PHILIPPIA 2
2
Khrista ing mee Ynguur vokhehkho Aruungnii
1Chukhaenache achuw yngkheh ing Khrista ningtanii ing barungriir abathae omnave, ningsiih ing barungriir amanungae, laethana yntinnii ruvachii, ichaarpeeh vokhehkho ningmanchuwh omnave, 2nenuw vakhae neningsiih ynchim naka, barungriir yngkhehpang ing, laetha yngkheh ing barungriir ynchim nuwna karotha rohniichu mapung imamphapeehruw. 3Nenuw sehmaner om nong vokhehkho sanaensah ruungnii nong tumahdehruw, ama changdenna barungriirna ynjuursah ing, ataksah ing kachungna mee areh ae inge isapae ichii ing manden rasiing; 4changvakonchu mee vakhae ing ataksah khaena pangche mandenmah rasiing, mee areh ae khaenakho manden rasiing. 5Jesu Khrista ningna om barungriir havi nening nakho omrasiing: 6Khrista ing Thangnang masak reenkhang nakho, Thangnang thoh ynchimnii ama ing mandenmah, 7ama changdenna ataksah ing rusaka athang isa vakhae bathen chirka, vokhehkho meenae maong rika laaruw mee vaang juwngsa. 8Ama ing laaruw mee vaang jungindangka, ataksahchu ynjuursaka vokhehkho ithii phanii ing pangmahka khros nachenrap ithii phanii ing chongriir ynjii ynsuwhsa. 9Chukhaenache ampa Thangnang inche atakchu ithohka chung, thang, sungna ruming chaap asapa Khrista ningnache apeehpa. 10Amatah nache thangbaen vokhehkho laaruw paam sungna ong meechaap ing akheerkhuwh mansin naka Jesu rumingna thamsa vaatae. 11Vokhehkho ampa Thangnang alaar isachu ner vakhae ing Jesu Khrista i Aafhuw chuva ta ae naka riirvaatae.
12Amachu vanave kaarang ae, ajae nenuwthoh kaonglae kariir nemanjiikha athi ing, kaongmahrae nemanjii inche athurfhuwhakna. Manlaenpeeh phanii khaena ynchik ing vokhehkho ynchiim ing nong turuw. 13Yngkhaena ynchii imbe nenuw vakhae ing tuning rining nenchii vokhehkho ama ing amandenchu ynjii nenchehnii khaenache, Thangnang ing nentaklina nong tuka omna. 14Chongsuwh basuwh omrudeh ing nong aangkheng turuw, 15amachu inche ynraar mahdeh mee Thangnang siti ynsuwhcheh vanenta. Laaruw paam iruwm barungriir, isiicher mee changchii ing omahdehruw. Enuw changchii ae kaarna thangbaen ireng aesii ae vaang nenuw aenruw, 16iringnii isa chong nentong raenkho changche tutanuwve, Khrista aanii nache nenjaarna iruung phasava kata, akhaechuve amachu inche ki ing katu kari nong vakhae paammahdeh ichii yndang vaata.
17Kasii i Thangnang ningting chaatha ing ympivaang, nenthacha taklina chirningve karotha rohnaka amanche nenuw ingkho kithoh rotha irohfhuwva nenta. 18Havi vaange nenuw vakhaekho nenrotha rohvaata, amanche ki chukho rotha irohfhuwva nenta.
Timothi re Ipaphroditas
19Aafhuw ing amanden ynsuwhnave, neningna Timothi vechiir vakata, amana nenuw ing hentuva nenchii nong aajaeh inche kabarungriir mangam vaata. 20Ki ing kamanden vakhae atu vokhehkho atatak ing nengkhaena akharchu ama vatah. 21Achuw yngkheh chuve Jesu Khrista khaena mandenmahka, ataksah khaena pangche amanden omna. 22Changvakonchu atak ing ynchii meeping ichii amandangchu nenuw ing nemanghuwsa-amachuve ampa re asapa vaang, ama re ki ing isa chong tongnii khaena nong kentuhaksa. 23Amatah nache kathenna nong isa ing tuvaata ichii kamanghuw ing aru vakhae imaen ing neningting ivechiirnii khaena kamandennah. 24Amathoh ynruw ing Aafhuw rumingna kamandensahnah amachuve, aru vakhae kikho neningting thengsava kata.
25Runave unae Ipaphroditas i neningting ivechiirnii khaena kamandensa. Ama ing kathenna nong inempak atu vokhehkho kaningting chongla ireennii nong aajaeh atusa. 26Nenuw vakhaechu imunii khaena ahahchehmah atak i nakna ichii nensiichu amanghuwtah nache abarungriir inempak jaana. 27Atatak ing amave ithiivak ing ina rungvaangva. Changvakonchu Thangnang ing aningnapang mahka, kaning nakho aning imansiihka, ijaniipak phava kachii tanii yngkarpa. 28Neningting atak i vechiir ningka kachiipakna, amana chembe nenuw ingkho atak i nemutahna athar rotharoh phavanenta vokhehkho kabarungriir jaanii vakhae chukho omahnii. 29Aafhuw ruming nache rotharoh ing eebom meeva ichii manden nuwna hebariimruw. Hangchii mee ae i eningna isa ivaar ing ningsiih mandangruw, 30akhaechuve nenuw vakhae ing itu nenchehmah Khrista nong aajaeh khaena ithiivak ing atu mee yngkhehva.
Currently Selected:
PHILIPPIA 2: MOYO
Highlight
Copy
Compare
Share
Want to have your highlights saved across all your devices? Sign up or sign in
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.
