AMOSA 1
1
1Juda lal Uzia te, Israel lal Joasa fapa Jeroboama te lal lai, lîrnghîn hma kum hnihah khân,
Tekoa berâm vêngtu Amosa chuan
Israel-te chungchâng inlârna hetiang hian a hmu:#2 Lal. 15:1-7; 2 Chr. 26:1-23; 2 Lal. 14:23-29.
2‘Zion tlâng aṭangin Lalpa chu ring takin a au va,
Jerusalem khua aṭangin a lo ri hum hum a,
Berâm tlatna hmuna hnimhringte chu a ro zo va,
Karmel tlângchhîpa hnimte pawh a ro zo ta,’ a ti a. #Joel. 3:16.
Suria
3 Lalpa chuan heti hian a ti:
“Damaska mite chu chin tâwk nei lovin an sual#1:3 Heb. ‘vawi thum vawi li.’ A zin ai mahin uchuak taka an tih sawi a ang. a,
Ka hrem ngei ngei dâwn a ni.
Gilead mite chu buhvuakna thîrkut zumin
An hai hrep avângin. #Isa. 17:1-3; Jer. 49:23-27; Zak. 9:1.
4An lal Hazaela inah mei ka chhuah ang a,
Ben-hadada in#1:4 Suria lal Hazaela leh a fapa Ben-hadada in tak tak emaw, an chhûngkaw thu emaw a kâwk kawp. chu a kâng chhe vek ang.
5Damaska khaw kulh kawngkhâr chu ka tichhia ang a,
Aven ruama chêngte chu ka tiboral ang a,
Beth-edena#1:5 ‘Aven ruam’ hi ‘bawhchhiatna ruam’ tihna a ni a, ‘Beth-eden’ hi ‘in nuam’ tihna ang a ni bawk. lalte pawh an boral bawk ang,
Suria mite chu Kir ramah salah an hruai ang,”
Lalpa chuan a ti.
Filistia
6 Lalpa chuan heti hian a ti:
“Gaza mite chu chin tâwk nei lovin an sual a,
Ka hrem ngei ngei dâwn a ni.
An mi mante Edom hnênah salah an hralh ṭhîn a. #Isa. 14:29-31; Jer. 47:1-7; Ezek. 25:15-17; Joel. 3:4-8; Zef. 2:4-7; Zak. 9:5-7.
7Tichuan, Gaza khaw kulh bang chungah mei ka chhuah ang a,
An lal inte chu a kâng ral ang.
8Asdod mite chu ka tiboral ang,
Askelon rorêltute nên,
Ekron mite chungah kut ka thlâk ang a,
Filistia mi la awm chhunte chu an boral ang,”
Lalpa Pathian chuan a ti.
Tura
9 Lalpa chuan heti hian a ti:
“Tura mite chu chin tâwk nei lovin an sual a,
Ka hrem ngei ngei dâwn a ni.
An mi mante#1:9 Filistia mite (1:3) leh Tura mite hian khaw tê deuh beiha, a khua khuaa sala hralh an chîng a ni âwm e.
Edom hnênah salah an hralh a,
Unau thuthlung an bawhchhia a ni. #Isa. 23:1-18; Ezek. 26:1—28:19; Joel. 3:4-8; Zak. 9:1-4; Mt. 11:21,22; Lk. 10:13,14.
10Chuvângin, Tura khaw kulh bang chungah mei ka chhuah ang a,
An lal inte a kâng ral vek ang.”
Edom
11 Lalpa chuan heti hian a ti:
“Edom mite chu chin tâwk nei lovin an sual a,
Ka hrem ngei ngei dâwn a ni.
A unaupa#1:11 Edom-ho hi Esauva thlah an ni a, Jakoba thlahte nên unau an ni rêng e. khandaih nên a ûm a,
Lainatna rêng nei lovin a sawisa a.
A thin a ur êm a, a thinrim rêng a reh thei lo. #Isa. 34:5-17; 63:1-6; Jer. 49:7-22; Ezek. 25:12-14; 35:1-15; Oba. 1-14; Mal. 1:2-5.
12Chuvângin, Teman khuaah mei ka chhuah ang a,
Bozra khuaa lal inte chu a kâng ral ang.”
Amon
13 Lalpa chuan heti hian a ti:
“Amon mite chu chin tâwk nei lovin an sual a,
Ka hrem ngei ngei dâwn a ni.
An ram zauh duhin Gilead hmeichhe nau pai pumte lam an taithlêrsak a, #Jer. 49:1-6; Ezek. 21:28,32; 25:1-7; Zef. 2:8-11.
14Chuvângin, Raba khaw kulh chu ka hâl ang a,
An lal inte chu a kâng ral ang.
A kâng ri chu indo nia au thâwm leh
Thlipui tleh vut vut ang hi a ni ang.
15An lal chu, an miliante nên, salah an hruai ang,”
Lalpa chuan a ti.
Currently Selected:
AMOSA 1: MIZCLBSI
Highlight
Copy
Compare
Share
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
