PHILIPPIA 4
4
1Amatah nache kaarang ae, inuw yntuwhcheh mahmuw i inempak kaning sikna, nentu nenri chaap nakhe inempak karotha rohna vokhehkho yngaeniining. Kaarang ae, apha vakhaena Aafhuw rumingna inehther ing ngiirruw. 2Iuodia re Sintik, nenuw yngkheh re yngkheh Aafhuw rumingna ningsiih ympiruw ta ingka kathamsah nahchuw.
Pol ing Athamsah
3Kaanruwfhuw nenuwkho havana rupanuw ae i bomsa aeruw, yngkhaena ynchii imbe Klemen vokhehkho reentaang kaarang ae enruming Thangnang thiimbuwrna ynthin vasah ae inge isa chong kavorlae inempak ymbomsahpae.
4Nenuw vakhae Aafhuw ruming nache ynchaar nuwna rotharohchu phasaruw ta ingka athar kariirsahnah!
5Amee siirna isa barungriir mandang-ruw. Aafhuw chu athar jungthenglo achiinah. 6Barungriir manjamahruw changvakonchu nemanden khaena Thangnang ting ympah thoh ynruw ing heniihruw. 7Laaruw mee ing amanghuw aangkheng athiseh Thangnang tanii idae inche, Jesu Khrista jaarna nenbarungriir vokhehkho nenvakharchu ingahpeeh vaata.
8Achiniina kaarang ae, ichum, isa barungriir, adongchang omah, iseeng, isapak, thang saknii, isa nong, ympahnii havi omnave, hava vakhae i nenbarungriirna kharruw. 9Nenuw ing nentamsah, nenpha, nensii vokhehkho nemu aangkheng havi itupeehruw. Amanche idae ympeeh Thangnang ing nenuwchu eenruwfhuw vaata.
Kikthuur khaena Isuursah
10Nenuw ing athar vokheh ymbomsahchuw khaena Aafhuw ningna inempak karotha rohsakna. Nenuw ing kichu bomnung chuwka nenchii ichacheh mahchu kamanghuwsa. 11Ki kavaehnii khaena ichong mahping; akhaechuve nemkhang nakho, tuumkhang nakho kapenniichu katamsahpa. 12Ki ing omah nakho, omchir nakho iringniichu kamanghuwsa. Ven ynva vakhang nakho, venchaam vakhang nakho, ynriimjor vakhang nakho amanche kavaehnii vakhang nakho ithuwhpak ipensahniichu kamanghuwpa; 13yngkhaena ynchii imbe kichu ruwreng ymmanpir Khrista ajaarnache aangkhenglaang katuchehsa.
14Changkhangnare kajanii nache sarup nenja khaena inempak sakna. 15Philipia nenuw ing nemanghuwsa, amachuve mamaenna Mesidonia bathen ingka isa chong itong kasirae nenuw mahnaka ruwrthiing achuw kho ipeehsah vokhehkho iphasahnii khaenache omah. 16#Nong 17.1#2 Kor 11.9Thesalonika nache ibomsahnii kaadik chukho nenuw ing athar athar ynjebathen peehchuw. 17Ki ing kikthuurchu kajongmahva, changvakonchu nengkhaena ahenthisehnii aanlachu kajongva. 18Atatak ing aangkhenglaang kaphasa vokhehkho ivaeh omahdeh ing, neningtanii kikthuurchu barim ningsiihniipak Thangnang ing aru vokhehkho penniivachii chaatha ynsuwhvaang, Ipaphroditas tanii phasa ingka ivaeh omahsing. 19Ka Thangnang inche kaaniivanenchii aangkheng Jesu Khrista ajaarna alaar isa om lerchiichu ipivaata. 20Atii Thangnang vokhehkho apa ningnache ympah ynsuwhrasii.
Achinii Chong
21Jesu Khrista ningna ipaar Thangnang mee vakhae neningna salaam katusahnahchuw. Kithoh nong katufhuw kaarang ae ingkho neningna salaam ynvetunah ae. 22Hane Thangnang mee vakhae athurfhuw ing, iruwng sejaam eengkuw vakhae ingkho salaam ynvetunah ae.
23Aafhuw Jesu Khrista tungsiih ing nenuwchu eenruwfuw ynsuwhraiing.
Currently Selected:
PHILIPPIA 4: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
