PHILIPPIA 3
3
Barungriir Ynthiing
1Akuurchiimna kaarang ae, Aafhuw thoh yntuwhakchuw khaena rotha manrohruw. Kavebaziih vasah taklina athar kanuumtah nakho aden ing vaechirpak ing kharpakmah ing, havi inge neningna acheepniiseh khaenava. 2Ynriim ing enruw, ichamah uti aekha, mee sikenta ta aeka emandennah. 3Enuw mahpae, vinchiip ympha vasah inuw vamuw, akhaechuve laetha ynthiing ajaarnache Thangnang rummuwka amanche Khrista Jesu thohche yntuwmuw khaena rotharoh ymphava. Inuw ing reentaang asikna ithacha tumahmuw. 4Ki ing hakchaangna barungriir mangamnii kadeenkho arusa. Achuw yngkheh mee ing hakchaang nache barungriir mangamnii deennave, kataklina ikharniiseh thengna. 5#Rom 11.1; Nong 23.6; 26.5Kikho inii neeriih kapharae vinchiip katu. Katak i Hebreeu siina Isrel yngkheh ing Benjamin sungkhurna jungomping. Jehudi ae vajeer chonghak ingahtah nachembe, katak i Pharisi yngkhehping, 6#Nong 8.3; 22.4; 26.9-11Ki ing kallak ingka ruwrthiingchu kamanang. Vajeer chonghak ynjii ing ichum ynthiing aphava ichiinache karaarnii omah. 7Changvakonchu ama vakhaekha katuungsah niiva ichii ing karisahchu atii Khrista khaena chembe imaangnii vatah ichii ing karisahpa. 8Amachupang mahka, amen iruwpak ki kaafhuw Jesu Khrista ynghuwnii khaenache, aangkhenglaang imaangniiva ta ingka rimahsing. Ama akhaena aangkhenglaang ikaniimahva kachiipa, amanache Khrista chu kaaniiva kata, 9vokhehkho atak thohche yntuwva kata. Vajeer chonghak ynjiina ichum ynthiingchu kaningna atii omahsa. Thangnang ningtanii itheng thacha jaarna ichum ynthiingchu Khrista ithacha jaarna kaningna omsa. 10Ki ing kaadiksah chuve Khrista chu manghuwnii re atak hangring ruwreng, vokhehkho ijachaam aphanache sarup aja amanche atak ithii khavaang hungchii chuva. 11Changvanuwve katak i ithii tanii imanring vaata ichii barungriir kareensahsa.
Manden thungnii
12Atii havi ki ing kaphasahpa changmahka mapung kaphapa kachiimahva, changvakonchu runave Jesu Khrista ing kichu ynsuwrsah khaena nongmenchu kaphanii inche katusahva. 13Atatakva kaarang ae, ki kataksah ing atii saksing tachehmaang; changvakonchu itufhuw nong yngkheh chuve, isivasah chaap vakhaechu bahir ingka, maating heomchu iphanii inche tusa ingka, 14Jesu Khrista ajaarna Thangnang ing chungting yngeen khaena iphafhuw nongmen phanii khaenache, manden thungnii tingche ki itaensahping.
15Chukhaenache mapung ympha vasah inuw vakhae ing hangchii barungriir i siisataruw; amanche laanglam nenbarungriir sungna asik barungriir omnave, havikho Thangnang ing neningna imandangpeeh vaata. 16Inuw ing ymphasah chupang bachuwther taruw.
17 #
1 Kor 4.16; 11.1 Kauw kanae ae, ki kanu ynjii ynsuwhruw, amanche kenuw ing neningna kenu ynjiifhuwnii yngkheh ynsuwh ungka kensiihne isi mee aechu ibuwr aeruw. 18Havi hangsenna kariir vasahva, ataenkho kemik richiipum ing kenuumnah, khrista ing khros na ithii ruming ynchohnii nong itu mee inempak omna. 19Changchii mee aenche longkong ting bukvaatae, yngkhaena ynchii imbe enuw en thangnang chuve hakchaang ing amanden chuvatah. 20Inuw chuve thangbaenna paarvaanchii mee vamuw, amanche thangbaen tanii jungchum vachii Eekarpeeh Aafhuw Jesu Khrista chu hahbrah ing ynghahsahnah. 21Peeh aangkhenglaang aderna amangomcheh ruwreng jaarnache, Aafhuw ing inuw vakhae hakchaang isuur maangvachii ichu manteh naka, amanche ataksah ahakchaang vaang manguur vaata.
Currently Selected:
PHILIPPIA 3: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
