reih basei sü soulai, ae kamaia panou puhvei rheiluki khesü soulai. 13Puhnou neletao vei nahmai taoye sü saloua panou puhvei poukai nüvei sü soulai, kamaia panou likhao soulai, ae kamaia panou raokhao khaoyu mai soulai. 14Puhnou neletao vei veikayu dou, darkha kipei ae oliv kipei khesü poloua puhvei peikho maitao hisü peilai. 15Puhnou neletao vei thoudzü ae shinamara khesü zha kirou hinou zha ali hai poloua puhvei peikho maitao ae kilai maitao hisü peilai. 16Puhnou neletao vei qila maitao, veikayu kikhaorü#8.16 kikhaorü; Hebrew nahlemai. khesü saloua panou puhvei vah soulai. 17Puhnou neletao vei kikhaorü hai zha kirou hinou zha ali hai poloulai, ae neletaoye sü panou puhvei qila sü soutawulai. 18Sübüyu teile veyu phaki, neletao nou dokhai touyu veo donou veaho shoa raolai, ana süzhou sü Mapao nou neletao vei khoyu nasü kei pei laimoe.”
19Ana maikhe mai hai Samuel vei chi sü pobare, ae puletao nou haibüa paoe, “Moe, Etao pei hi khasa-a hrüre veo mai ali jüpawe. 20Sübüa Etao-a tyahrü kukhe maitao büa Etao vei veo panou Etao pei hi khasa-a bure donou ae Etao nou soureih souyu phakia Etaoye süthaisa-a panou soulai.” 21Samuel nou maikhe mainou chi paoyu veishi sü keiloua Mapao hi paopeie. 22Ae Mapao nou Samuel hi paoe, “Puletao nou jüpayu nasü soupeio, ae veo mai ali sü dopeio.” Süthaisü Samuel nou Israel maitao hi paoe, “Neletao lahkuku ki hisü dakhai tawo.”
Currently Selected:
1 SAMUEL 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
