KOLOSIA 1
1
1Thangnang ing amandenna Jesu Khrista achongthang ki ing vokhehkho unae Timothi thoh-
2Kolosia na ong ynthiing ae vokhehkho thachafhuw om kauw kanae ae, inuw vakhae Apa Thangnang tanii tungsiih re idaechu neningna om ynsuwhrasii.
Ympahnii Ithamsah
3Aafhuw Jesu Khrista ampa Thangnang chu ympahthoh ynruw ing apha om bakhaena nengkhaena kenthamsahnah. 4Akhaechuve Jesu Khrista ningna nenuw ing nenthacha, vokhehkho ynthiing mee vakhae taklina neningsiih omchu kenuw ing kensiipa. 5Havi thangbaen nache nengkhaena ynsiihpeeh vasahchu nemanghuw khaenava; havi khaene ahaarpana nenuw ing isa chongchu nensiipa. 6Hava isa chong i laaruw paamna aanla omka ihungruungchu, nenuw ing Thangnang ningsiih ichum nemanghuw inii nache basenka nening nakho omba. 7#Kol 4.12; Phm 1.23Havi kenuwthoh nong kentuhak keningsiih Ipaphras ningtanii siichuwka nemanghuwkha vatah; atak i kenuw kenchangdenna thachafhuw om Khrista nong atu meeva. 8Laetha jaarna ningsiih omchuwchu ama ing keningna amanthangpa.
9Hava chong khaene kensii inii nache basenka nenuw ing laetha tanii ising iveer ing, vokhehkho nemanden vakhae nache Aafhuw nemanghuwnii khaenache kenuw ing nengkhaena ithamsah manchenmah ung. 10Nenuw ing isa nong nentu vakhaena aanla omsana, Thangnang chu nemanghuw nache hungruungruw. 11Rotha irohthoh ynruw ing ikhaangcheh nache apha iseehpak ing khaangnuwna, Aafhuw alaar isa ing aangkhenglaang nache nenuwchu imanpir sana, 12ynthiing mee aeng phava enchii thenchu iphahaknii khaena ympicheh apa Thangnang chu manpahtaruw. 13Apa Thangnang ing inuwchu ynthim ruwreng tanii ikarsaka, aningsiih inche asapa ongnii tingche inuw chukho ymmangongsahpa. 14#Eph 1.7Inuw vakhaechu ikarpeehnii vokhehkho isii kuhpeehniichu asapa ningna ym-phapa.
Khrista vokhehkho Anong
15Aafhuw chuve imu ynchehmah Thangnang thoh aanghakva. Peeh aangkhenglaang Thangnang ing aseemmah rirae atak i ombasahva. 16Amachuve thangbaen nakho, laaruw paam nakho ymmucheh, vokheh-kho ymmuchehmah, iruwngpham ongnii changmahka aatuaricheh vokhehkho ruwreng ipirseh aangkheng Aafhuw Thangnang inche aseem chirva; amachupang mahka peeh aangkhenglaang Aafhuw ajaarna anong mandangnii khaena aseempa. 17Aafhuw chuve aangkhenglaangna maensa ing heom vasahva, chutah-nache akiklina aangkheng omchirna. 18#Eph 1.22,23Atak i ruwrthiing arusaeva, vokhehkho aangkhenglaang kaarna aren pham vika, aren ithiiae kaartanii ihangring Aafhuw chuva. 19Chukhaenache ataklina isip ing aomnii khaenache 20#Eph 2.16laaruw paam nakho amanche thangbaen nakho om aangkhengchu khros na ynta asii ajaar inche yngkhehpangnii khaena aanrunii atu inche Thangnang barungriir pennii ynsuwhsa. 21Ajae nenuw chuve nenongtu chaap inche nenbarungriirna ijeehnii mee vokhehkho asik meechuw, 22changvakonchu atiive Aafhuw ithii ajaar inche nenuwchu ynthiingjaeh ing, isamahna thang isimah ing vokhehkho miraar omahdeh ing Aafhuw maanache ipeehnii khaenache aanruniichu atupa; 23nenuw ing nensii vasah, thangbaen derna om ynseem vasah aangkhengna yntong vasah, Pol ki ing anong katu isa chong nache ningmanden ymmangom tanii ynlaaprudeh ing, abur ineh ing vokhehkho icheep ing anasiir nache omtanuwve, hava vakhae i nenta ynsuwhvaata.
Khrista Ruwrthiing sungna Pol Nong
24Atarae nengkhaena ijachaam kakhaang khaene karotha rohna, amanche ruwrthiing ynsuwh Aafhuw hakchaang khaena, kahakchaangna Khrista ijachaam ivaehchu amanchinii ing katuva, 25Thangnang ing kaningna ymmansir inuwzii ing nengkhaena anongtu mee hunginsuwh ingka, Thangnang chongsaechu mapung ipha ing ynthangnii khaenache, 26juk jukna vokhehkho suwnthar aajaeh hungpaarna ithuwhpak ing thuurjaehka omba changvakonchu atiive ynthiing amee ae ningnache amandangpa. 27Chukhaenache Thangnang ing reentaang mee ae kaarna havana ithuwhpak chongsae alaar isa ichu ynchiiva ichiichu mandang ningka achiipa; amachuve nenuw nengkaarna nemanghuw ing nemanden Khrista chuva. 28Chukhaenache kenuw ing mee vakhaechu Khrista ting aanla amangomnii ing, ising iveer inche mee vakhaechu ichahsa ae ungka, vokhehkho manchuw ungka, Aafhuw isa chongchu kemanthangsahva. 29Havi khaene kabarungriir sungna ynthinchu ruwreng manpir ingka, Aafhuw nong inuwzii ing kama taarsa ingka kahentusahva.
Currently Selected:
KOLOSIA 1: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
