HOSEA 9
9
Israel mite hremna tûr Hosean a puang
1Aw Israel-te u, hnam dangte kût hmangin
Hlim ve bûng bûng suh u,
Chu chu in Pathian laka uirena a ni.
Hruihzâwl tina i nawhchizawrh hlawh chu i thlahlel a,
2Hruihah leh grep khurah chuan
Kham khawp i hmu lo vang,
Uain thar tûr a awm hek lo vang.
3 Lalpa ramah an chêng reng lo vang,
Efraim chu Aigupta ramah a chhuktîr ang a,
Ṭhenkhat chuan Asuria ramah ei thiang lo an ei ang.
4 Lalpa hnênah uain an hlân lo vang a,
An inthawinate chuan a tilâwm hek lo vang.
Lusûnte ei ṭhin ang chaw an ei ang a, a ei apiang an bawlhhlawh ang.
An chaw chu anmahni pumpuarna mai a ni ang a,
Lalpa hnên a thleng lo vang.
5 Lalpa puala khâwmpui urhsûn a lo thlen ni chuan,
Eng nge in tih tâk ang le?
6Chhiatna lo thleng tlânsantute chu,
Aigupta-ah an tlân khâwm ang a,
Memfis hmunah phûm an ni ang.
An tangka ro hlûte kangṭhaiin a bâwm ang a,
An chênna inahte pawh hnimhlîngnei a khat ang.
7Hremna ni chu a lo thleng ta,
Sual man hmuhna ni chu.
Israel-te u, hre teh u,
In sual êm avâng leh in luhlul êm avâng zâwkin
Zâwlnei chu, ‘mi â’ in ti a,
Thlarau mi chu, ‘Mi â bawraw,’ in ti ṭhîn.#Lk. 21:22.
8Zâwlnei chu, ka Pathian mi,
Efraim-ho vêngtu a ni a,
A kalna apiangah thang an lo kam a,
A Pathian inah pawh an dodâl a ni.
9Gibea khuaa suahsualna#9:9 Levia chi mi pakhat hmei he khuaah hian Benjamin-hovin an tihhlumsak thu kha a ni (Ro. 19-21). ang khân
an sualna chu a râpthlâk a,
Pathianin an bawhchhiatnate a hre reng si a,
An sualna avâng chuan a hrem ngei dâwn a ni.#Ro. 19:1-30.
Israel sualna nghawng
10Israel chu thlalêrah khân grep angin ka hmu a,
In pate pawh theipui hmin hmasa angin.
Nimahsela, Peor tlânga Baal#9:10 Israel-ten Moab mite an pâwlnêl thu Num. 25:1-5 kha a ni. chu an pan a,
An ngaihzâwng pathian tenawm tak ang chuan
Zahpuiawm takin an awm ta a. #Num. 25:1-5.
11Efraim ropuina chu sava angin a thlâwk bo ta,
Nau hring te, nau pai te an awm tawh lo vang.
12An fate awmtlei mah se,
An vaiin an sûn vek ang a.
Anni chu ka kalsan hun chuan,
An chan a va chau dâwn tak êm!
13Efraim chu Tura angin ram ṭha taka a awm ka hmu a,
Mahse, Efraim chuan thah atân mai fa#9:13 ‘A fate chu talh tûrin an vai ka hmu,’ tih theih a ni. a ngah a ni.
14Aw Lalpa, an tân eng nge i tihsak ang?
Nau chhiattîr la, an hnutetui tikang ang che.
Israel chunga Lalpa rorêlna
15Gilgal-ah an sualna a hluar ṭan a,
Tah chuan a ni ka huat tâk ni.
An thil sual tihte avângin ka hmangaih tawh lo vang.
An hruaitu zawng zawngin min helsan ta si a.
16Efraim chuan chhiat a tâwk ta,
A zung chenin a ro zo va,
Rah a chhuah thei ta lo.
Nau pawh hring se, an duh lai,
An rîla rah chu ka tihlum ang.
Zâwlneiin Israel chungthu a sawi
17A thu an awih loh avângin
Ka Pathian chuan anni chu a hnawt darh ang a,
Hnam dang zîngah an vâkvai ang.
Currently Selected:
HOSEA 9: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
